Sealm 71 - Anglo-Saxon Psalms c.890-950 AD

Sealm 70

¹ Ic on þe, god Drihten, ­ ­ ­ ­ ­gearuwe gewene; ne weorðe ic on ealdre ­ ­ ­ ­ ­æfre gescended;

² þu me sniome alys ­ ­ ­ ­ ­þuruh þine þa swiþeran miht. Ahyld me þin eare to ­ ­ ­ ­ ­holde mode, and me lustum alys; ­ ­ ­ ­ ­

³ and me lungre weorð on God Drihten ­ ­ ­ ­ ­georne þeccend and on trume stowe, ­ ­ ­ ­ ­þæt þu me teala hæle. For þon þu me, god, wære ­ ­ ­ ­ ­geara trymmend, freoða fultumiend; ­ ­ ­ ­ ­

⁴ alys me feondum nu, and me of folmum afere ­ ­ ­ ­ ­firenwyrcendra, þe þine æ ­ ­ ­ ­ ­efnan nellað; syndon unrihtes ­ ­ ­ ­ ­ealle wyrcende.

⁵ For þon þu me eart fæle geþyld ­ ­ ­ ­ ­fæste, Drihten wære me on geoguðe hyht ­ ­ ­ ­ ­gleaw æt frymðe.

⁶ Ic of modur hrife ­ ­ ­ ­ ­mundbyrd on þe þriste hæfde; ­ ­ ­ ­ ­þu eart þeccend min; on þe ic singge nu ­ ­ ­ ­ ­symble and geneahhie.

⁷ Ic eom swa forebeacen ­ ­ ­ ­ ­folce manegum, and þu me eart fultum strang ­ ­ ­ ­ ­fæste æt þearfe.

⁸ Sy min muð and min mod ­ ­ ­ ­ ­mægene gefylled, þæt ic þin lof mæge ­ ­ ­ ­ ­lustum singan and wuldur þin ­ ­ ­ ­ ­wide mærsian and þe ealne dæg ­ ­ ­ ­ ­æghwær herian.

⁹ Ne aweorp þu me, ­ ­ ­ ­ ­wuldres ealdor, þonne me ylde tid ­ ­ ­ ­ ­on gesige; þonne me mægen and mod ­ ­ ­ ­ ­mylte on hreðre, ne forlæt þu me, ­ ­ ­ ­ ­lifiende god.

¹⁰ Oft me feala cwædon ­ ­ ­ ­ ­feondas yfele, and sætendan ­ ­ ­ ­ ­sawle minre and on anre geþeaht ­ ­ ­ ­ ­eodan togædere.

¹¹ Cweþað cuðlice: ­ ­ ­ ­ ­“Wuton cunnian, hwænne hine god læte ­ ­ ­ ­ ­swa swa gymeleasne; þonne we hine forgripen ­ ­ ­ ­ ­and his geara ehtan; syþþan he ne hæbbe ­ ­ ­ ­ ­helpend ænne.”

¹² Ne ofgif þu me huru, ­ ­ ­ ­ ­god ælmihtig; beseoh þu me, soð god, ­ ­ ­ ­ ­symble on fultum.

¹³ Beoð gedrette, ­ ­ ­ ­ ­eac gescende, þa mine sawle ær ­ ­ ­ ­ ­swyþust tældun; byð þam scand and sceamu ­ ­ ­ ­ ­þe me syrwedan yfel.

¹⁴ Ic me symble on God ­ ­ ­ ­ ­swiðost getreowige, ofer eall þin lof ­ ­ ­ ­ ­lengest hihte.

¹⁵ Min muð sægeð ­ ­ ­ ­ ­þine mægenspede and þin soðfæst weorc ­ ­ ­ ­ ­swyþust mæreð, sægeð þe ealne dæg ­ ­ ­ ­ ­ece hælu. For þon ic ne ongeat ­ ­ ­ ­ ­grame ceapunga,

¹⁶ ac ic on þine þa myclan ­ ­ ­ ­ ­mihte gange. Ic þine soðfæstnesse geman ­ ­ ­ ­ ­symble, Drihten;

¹⁷ þu me ara, god, ­ ­ ­ ­ ­ærest lærdest of geoguðhade; ­ ­ ­ ­ ­nu ic eom gomel wintrum.

¹⁸ A ic wundor þin ­ ­ ­ ­ ­weorþlic sægde, and ic þæt wið oryldu ­ ­ ­ ­ ­awa fremme; ne forlæt þu me, ­ ­ ­ ­ ­lifigende god, Oð ðæt ic þines earmes ­ ­ ­ ­ ­eall asecge stiþe strencðe ­ ­ ­ ­ ­þisse cneorisse, eallum þam teohhe, ­ ­ ­ ­ ­þe nu toweard ys, Þines mihtes þrym, ­ ­ ­ ­ ­

¹⁹ and þæt mære soð, þæt ðu on heofenum, god, ­ ­ ­ ­ ­heah geworhtest wundur wræclicu; ­ ­ ­ ­ ­nis þe, wuldres cyning, ænig æfre gelic, ­ ­ ­ ­ ­ece Drihten.

²⁰ Oft þu me ætywdest ­ ­ ­ ­ ­earfoðes feala on costunge ­ ­ ­ ­ ­cuðra manna, and me yfela feala ­ ­ ­ ­ ­oft oncnyssedest; þonne þu yrre þin ­ ­ ­ ­ ­eft oncyrdest and me of neowelnesse eft ­ ­ ­ ­ ­neoðan alysdest þysse eorðan, ­ ­ ­ ­ ­þe we on buiað.

²¹ Ðær þu þin soðfæst weorc ­ ­ ­ ­ ­sniome tobræddest, þonne þu gehwyrfdest ­ ­ ­ ­ ­and hulpe min, and me getrymedest ­ ­ ­ ­ ­þæt ic teala mihte;

²² for þon ic þe andette, ­ ­ ­ ­ ­ece Drihten, and þe on sealmfatum ­ ­ ­ ­ ­singe be hearpan, Israela God, ­ ­ ­ ­ ­ece and halig.

²³ Mine weleras gefeoð, ­ ­ ­ ­ ­wynnum lofiað, þonne ic þe singe, ­ ­ ­ ­ ­sigora wealdend, and min sawl eac, ­ ­ ­ ­ ­þa þu sylf lysdest.

²⁴ Swylce min tunge ­ ­ ­ ­ ­tidum mærde þin soðfæst weorc; ­ ­ ­ ­ ­scende wæron ealle þe me yfel to ­ ­ ­ ­ ­ær gesohton.