Sealm 58 - Anglo-Saxon Psalms c.890-950 ADSealm 57 1 Gif ge soð sprecan symble wyllen, demað manna bearn domum rihtum. 2 Eft ge on heortan hogedon inwit, worhton wraðe; forþan ðæs wite eft on eowre handa hefige geeode. 3 Ge firenfulle fremde wurdon, syððan hi on worlde wæron acende and heo on life lygeword spæcon. 4 Yrre heom becume anlic nædran, ða aspide ylde nemnað; seo hi deafe deð, dytteð hyre earan, 5 þæt heo nele gehyran heahgaldor sum þæt snotre men singað wið attrum. 6 God heora toðas grame gescæneð, þa hi on muðe mycle habbað; tolyseð leona mægen lungre Drihten. 7 Ac hi forweorðan wætere gelicost, þonne hit yrnende eorðe forswelgeð; swa his bogan bendeð, oðþæt bitere eft adl on seteð, swa his geearnuncg byð. 8 Swa weax melteð, gif hit byð wearmum neah fyre gefæstnad, swa heo feallað on þæt; hi sunnan ne geseoð syððan æfre. 9 Ær ðon eowre treowu telgum blowe, wæstmum weaxe, ær him wol becimeð, þæt heo beoð on yrre ealle forswelgene. 10 Soðfæst blissað, þonne he sið ongan, hu þa arleasan ealle forweorðað, and his handa ðwehð on hæþenra and þæra fyrenfulra fæcnum blode. 11 And þonne man cweþeð on his modsefan: þis is wæstm wises and goodes, þe his soðfæst weorc symble læste; hi on eorðan God ealle gedemeð. |
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.
British & Foreign Bible Society