Sealm 57 - Anglo-Saxon Psalms c.890-950 AD

Sealm 56

¹ Miltsa min, God, ­ ­ ­ ­ ­and me milde weorð, for þon min sawel on þe ­ ­ ­ ­ ­swyðe getryweð, and ic on fægerum scuan ­ ­ ­ ­ ­fiðera ðinra gewicie, ­ ­ ­ ­ ­oð þæt gewite forð and unriht me ­ ­ ­ ­ ­eall beglide.

² Heonan ic cleopige ­ ­ ­ ­ ­to heahgode and to wealdend Gode, ­ ­ ­ ­ ­ðe me wel dyde.

³ He þa of heofenum ­ ­ ­ ­ ­hider onsende þe me alysde, ­ ­ ­ ­ ­laþum wiðferede, sealde on edwit ­ ­ ­ ­ ­þe me ær trædan. Sende mihtig God ­ ­ ­ ­ ­his milde gehigd and his soðfæst mod ­ ­ ­ ­ ­samod ætgædere,

⁴ and mine sawle ­ ­ ­ ­ ­sona alysde of leon hwelpum ­ ­ ­ ­ ­reðe gemanan; wæs ic slæpende ­ ­ ­ ­ ­sare gedrefed. Synd me manna bearn ­ ­ ­ ­ ­mihtigum toðum wæpenstrælas, ­ ­ ­ ­ ­þa me wundedon; wæron hyra tungan getale ­ ­ ­ ­ ­teonan gehwylcre and to yfele gehwam ­ ­ ­ ­ ­ungemet scearpe.

⁵ Ahefe þe ofer heofenas, ­ ­ ­ ­ ­halig Drihten; is wuldur ðin ­ ­ ­ ­ ­wide and side ofer ðas eorþan ­ ­ ­ ­ ­ealle mære.

⁶ Fotum heo minum ­ ­ ­ ­ ­fæcne grine grame gearwodon, ­ ­ ­ ­ ­and geornlice mine sawle ­ ­ ­ ­ ­swyðe onbigdon. Hi deopne seað ­ ­ ­ ­ ­dulfon widne, þær ic eagum ­ ­ ­ ­ ­on locade, and hi on ðone ylcan ­ ­ ­ ­ ­eft gefeollan.

⁷ Gearo is min heorte ­ ­ ­ ­ ­þæt ic Gode cweme; gearo is min heorte ­ ­ ­ ­ ­þæt ic Gode swylce sealmas singe, ­ ­ ­ ­ ­soðword sprece.

⁸ Aris, wuldur min, ­ ­ ­ ­ ­wynpsalterium, and ic on ærmergene ­ ­ ­ ­ ­eac arise and min hearpe ­ ­ ­ ­ ­herige Drihten.

⁹ Ic þe on folcum ­ ­ ­ ­ ­frine Drihten ecne andete, ­ ­ ­ ­ ­eac geond þeode sealmas singe ­ ­ ­ ­ ­swiðe geneahhige.

¹⁰ Forðon þin mildheortnes ­ ­ ­ ­ ­is mycel wið heofenas, is ðin soðfæstnes ­ ­ ­ ­ ­swylce wið wolcnum.

¹¹ Ahafen þu eart ofer heofenas, ­ ­ ­ ­ ­halig Drihten; is ofer ealle ­ ­ ­ ­ ­eorðan swylce þines wuldres wlite ­ ­ ­ ­ ­wide and side.