Sealm 76 - Anglo-Saxon Psalms c.890-950 AD

Sealm 75

¹ God wæs geara cuð ­ ­ ­ ­ ­mid Iudeum, and his æþele nama ­ ­ ­ ­ ­mid Israelum.

² Is on sibbe his stow ­ ­ ­ ­ ­soþe behealden, and he on Sione ­ ­ ­ ­ ­swylce eardað.

³ Þær he hornbogan ­ ­ ­ ­ ­hearde gebendeð, and sweord and sceld ­ ­ ­ ­ ­æt gescotfeohta.

⁴ Þu wræclice ­ ­ ­ ­ ­wundrum onlyhtest fram þam eceum hider ­ ­ ­ ­ ­æðelum beorgum;

⁵ ealle synt yrre, ­ ­ ­ ­ ­þa þe unwise heora heortan hige ­ ­ ­ ­ ­healdað mid dysige; hi slæp hiora ­ ­ ­ ­ ­swæfun unmurne; ne þær wiht fundan, ­ ­ ­ ­ ­þa þe welan sohtan, þæs þe hi on handum ­ ­ ­ ­ ­hæfdan gōdes.

⁶ For þinre þrea ­ ­ ­ ­ ­þriste ongunnon, Iacobes God, ­ ­ ­ ­ ­georne slepan, þa þe on horsum ­ ­ ­ ­ ­hwilon wæron;

⁷ is þin egesa mycel; ­ ­ ­ ­ ­hwylc mæg æfre þe, gif þu yrre byst, ­ ­ ­ ­ ­ahwær wiðstandan?

⁸ Þonne þu of heofenum dom ­ ­ ­ ­ ­hider on eorþan mid gescote sendest, ­ ­ ­ ­ ­þonne hio swyþe beofað;

⁹ ðonne to dome ­ ­ ­ ­ ­Drihten ariseð, þæt he on eorðan do ­ ­ ­ ­ ­ealle hale þe he mildheorte ­ ­ ­ ­ ­meteð and findeð.

¹⁰ For þon ðe mannes geþoht ­ ­ ­ ­ ­mægen andetteð, and þonne þa lafe ­ ­ ­ ­ ­lustum þence, þæt ic þe symbeldæg ­ ­ ­ ­ ­sette and gyrwe.

¹¹ Gehatað nu Drihtne, ­ ­ ­ ­ ­and him hraðe gyldað eowrum þam gōdan ­ ­ ­ ­ ­gode georne; ealle þe on ymbhwyrfte ­ ­ ­ ­ ­ahwær syndan, him gyfe bringen ­ ­ ­ ­ ­gōde and clæne. To þam egsan sceal ­ ­ ­ ­ ­æghwylc habban,

¹² þe wera gastum ­ ­ ­ ­ ­wealdeð and healdeð; eorðcynincgum ­ ­ ­ ­ ­se ege standeð.