Sealm 64 - Anglo-Saxon Psalms c.890-950 AD

Sealm 63

¹ Gehyr min gebed, ­ ­ ­ ­ ­halig Drihten, nu me costunge ­ ­ ­ ­ ­cnyssað geneahhe, and wið egesan ­ ­ ­ ­ ­yfeles feondes mine sawle gescyld ­ ­ ­ ­ ­symle æt þearfe.

² Þu me oft aweredest ­ ­ ­ ­ ­wyrigra gemotes and fram þære menegeo ­ ­ ­ ­ ­þe man woldon and unrihte ­ ­ ­ ­ ­æghwær fremman.

³ Þa heora tungan teoð ­ ­ ­ ­ ­teonan gehwylce sweorde efenscearpe ­ ­ ­ ­ ­and heora swiðne bogan,

⁴ and unscyldige mid þy ­ ­ ­ ­ ­scotian þenceað.

⁵ Hi hine samnuncga ­ ­ ­ ­ ­scearpum strelum on scotiað, ­ ­ ­ ­ ­egsan ne habbað, ac hi mid wraðum ­ ­ ­ ­ ­wordum trymmað and sare sprecað: ­ ­ ­ ­ ­Hwa gesyhð usic?

⁶ Swa hi smeagað oft ­ ­ ­ ­ ­swiðost unriht and on þam ilcan ­ ­ ­ ­ ­eft forweorðað, þær hi mamriað ­ ­ ­ ­ ­mān and unriht. Gangeð man manig ­ ­ ­ ­ ­modig on heortan,

⁷ oðþæt hine ahefeð ­ ­ ­ ­ ­hælend Drihten. Syndon hyra wita ­ ­ ­ ­ ­scytelum cilda æghwæs onlicost; ­ ­ ­ ­ ­

⁸ ne him awiht þon ma heora tungan nu ­ ­ ­ ­ ­teonan on sittað. Ealle synd gedrefede ­ ­ ­ ­ ­þe hi on sioð;

⁹ sceal him manna gehwylc ­ ­ ­ ­ ­mān ondrædan and weorc Godes ­ ­ ­ ­ ­wide mærsian and his weorc ongitan ­ ­ ­ ­ ­mid wisdome.

¹⁰ Ðe soðfæsta ­ ­ ­ ­ ­symble on Drihten blissað baldlice, ­ ­ ­ ­ ­bote geweneð, and hine heriað eac ­ ­ ­ ­ ­heortan clæne.