Sealm 63 - Anglo-Saxon Psalms c.890-950 AD

Sealm 62

¹ God min, God min, ­ ­ ­ ­ ­ic þe gearuwe to æt leohte gehwam ­ ­ ­ ­ ­lustum wacie. Min sawl on ðe ­ ­ ­ ­ ­swyðe þyrsteð and min flæsc on ðe ­ ­ ­ ­ ­fæste getreoweð.

² On westene ­ ­ ­ ­ ­and on wege swylce and on wæterflodum ­ ­ ­ ­ ­wene ic swiðe, þæt ic ðe on halgum ­ ­ ­ ­ ­her ætywe, þæt ic þin wuldur and mægen ­ ­ ­ ­ ­wis sceawige.

³ Ys þin milde mod ­ ­ ­ ­ ­micele betere þonne þis læne lif ­ ­ ­ ­ ­þe we lifiað on; weleras ðe mine ­ ­ ­ ­ ­wynnum heriað.

⁴ Swa ic ðe on minum life ­ ­ ­ ­ ­lustum bletsige and ic on naman þinum ­ ­ ­ ­ ­neode swylce mine handa þwea ­ ­ ­ ­ ­halgum gelome.

⁵ Ys sawl min ­ ­ ­ ­ ­swetes gefylled, swa seo fætte gelynd, ­ ­ ­ ­ ­fægeres smeoruwes; weleras mine ­ ­ ­ ­ ­wynnum swylce þinne naman nu ða ­ ­ ­ ­ ­neode heriað.

⁶ Swa ic þin gemynd ­ ­ ­ ­ ­on modsefan on minre reste ­ ­ ­ ­ ­rihte begange, and on ærmergen on ðe ­ ­ ­ ­ ­eac gewene,

⁷ forðon þu me on fultum ­ ­ ­ ­ ­fæste gestode. Ic beo fægere beþeaht ­ ­ ­ ­ ­fiðerum þinum and hiht on ðon ­ ­ ­ ­ ­hæbbe georne,

⁸ forðon min sawl on ðe ­ ­ ­ ­ ­soðe getreoweþ; me ðin seo swiðre onfencg ­ ­ ­ ­ ­symble æt ðearfe.

⁹ Forðon hi on idel ­ ­ ­ ­ ­ealle syððan sohton synlice ­ ­ ­ ­ ­sawle mine, and geond eorðscræfu ­ ­ ­ ­ ­eodon geneahhe;

¹⁰ nu hi wæran geseald ­ ­ ­ ­ ­under sweordes hand, syndon fracuðe nu ­ ­ ­ ­ ­foxes dælas.

¹¹ Kynincg sceal on Drihtne ­ ­ ­ ­ ­clæne blisse hluttre habban, ­ ­ ­ ­ ­and hine heriað eac ealle þa ðe on hine ­ ­ ­ ­ ­aðas sweriað; for þon synt gemyrde ­ ­ ­ ­ ­muðas ealle þa unriht sprecað ­ ­ ­ ­ ­ahwær landes.