Sealm 65 - Anglo-Saxon Psalms c.890-950 AD

Sealm 64

¹ Þe gedafenað, ­ ­ ­ ­ ­Drihten user, þæt þe man on Sion ­ ­ ­ ­ ­swyðe herige and on Hierusalem ­ ­ ­ ­ ­gylde and gehate.

² Gehyr min gebed, ­ ­ ­ ­ ­halig Drihten, for ðe sceal ælc flæsc ­ ­ ­ ­ ­forð siðian.

³ Synfulra word ­ ­ ­ ­ ­swyþe ofer usic fræcne foran; ­ ­ ­ ­ ­þu gefultuma urum misdædum, ­ ­ ­ ­ ­mihta wealdend.

⁴ He weorðeð eadig, ­ ­ ­ ­ ­se þe hine ece God cystum geceoseð ­ ­ ­ ­ ­and hine clæne hafað, and on his earduncgstowum ­ ­ ­ ­ ­eardað syððan. Ealle we ðin hus ­ ­ ­ ­ ­ecum gōdum fægere fyllað; ­ ­ ­ ­ ­fæste is þin templ

⁵ ece and wræclic ­ ­ ­ ­ ­awa to feore. Gehyr us, hælend God, ­ ­ ­ ­ ­þu eart hyht ealra þe on ðysse eorðan ­ ­ ­ ­ ­utan syndon oþþe feor on sæ ­ ­ ­ ­ ­foldum wuniað.

⁶ Þinre mihte sculon ­ ­ ­ ­ ­muntas hyran;

⁷ swylce þu gedrefest ­ ­ ­ ­ ­deope wælas þæt byð ormætum ­ ­ ­ ­ ­yþa hlude and hi uneaðe mæg ­ ­ ­ ­ ­ænig aræfnan.

⁸ Þeoda him ondrædað ­ ­ ­ ­ ­þinne egesan, þe eard nymað ­ ­ ­ ­ ­utan landes; for þinum wundrum ­ ­ ­ ­ ­forhte weorðað. Ærmorgenes gancg ­ ­ ­ ­ ­wið æfentid ealle þa deman ­ ­ ­ ­ ­Drihten healdeð;

⁹ eorðan ðu gefyllest ­ ­ ­ ­ ­eceum wæstmum, þæt heo welig weorþeð ­ ­ ­ ­ ­wera cneorissum. Beoð godes streamas ­ ­ ­ ­ ­gōde wætere fæste gefylde, ­ ­ ­ ­ ­þanan feorhnere findað foldbuend, ­ ­ ­ ­ ­swa him fægere oft gegearewadest, ­ ­ ­ ­ ­god lifigende.

¹⁰ Wæter yrnende ­ ­ ­ ­ ­wæstme tyddrað; mænige on moldan ­ ­ ­ ­ ­manna cynnes on cneorisse ­ ­ ­ ­ ­cende weorðað, and blissiað, ­ ­ ­ ­ ­blowað and growað þurh dropunge ­ ­ ­ ­ ­deawes and renes.

¹¹ Þonne þu geares hring ­ ­ ­ ­ ­mid gyfe bletsast and þine fremsumnesse wylt ­ ­ ­ ­ ­folcum dælan, þonne beoð þine feldas ­ ­ ­ ­ ­fylde mid wæstmum;

¹² þonne on wæstmum ­ ­ ­ ­ ­weorðað mæsted, and mid wynngrafe ­ ­ ­ ­ ­weaxað geswiru.

¹³ Hi beoð gegyrede ­ ­ ­ ­ ­gōdre wulle, eowde sceapum; ­ ­ ­ ­ ­cumað eadilic wæstm on wangas ­ ­ ­ ­ ­weorðlic on hwætum; þonne hi cynlice to ðe ­ ­ ­ ­ ­cleopiað sona, and þe þonne lustum ­ ­ ­ ­ ­lofe þanciað.