Sealm 62 - Anglo-Saxon Psalms c.890-950 AD

Sealm 61

¹ Ic mine sawle ­ ­ ­ ­ ­symble wylle full gleawlice ­ ­ ­ ­ ­Gode underþeodan; æt him is hælu min ­ ­ ­ ­ ­her eall gelancg.

² Hwæt, he is God min ­ ­ ­ ­ ­and gearu hælend; is he fultum min, ­ ­ ­ ­ ­ic ne forhtige wiht.

³ Donne ge mid mane ­ ­ ­ ­ ­men ongunnon, ealle ge ða to deadan ­ ­ ­ ­ ­dædun sona, swa ge awurpon ­ ­ ­ ­ ­wah of stofne.

⁴ Swa ge mine are ­ ­ ­ ­ ­ealle þohton wraðe toweorpan, ­ ­ ­ ­ ­wide urnon þurstige muðe; ­ ­ ­ ­ ­þæne bletsadan and ðone wyrgedan ­ ­ ­ ­ ­wraðe mid heortan.

⁵ Hwæðere ic me soðe ­ ­ ­ ­ ­sawle mine to Gode hæfde ­ ­ ­ ­ ­georne geðeoded; he minre geðylde ­ ­ ­ ­ ­þingum wealdeð.

⁶ Hwæt, he is God min ­ ­ ­ ­ ­and gleaw hælend and fultum is; ­ ­ ­ ­ ­ne mæg ic hine ahwær befleon.

⁷ On Gode standeð ­ ­ ­ ­ ­min gearu hælu and wuldor min ­ ­ ­ ­ ­and wyn mycel; me is halig hyht ­ ­ ­ ­ ­on hine swylce.

⁸ Hycge him halig folc ­ ­ ­ ­ ­hælu to Drihtne; doð eowre heortan hige ­ ­ ­ ­ ­hale and clæne, forðon eow God standeð ­ ­ ­ ­ ­georne on fultum.

⁹ Hwæðere ge, manna bearn, ­ ­ ­ ­ ­mānes unlyt wyrceað on wægum ­ ­ ­ ­ ­and woh doð, and eow beswicað ­ ­ ­ ­ ­sylfe oftast, þær ge idel gylp ­ ­ ­ ­ ­on þam ilcan fremmað.

¹⁰ Nellað ge gewenan ­ ­ ­ ­ ­welan unrihte oþþe to reaflace ­ ­ ­ ­ ­ræda þencean. Þeah þe eow wealan to ­ ­ ­ ­ ­weamum flowen, nyllan ge eow on heortan þa ­ ­ ­ ­ ­hige staðelian;

¹¹ æne ic God spræcan ­ ­ ­ ­ ­gearuwe gehyrde and þæt treowe ongeat ­ ­ ­ ­ ­tidum gemeldad. Miht is Drihtnes ­ ­ ­ ­ ­ofer middangeard

¹² and him þæs to worlde ­ ­ ­ ­ ­wuldor stande and mildheortness, ­ ­ ­ ­ ­þæt he manna gehwam æfter his agenum ­ ­ ­ ­ ­earnungum demeð, efne swa he wyrceð ­ ­ ­ ­ ­on worldlife.