Sealm 66 - Anglo-Saxon Psalms c.890-950 AD

Sealm 65

¹ Ealle eorðbuend ­ ­ ­ ­ ­ecne Drihten wordum wislicum ­ ­ ­ ­ ­wide herian,

² and his naman secgeað ­ ­ ­ ­ ­neode mid sealmum and him wuldres lof ­ ­ ­ ­ ­wide syllað.

³ And gode secgeað, ­ ­ ­ ­ ­hu his þa goodan weorc syndon wundorlice ­ ­ ­ ­ ­wide geond eorðan, and eac on menigeo ­ ­ ­ ­ ­mægenes þines þine feondas þe ­ ­ ­ ­ ­fæcne leogað.

⁴ Geweorðie ­ ­ ­ ­ ­wuldres ealdor eall ðeos eorþe, ­ ­ ­ ­ ­ecne Drihten; and þe singe eac, ­ ­ ­ ­ ­secge geneahhie, þæt þin nama is ­ ­ ­ ­ ­ofer eall niða bearn se hehsta ­ ­ ­ ­ ­hæleþa cynnes.

⁵ Cumað nu and geseoð, ­ ­ ­ ­ ­hu cyme weorc Drihten worhte; ­ ­ ­ ­ ­synt his domas eac swiþe egeslice ­ ­ ­ ­ ­ofer eall ylda bearn.

⁶ He mæg onwendan ­ ­ ­ ­ ­wætera ðryðe, þæt þas deopan sæ ­ ­ ­ ­ ­drige weorðað, and þa strangan mæg ­ ­ ­ ­ ­streamas swylce gefeterian, ­ ­ ­ ­ ­þæt þu mid fote miht on treddian ­ ­ ­ ­ ­eorðan gelice.

⁷ His mægen wealdeð ­ ­ ­ ­ ­ofer eall manna cyn on ecnesse ­ ­ ­ ­ ­awa to feore, and he ofer ealle þeode ­ ­ ­ ­ ­eagum wliteð; þa hine on yrre ­ ­ ­ ­ ­æghwær gebringað, ne beoð þa on him sylfum ­ ­ ­ ­ ­syððan ahafene.

⁸ Bletsigen þeoda ­ ­ ­ ­ ­bliðe mode ealle eorðbuend ­ ­ ­ ­ ­ecne Drihten and mid stefne lof ­ ­ ­ ­ ­strang asecgean.

⁹ He mine sawle ­ ­ ­ ­ ­sette to life, ne læteð mine fet ­ ­ ­ ­ ­laðe hreran.

¹⁰ Ure costade god ­ ­ ­ ­ ­clæne fyre soðe dome, ­ ­ ­ ­ ­swa man seolfor deð, þonne man hit aseoðeð ­ ­ ­ ­ ­swyðe mid fyre.

¹¹ Þu us on grame swylce ­ ­ ­ ­ ­gryne gelæddest, and us bealuwa fela ­ ­ ­ ­ ­on bæce standeð;

¹² settest us mænige eac ­ ­ ­ ­ ­men ofer heafod. We þuruh fyr farað ­ ­ ­ ­ ­and þuruh floda þrym, and ðu us on colnesse ­ ­ ­ ­ ­clæne gelæddest.

¹³ Ic on þin hus ­ ­ ­ ­ ­halig gange and þær tidum þe ­ ­ ­ ­ ­tifer onsecge; þær ic min gehat ­ ­ ­ ­ ­mid hyge gylde,

¹⁴ þæt mine weleras ær ­ ­ ­ ­ ­wise gedældan. Þas ic mid muðe aspræc ­ ­ ­ ­ ­mine æt þearfe, þær me costunge ­ ­ ­ ­ ­cnyssedan geneahhe,

¹⁵ þæt ic ðe on tifrum ­ ­ ­ ­ ­teala forgulde ealle þa gehat, ­ ­ ­ ­ ­þe ic æfre her mid minum welerum ­ ­ ­ ­ ­wis todælde.

¹⁶ Gehyrað me ­ ­ ­ ­ ­and her cumað; ic eow mid soþe ­ ­ ­ ­ ­secgean wylle, gif ge godes egesan ­ ­ ­ ­ ­georne habbað, hu mycel he dyde ­ ­ ­ ­ ­minre sawle.

¹⁷ Þuruh his mihte ic ­ ­ ­ ­ ­muðe cleopige oþþe mine tungan ­ ­ ­ ­ ­tidum blissade.

¹⁸ Gif ic me unrihtes oncneow ­ ­ ­ ­ ­awiht on heortan, ne wite me þæt, ­ ­ ­ ­ ­wealdend Drihten.

¹⁹ Forðon me gehyrde ­ ­ ­ ­ ­hælend Drihten, and minre stefne beheold ­ ­ ­ ­ ­strange bene.

²⁰ Drihten si gebletsad, ­ ­ ­ ­ ­þe he ne dyde æfre nymðe he mine bene ­ ­ ­ ­ ­bealde gehyrde, ne his milde mod ­ ­ ­ ­ ­me dyde fremde.