Sealm 75 - Anglo-Saxon Psalms c.890-950 AD

Sealm 74

¹ We þe andettað, ­ ­ ­ ­ ­ecne Drihten, and þe andettað ­ ­ ­ ­ ­ealle þeoda and naman þinne ­ ­ ­ ­ ­neode ciegen. Ic þin wundur eall ­ ­ ­ ­ ­wræclic sæcge,

² swa ic fæstlicast mæg ­ ­ ­ ­ ­befon wordum, and eac soð ­ ­ ­ ­ ­symble deme.

³ Eorðe is gemolten ­ ­ ­ ­ ­and hire eardend mid; ic þonne hire swyre ­ ­ ­ ­ ­symble getrymme.

⁴ Ic to yflum cwæð ­ ­ ­ ­ ­oft nalæs seldan: “Nelle ge unriht ­ ­ ­ ­ ­ænig fremman and agyltan,” þæt hi ­ ­ ­ ­ ­ne gulpan þæs.

⁵ “Ne ahebbað ge to hea ­ ­ ­ ­ ­eowre hygeþancas, ne ge wið gode æfre ­ ­ ­ ­ ­gramword sprecan.”

⁶ For þon eastan ne cymeð ­ ­ ­ ­ ­gumena ænig, ne of westwegum ­ ­ ­ ­ ­wera cneorissa, ne of þissum westum ­ ­ ­ ­ ­widum morum;

⁷ for þon him is dema ­ ­ ­ ­ ­Drihten sylfa. Sumne he gehyneð, ­ ­ ­ ­ ­sumne ahefeð sniome;

⁸ for þon se wines steap ­ ­ ­ ­ ­on waldendes handa fægere gefylled is; ­ ­ ­ ­ ­þæs onfehð þe he ann. Þonne he of þysum on þæt ­ ­ ­ ­ ­þonne oncerreð, nyle he þa dærstan him ­ ­ ­ ­ ­don unbryce; forþam sculon ealle ­ ­ ­ ­ ­drincan synfulle, þa on þysse foldan ­ ­ ­ ­ ­fyrene wyrceað;

⁹ ic þonne worulde gefean ­ ­ ­ ­ ­wynnum healde, and Iacobes Gode ­ ­ ­ ­ ­georne singe.

¹⁰ Ealra fyrenfulra ­ ­ ­ ­ ­fyhtehornas ic bealdlice ­ ­ ­ ­ ­gebrece sniome; swyþe beoð ahafene ­ ­ ­ ­ ­þa soðfæstan.