Sealm 55 - Anglo-Saxon Psalms c.890-950 AD

Sealm LIV (55)

¹ Gehyr min gebed, ­ ­ ­ ­ ­halig Drihten, ne forseoh æfre ­ ­ ­ ­ ­sariges bene;

² beheald me holdlice ­ ­ ­ ­ ­and gehyr me eac. Grimme ic eom begangen; ­ ­ ­ ­ ­forðon ic gnornige and me forhtige ­ ­ ­ ­ ­feondes stefne and fyrenfulra ­ ­ ­ ­ ­fæcne niðas.

³ For ðam me on sah ­ ­ ­ ­ ­unrihtes feala; wurdon me þa on yrre ­ ­ ­ ­ ­yfele and hefige.

⁴ Ys me on hreðre heah ­ ­ ­ ­ ­heorte gedrefed and me fealleðon ­ ­ ­ ­ ­fyrhtu deaðes.

⁵ Egsa me and fyrhtu ­ ­ ­ ­ ­ealne forcwomon, and me beþeahton ­ ­ ­ ­ ­þeostru niðgrim.

⁶ Ic þa on mode cwæð, ­ ­ ­ ­ ­hwa me sealde to fleogenne ­ ­ ­ ­ ­fiðeru swa culfran, and ic þonne ricene ­ ­ ­ ­ ­reste syððan.

⁷ Efne ic feor gewite, ­ ­ ­ ­ ­fleame dæle, and on westene ­ ­ ­ ­ ­wunode lange,

⁸ bide þæs beornes ­ ­ ­ ­ ­þe me bete eft modes mindom ­ ­ ­ ­ ­and mægenes hreoh.

⁹ Hat nu todælan, ­ ­ ­ ­ ­Drihten usser, heora geðeode ­ ­ ­ ­ ­geond þas woruld wide; forðon ic þær on unriht ­ ­ ­ ­ ­oft locade, and wiðercwyda ­ ­ ­ ­ ­wearn gehyrde;

^10-11 drugon þæt on burgum ­ ­ ­ ­ ­dæges and nihtes. Þunie him gewinnes wearn ­ ­ ­ ­ ­ofer wealles hrof and heom on midle wese ­ ­ ­ ­ ­mān and inwit and unsoðfæstnys ­ ­ ­ ­ ­ealle wealde. Næfre on his weorþige ­ ­ ­ ­ ­wea aspringe, mearce mansceat, ­ ­ ­ ­ ­man inwides;

¹² for þon gif me min feond ­ ­ ­ ­ ­fæcne wyrgeð, ic þæt abere ­ ­ ­ ­ ­bliðe mode. Þeah þe þa ealle ­ ­ ­ ­ ­ðe me a feodon, wordum wyrigen ­ ­ ­ ­ ­and wearn sprecan, ic me wið heora hete ­ ­ ­ ­ ­hyde sneome.

¹³ Þu eart se man ­ ­ ­ ­ ­þe me wære on anmede, ­ ­ ­ ­ ­and æghwæs cuð latteow lustum; ­ ­ ­ ­ ­

¹⁴ and wyt gelome eac æton swetne mete ­ ­ ­ ­ ­samed ætgædere, and on Godes huse ­ ­ ­ ­ ­gangan swylce mid geþeahtunge ­ ­ ­ ­ ­þine and mine.

¹⁵ Hi ofer cume ­ ­ ­ ­ ­unþinged deað, astigon heo on helle ­ ­ ­ ­ ­heonan lifigende. For ðam on heora gasthusum ­ ­ ­ ­ ­is gramlic inwit, and on hiora midle ­ ­ ­ ­ ­man inwitstæf.

¹⁶ Ic soðlice ­ ­ ­ ­ ­to sylfum Drihtne cleopode on corðre, ­ ­ ­ ­ ­and me cuðlice gehyrde ­ ­ ­ ­ ­hælend Drihten.

¹⁷ Ic on æfenne ­ ­ ­ ­ ­eac on mergenne and on midne dæg ­ ­ ­ ­ ­mægene sæcge and bodie ­ ­ ­ ­ ­þæt þu bliðe me mine stefne ­ ­ ­ ­ ­stiðe gehyre.

¹⁸ A ðu symle ­ ­ ­ ­ ­sawle mine lustum alyse, ­ ­ ­ ­ ­laðum wiðferige, for ðon me manige ymb ­ ­ ­ ­ ­mægene syrewað.

¹⁹ Þæt gehyreð God ­ ­ ­ ­ ­and hi gehyneð eac, þe ær worulde wæs ­ ­ ­ ­ ­and nu wunað ece. Nis him onwendednes ­ ­ ­ ­ ­on woruldlife, ne him Godes fyrhtu ­ ­ ­ ­ ­georne ondrædað.

²⁰ Heo besmitað ­ ­ ­ ­ ­swylce his sylfes þa gewitnesse, ­ ­ ­ ­ ­þær hi woh fremedon; for ðon hi synt on yrre ­ ­ ­ ­ ­ut adælde, ne hi sylfe wel ­ ­ ­ ­ ­geseon æfre, for ðon hit wæs his heortan ­ ­ ­ ­ ­gehygde neah.

²¹ Hi word hira ­ ­ ­ ­ ­wel gesmyredon ele anlicast; ­ ­ ­ ­ ­eft gewurdon on gescotfeohta ­ ­ ­ ­ ­scearpe garas.

²² Sete on Drihten ­ ­ ­ ­ ­þin soð gehygd; he þe butan fracoðum ­ ­ ­ ­ ­fedeð syððan. Ne syleð he soðfæstum ­ ­ ­ ­ ­syððan to feore þæt him yþende mod ­ ­ ­ ­ ­innan hreðre;

²³ ðu arlease ­ ­ ­ ­ ­ealle gelædest on soðe forwyrd ­ ­ ­ ­ ­seaðes deopes. Se blodhreowa wer ­ ­ ­ ­ ­bealuinwites fæcne gefylled ­ ­ ­ ­ ­ne fæger lif on middum feore ­ ­ ­ ­ ­gemeteð ahwær; ic me on minne Drihten ­ ­ ­ ­ ­deorne getreowige.