Sealm 73 - Anglo-Saxon Psalms c.890-950 AD

Sealm 72

¹ Hu gōd is ece God ­ ­ ­ ­ ­mid Israhelum, þam þe mid heortan ­ ­ ­ ­ ­hycgeað rihte;

² me fornean syndon ­ ­ ­ ­ ­losode nu ða ealle on foldan ­ ­ ­ ­ ­fota gangas.

³ For þon ic fæstlice ­ ­ ­ ­ ­fyrenwyrcende oft elnade; ­ ­ ­ ­ ­noldun earme mid him sibbe secean, ­ ­ ­ ­ ­sohton fyrene.

⁴ For þon hira deaðes byð ­ ­ ­ ­ ­deorc endestæf, ne heora wites bið ­ ­ ­ ­ ­wislic trymnes.

⁵ Ne synd hi on miclum ­ ­ ­ ­ ­manna gewinnum, and hi mid manna ne beoð ­ ­ ­ ­ ­mægene beswungene.

⁶ For þon hi oferhygd nam ­ ­ ­ ­ ­ungemete swyþe, þurh þæt hira unriht wearð ­ ­ ­ ­ ­eall untyned.

⁷ Þanon forð becom ­ ­ ­ ­ ­fæcne unriht, swa swa hit of gelynde ­ ­ ­ ­ ­lungre cwome,

⁸ and hi on heortan ­ ­ ­ ­ ­hogedon and þohton, hu hi fyrmest ­ ­ ­ ­ ­facen and unriht on hean huse ­ ­ ­ ­ ­hraðost acwædon.

⁹ Hwæt, hi on heofon setton ­ ­ ­ ­ ­hyge hyra muþes, and hira tungan ­ ­ ­ ­ ­tugon ofer eorðan.

¹⁰ For þon min folc hider ­ ­ ­ ­ ­fægere hweorfeð, þær hi fulle dagas ­ ­ ­ ­ ­findað sona.

¹¹ And þonne cwædon: ­ ­ ­ ­ ­“Hu weorðeð þis cuð gode oþþe þeos gewitness ­ ­ ­ ­ ­weorðeþ on heagum?”

¹² Þi nu fyrenfulle ­ ­ ­ ­ ­foldan æhta and þysse worulde welan ­ ­ ­ ­ ­wynnum namon.

¹³ Þa ic on mode cwæð ­ ­ ­ ­ ­minum sona, þeah þe ic on me ingcan ­ ­ ­ ­ ­ænne ne wiste, hu ic mine heortan ­ ­ ­ ­ ­heolde mid soðe, and mine handa þwoh, ­ ­ ­ ­ ­þær ic hete nyste,

¹⁴ and ic wæs ealne dæg ­ ­ ­ ­ ­eac geswungen, wæs me leawfinger ­ ­ ­ ­ ­be leohtne dæg.

¹⁵ Gif ic sylf cwæde ­ ­ ­ ­ ­and sæcge eac, swa þe bearn weorðað ­ ­ ­ ­ ­geboren syþþan, þa ylcan ic ­ ­ ­ ­ ­ær foreteode.

¹⁶ Ic þæs wende, ­ ­ ­ ­ ­þæt ic mid wisdome full gleawlice ­ ­ ­ ­ ­ongitan mihte, hu þis gewinn ­ ­ ­ ­ ­wolde gangan,

¹⁷ oþ þæt ic on his hus ­ ­ ­ ­ ­halig gange and ic þa nehstan ongite ­ ­ ­ ­ ­neode syþþan.

¹⁸ Hwæðere þu him for inwite ­ ­ ­ ­ ­yfel befæle, awurpe hi wraðe, ­ ­ ­ ­ ­þa hi wendan ær, þæt hi wæron alysde, ­ ­ ­ ­ ­laðum wiðferede.

¹⁹ Nu syndon hi gewordene ­ ­ ­ ­ ­wraðe tolysde, and semninga ­ ­ ­ ­ ­sneome forwurdon for unrihte ­ ­ ­ ­ ­þe hi ær dydon,

²⁰ swa fram slæpe hwylc ­ ­ ­ ­ ­swærum arise. And hi on byrig Drihtnes ­ ­ ­ ­ ­bealde habbað hiora ansyne, ­ ­ ­ ­ ­and þu hi eaðe miht to nawihte ­ ­ ­ ­ ­fomiman sneome.

²¹ Ys minre heortan hige ­ ­ ­ ­ ­hluttor and clæne, wærun mine ædra ­ ­ ­ ­ ­ealle tolysde,

²² and ic to nawihte eom ­ ­ ­ ­ ­nyde gebiged, swa ic þæt be owihte ­ ­ ­ ­ ­ær ne wiste. Ic eom anlic mid þe ­ ­ ­ ­ ­anum neate and ic symble mid þe ­ ­ ­ ­ ­syþþan hwæðere.

²³ Þu mine swyþran hand ­ ­ ­ ­ ­sylfa gename,

²⁴ and me mid þinon willan ­ ­ ­ ­ ­well gelæddest, and me þa mid wuldres ­ ­ ­ ­ ­welan gename.

²⁵ Hwæt mæg me wiðerhabban ­ ­ ­ ­ ­on heofonrice? hwæt wolde ic fram þe ­ ­ ­ ­ ­wyrcean ofer eorþan?

²⁶ Me is heorte and flæsc ­ ­ ­ ­ ­hearde geteorad; ys me heortan gehygd ­ ­ ­ ­ ­hyldu Drihtnes and ece dæl ­ ­ ­ ­ ­awa to worulde.

²⁷ Forþan þa forweorþað, ­ ­ ­ ­ ­þe hira wynne to þe habban noldan, ­ ­ ­ ­ ­ne heora hyge settan; huru þu forleosest ­ ­ ­ ­ ­þa forhealdað þe.

²⁸ Min is ætfele ­ ­ ­ ­ ­mihtigum Drihtne; good is swylce, ­ ­ ­ ­ ­þæt ic on God Drihten minne hiht sette, ­ ­ ­ ­ ­healde fæste. And ic eall þin lof ­ ­ ­ ­ ­eft asecge Sione dohtrum ­ ­ ­ ­ ­on hire sylfre durum.