Sealm 74 - Anglo-Saxon Psalms c.890-950 AD

Sealm 73

¹ For hwan þu us, ece God, ­ ­ ­ ­ ­æfre woldest æt ende fram þe ­ ­ ­ ­ ­ahwær drifan? is þin yrre strang ­ ­ ­ ­ ­and egesa mycel ofer þin agen ­ ­ ­ ­ ­eowde sceapa.

² Gemun þin mannweorod, ­ ­ ­ ­ ­þæt þu, mihtig god, æt fruman ærest ­ ­ ­ ­ ­fægere geworhtest. Þu þines yrfes ­ ­ ­ ­ ­æþele gyrde sylfa alysdest ­ ­ ­ ­ ­and Sione byrig, on þam ilcan þu ­ ­ ­ ­ ­eard gename;

³ hefe þu þine handa ­ ­ ­ ­ ­and hyn hiora oferhygd; feala wyrgnessa ­ ­ ­ ­ ­wraðe feondas þinum þam halgum ­ ­ ­ ­ ­hefige brohtan;

⁴ gylpað gramhydige, ­ ­ ­ ­ ­þa þin geo ehtan and on þinra wica ­ ­ ­ ­ ­wuniað midle. Settan hiora tacen, ­ ­ ­ ­ ­

⁵ soþe ne ongeaton, swa hi on wege ­ ­ ­ ­ ­wyrcean sceoldon wundorbeacen, ­ ­ ­ ­ ­swa hi on wudu dydan.

⁶ Hi mid æxum duru ­ ­ ­ ­ ­elne curfan, and mid twyecgum ­ ­ ­ ­ ­teoledan georne þæt hi mid adesan ­ ­ ­ ­ ­ealle towurpan.

⁷ Þa hi þæt þin fægere hus ­ ­ ­ ­ ­fyre forbærndan and on eorðstede ­ ­ ­ ­ ­eac gewemdan, þæt þinum naman gewearþ ­ ­ ­ ­ ­niode cenned.

⁸ Cwædan on heortan: ­ ­ ­ ­ ­“Wutan cuman ealle and ure magas mid us; ­ ­ ­ ­ ­wutun þyder gemot habban and symbeldagas ­ ­ ­ ­ ­swylce Drihtnes on eorðwege ­ ­ ­ ­ ­ealle towurpan.

⁹ Ne we sweotul tacen ­ ­ ­ ­ ­us geseoð ænig, ne we on ænige wisan ­ ­ ­ ­ ­witegan habbað, þæt us andgytes ma ­ ­ ­ ­ ­æfre secgen.”

¹⁰ Wilt þu hu lange, ­ ­ ­ ­ ­wealdend Drihten, edwit þolian ­ ­ ­ ­ ­yfelum feondum and naman þinne ­ ­ ­ ­ ­nu bysmriað þa wiþerweardan ­ ­ ­ ­ ­wraþe wið ende?

¹¹ For hwan awendest þu ­ ­ ­ ­ ­wuldres ansyne æfre fram us, ­ ­ ­ ­ ­eac þa swyðran hand of þinum sceate ­ ­ ­ ­ ­sylfa wið ende?

¹² Usser god kynincg, ­ ­ ­ ­ ­geara þu worhtest, ær woruld wære, ­ ­ ­ ­ ­wise hælu on þisse eorþan ­ ­ ­ ­ ­efenmidre.

¹³ Þu on þines mægenes ­ ­ ­ ­ ­mihte spedum sæ gesettest, ­ ­ ­ ­ ­swylce gebræce þæt dracan heafod ­ ­ ­ ­ ­deope wætere.

¹⁴ Þu þæs myclan dracan ­ ­ ­ ­ ­mihtum forcome and his þæt hearde ­ ­ ­ ­ ­heafod gescændest, sealdest Siglhearwum ­ ­ ­ ­ ­syððan to mose.

¹⁵ Þu sylfa eac ­ ­ ­ ­ ­toslite wyllas and hlynnende ­ ­ ­ ­ ­hlude streamas on Æthane ­ ­ ­ ­ ­ealle adrigdest.

¹⁶ Þu dæg settest ­ ­ ­ ­ ­and deorce niht, swylce þu gesettest ­ ­ ­ ­ ­sunnan and monan;

¹⁷ ealle þu geworhtest ­ ­ ­ ­ ­eorðan gemæru, sumor þu and lencten ­ ­ ­ ­ ­swylce geworhtest.

¹⁸ Wes þu gemyndig ­ ­ ­ ­ ­manna bearna, þæra gesceafta ­ ­ ­ ­ ­þe þu gesceope ðe; fynd ætwitað ­ ­ ­ ­ ­fæcne Drihtne, unwis folc ne wat ­ ­ ­ ­ ­þinne wyr'ðne naman.

¹⁹ Ne syle þu unscyldigra ­ ­ ­ ­ ­sawla deorum þe þe andettað ­ ­ ­ ­ ­earme þearfan; þara þu on ealdre ne forgit, ­ ­ ­ ­ ­ece Drihten.

²⁰ Geseoh þu nu sylfa, god, ­ ­ ­ ­ ­soð is gecyðed, nu þin gewitnes ys ­ ­ ­ ­ ­wel gefylled, hu deorce beoð ­ ­ ­ ­ ­dagas on eorðan þam þe unrihtes ­ ­ ­ ­ ­æghwær wyrceað.

²¹ Ne byð se eadmoda ­ ­ ­ ­ ­æfre gecyrred, þeah þe wædla ­ ­ ­ ­ ­and þearfa he wyle naman þinne ­ ­ ­ ­ ­neode herian.

²² Aris, Drihten God, ­ ­ ­ ­ ­dem þine nu ealde intingan; ­ ­ ­ ­ ­eac wes gemyndig, hu þe unwise ­ ­ ­ ­ ­edwita fela þurh ealne dæg ­ ­ ­ ­ ­oft aspræcon.

²³ Ne forgit huru ­ ­ ­ ­ ­gōdra manna soðra stefna, ­ ­ ­ ­ ­þa þe seceað þe; fyll þa oferhydigan, ­ ­ ­ ­ ­ða ðe feogeað þe, and eft to þe ­ ­ ­ ­ ­ealle stigað.