Sealm 60 - Anglo-Saxon Psalms c.890-950 AD

Sealm 59

¹ Þu us todrife, ­ ­ ­ ­ ­Drihten user, and us towurpe ­ ­ ­ ­ ­geond werþeoda, yrre us wurde ­ ­ ­ ­ ­and eft milde.

² Eorðan ðu onhrerdest, ­ ­ ­ ­ ­ealle gedrefdest; hæl hyre wunde, ­ ­ ­ ­ ­nu heo ahrered is.

³ Feala ðu ætywdest ­ ­ ­ ­ ­folce ðinum heardra wisan ­ ­ ­ ­ ­and hi hraþe æfter mid wynsume ­ ­ ­ ­ ­wine drenctest.

⁴ Þu becnuncge ­ ­ ­ ­ ­beorhte sealdest þam þe ege ðinne ­ ­ ­ ­ ­elne healdað, þæt hi him gebeorgen ­ ­ ­ ­ ­bogan and stræle and wæron alysede ­ ­ ­ ­ ­leofe þine.

⁵ Do me þin seo swyðre hand ­ ­ ­ ­ ­symle halne; gehyr me, halig God. ­ ­ ­ ­ ­

⁶ Hwæt, ðu holdlice on ðinre halignesse ­ ­ ­ ­ ­her aspræce: “and ic blissie, ­ ­ ­ ­ ­ba gedæle Sicimam et Conuallem, ­ ­ ­ ­ ­ða samod wæron on Metiboris ­ ­ ­ ­ ­mihtum spedige.

⁷ Min is Galaad, ­ ­ ­ ­ ­gleaw Mannases and Effrem ys ­ ­ ­ ­ ­æðele strengþu heafdes mines ­ ­ ­ ­ ­her on foldan. Cyninc ys me ­ ­ ­ ­ ­Iuda cuð;

⁸ is me Moab ­ ­ ­ ­ ­mines hyhtes hwer, and ic aðenige eac ­ ­ ­ ­ ­on Idumea, min gescy sende, ­ ­ ­ ­ ­and me syððan gedo Allophilas ­ ­ ­ ­ ­ealle gewylde.”

⁹ Hwylc gelædeð me ­ ­ ­ ­ ­leofran on ceastre weallum beworhte? ­ ­ ­ ­ ­hwa wyle swylce me in Idumea ­ ­ ­ ­ ­eac gelædan?

¹⁰ Ac ne eart þu se sylfa God, ­ ­ ­ ­ ­ðe us swa drife? ne ga ðu us on mægene, ­ ­ ­ ­ ­mihtig Drihten.

¹¹ Syle us nu on earfoðum ­ ­ ­ ­ ­æðelne fultum, forðon hælu byð ­ ­ ­ ­ ­her on eorðan manna gehwylces ­ ­ ­ ­ ­mægene idel.

¹² Us sceal mægenes gemet ­ ­ ­ ­ ­mihtig Drihten soðfæst syllan, ­ ­ ­ ­ ­and he sona mæg ure fynd gedon ­ ­ ­ ­ ­fracoþe to nahte.