Sealm 69 - Anglo-Saxon Psalms c.890-950 AD

Sealm 68

¹ Do me halne, god, ­ ­ ­ ­ ­for þon hreoh wæter to minum feore inn ­ ­ ­ ­ ­floweð and gangeð;

² eom ic on lame oflegd, ­ ­ ­ ­ ­hafað lytle sped. Com ic on sæs hricg, ­ ­ ­ ­ ­þær me sealt wæter hreoh and hopig ­ ­ ­ ­ ­holme besencte.

³ Þær ic werigmod ­ ­ ­ ­ ­wann and cleopode, þæt me grame syndan ­ ­ ­ ­ ­goman hase; byð me æt þam earon ­ ­ ­ ­ ­eagon wiðgangen; hwæðere ic on God minne ­ ­ ­ ­ ­gearewe gewene.

⁴ Hiora is mycle ma ­ ­ ­ ­ ­þonne ic me hæbbe on heafde nu ­ ­ ­ ­ ­hæra feaxes, þe me earwunga ­ ­ ­ ­ ­ealle feogeað. Ofer me syndon ­ ­ ­ ­ ­þa þe me ehton, fæstum folmum ­ ­ ­ ­ ­forð gestrangad feondas mine, ­ ­ ­ ­ ­and ic forð agef unrihtlice ­ ­ ­ ­ ­þa þe ic ne reafude ær.

⁵ Þu wast, wuldres god, ­ ­ ­ ­ ­þæt ic eom unwis hyges, ne wæren þe bemiðene ­ ­ ­ ­ ­mine scylde.

⁶ Ne sceolon æt me ­ ­ ­ ­ ­ænige habban sceame sceandlice ­ ­ ­ ­ ­þe þines siðes her ful bealdlice ­ ­ ­ ­ ­bidað, Drihten, þu eart mægena god; ­ ­ ­ ­ ­ne sceal æt me ænige unare ­ ­ ­ ­ ­ahwær findan, þe ðe Israela God ­ ­ ­ ­ ­ahwær seceað.

⁷ For þon ic edwit for þe ­ ­ ­ ­ ­oft aræfnade and me hleorsceame ­ ­ ­ ­ ­hearde becwoman;

⁸ and ic framþe wearð ­ ­ ­ ­ ­fæderenbroðrum, wæs unmæge gyst ­ ­ ­ ­ ­modorcildum.

⁹ For þon me þines huses ­ ­ ­ ­ ­heard ellenwod æt ormæte ­ ­ ­ ­ ­and me eac fela þinra edwita ­ ­ ­ ­ ­on gefeollon.

¹⁰ Þonne ic minum feore ­ ­ ­ ­ ­fæsten gesette, eall hi me þæt on edwit ­ ­ ­ ­ ­eft oncyrdan.

¹¹ Gif ic mine gewæda ­ ­ ­ ­ ­on witehrægl cyme cyrde, ­ ­ ­ ­ ­cwædan hi syþþan, þæt ic him wæfersyn ­ ­ ­ ­ ­wære eallum.

¹² Me wiðerwearde ­ ­ ­ ­ ­wæron ealle, þa him sæton ­ ­ ­ ­ ­sundor on portum; spræcon me wraðe, ­ ­ ­ ­ ­þa þe win druncon.

¹³ Ic þonne min gebed ­ ­ ­ ­ ­to þe, mihtig Drihten, tidum sende ­ ­ ­ ­ ­teala liciendlic, and þu me þonne on mænigeo ­ ­ ­ ­ ­miltsa þinra gehyre me hlutre ­ ­ ­ ­ ­hælu þine.

¹⁴ Alys me of lame, ­ ­ ­ ­ ­þe læs ic weorþe lange fæst, and me feondum afyrr, ­ ­ ­ ­ ­frea ælmihtig; ado me of deope ­ ­ ­ ­ ­deorces wæteres,

¹⁵ þe læs me besencen ­ ­ ­ ­ ­sealte flodas. Ne me huru forswelge ­ ­ ­ ­ ­sægrundes deop ne me se seað ­ ­ ­ ­ ­supe mid muðe.

¹⁶ Gehyr, Drihten, me, ­ ­ ­ ­ ­for þon gedefe is þin milde mod ­ ­ ­ ­ ­mannum fremsum, and for mænigeo ­ ­ ­ ­ ­miltsa þinra geseoh on me ­ ­ ­ ­ ­swylce, Drihten.

¹⁷ Ne acyr þu æfre fram þinum cnihte ­ ­ ­ ­ ­þin clæne gesyhð, forþan me feondas to ­ ­ ­ ­ ­feohtað geneahhe; gehyr me hrædlice ­ ­ ­ ­ ­and me help freme.

¹⁸ Beheald mine sawle ­ ­ ­ ­ ­and hi hrædlice alys and wiðfere ­ ­ ­ ­ ­laþum feondum.

¹⁹ [Missing from MS] ­ ­ ­ ­ ­ar scame; for þinre ansyne ­ ­ ­ ­ ­ealle syndon þe feondas me ­ ­ ­ ­ ­fæcne wurdon.

²⁰ Min heorte gebad ­ ­ ­ ­ ­hearmedwit feala and yrmðu mænig ­ ­ ­ ­ ­eac aræfnede; næfde eorla þæs ­ ­ ­ ­ ­ænig sorge; frefrend ic sohte, ­ ­ ­ ­ ­findan ic ne mihte.

²¹ Hi minne mete ­ ­ ­ ­ ­mengdan wið geallan and þa gedrugadne ­ ­ ­ ­ ­drenctan mid ecede.

²² Wese heora beod fore him ­ ­ ­ ­ ­wended on grine and on edlean yfel ­ ­ ­ ­ ­and on æwisce.

²³ Syn hiora eagan ­ ­ ­ ­ ­eac adimmad, þæt hi geseon ne magon ­ ­ ­ ­ ­syþþan awiht; weorðe heora bæc swylce ­ ­ ­ ­ ­abeged eac.

²⁴ Ageot ofer hi ­ ­ ­ ­ ­þin þæt grame yrre, and æbylignes eac ­ ­ ­ ­ ­yrres þines hi forgripe ­ ­ ­ ­ ­gramhicgende.

²⁵ Wese wic heora ­ ­ ­ ­ ­weste and idel; ne on heora eðele ne sy ­ ­ ­ ­ ­þinc oneardiendes.

²⁶ For þon hi ealra ­ ­ ­ ­ ­ehtan ongunnon, ðe þu him earfoðu ­ ­ ­ ­ ­ænig geafe, and me wean ecton ­ ­ ­ ­ ­minra wunda sar.

²⁷ Asete him þa unriht to ­ ­ ­ ­ ­þe hi geearnedan, and mid unrihte ­ ­ ­ ­ ­ær geworhton, and hi on þin soðfæst weorc ­ ­ ­ ­ ­syþþan ne gangan.

²⁸ Syn hi adilgad ­ ­ ­ ­ ­of gedefra eac þæra lifigendra ­ ­ ­ ­ ­leofra bocum; ne wesen hi mid soðfæstum ­ ­ ­ ­ ­syþþan awritene.

²⁹ Ic me sylfa eam ­ ­ ­ ­ ­sarig þearfa, and me andwlita onfeng ­ ­ ­ ­ ­ecean Drihtnes, se me holdlice ­ ­ ­ ­ ­hælde sona.

³⁰ Nu ic naman Drihtnes ­ ­ ­ ­ ­neode herige and hine mid lofsange ­ ­ ­ ­ ­læde swylce.

³¹ Ic þam leofan gode ­ ­ ­ ­ ­licie swyþor þonne æðele cealf, ­ ­ ­ ­ ­þeah þe him upp aga horn on heafde ­ ­ ­ ­ ­oððe hearde cleo.

³² Geseoð þæt and gefeoð, ­ ­ ­ ­ ­sarie þearfan, seceað Drihten ­ ­ ­ ­ ­and eower sawl leofað.

³³ For þam þa þearfendan ­ ­ ­ ­ ­þriste Drihten gehyreð holdlice; ­ ­ ­ ­ ­nyle he gehæfte eac on heora neode ­ ­ ­ ­ ­na forhycgan.

³⁴ Herige hine swylce ­ ­ ­ ­ ­heofen and eorðe, side sæflodas ­ ­ ­ ­ ­and þa him syndon on.

³⁵ For þon Sione god ­ ­ ­ ­ ­ymble hæleð; beoð mænige byrig ­ ­ ­ ­ ­mid Iudeum eft getimbrade, ­ ­ ­ ­ ­þær hi eard nimað.

³⁶ Þær hi yrfestol ­ ­ ­ ­ ­eft gesittað and hiora eþel begytað ­ ­ ­ ­ ­esnas Drihtenes, and his naman ­ ­ ­ ­ ­neode lufiað, þær eardiað ­ ­ ­ ­ ­awa to feore.