Sealm 53 - Anglo-Saxon Psalms c.890-950 AD

Sealm LII (53)

¹ On his heortan cwæð ­ ­ ­ ­ ­unhydig sum, ungleawlice, ­ ­ ­ ­ ­þætte God nære; heo onsceoniendlice ­ ­ ­ ­ ­syndon gewordene and heora willan ­ ­ ­ ­ ­wraðe besmitene. Næs þa gōddoend ­ ­ ­ ­ ­se þe gōd wiste, ne an furðum ­ ­ ­ ­ ­ealra wære.

² Þa of heofenum beseah ­ ­ ­ ­ ­halig Drihten ofer manna bearn, ­ ­ ­ ­ ­hwæðer his mihta ða andgyt ænig ­ ­ ­ ­ ­ealra hæfde, oððe God wolde ­ ­ ­ ­ ­georne secan.

³ Ealle heo on ane ­ ­ ­ ­ ­idelnesse symle besegan; ­ ­ ­ ­ ­þa wæs soð nan mann þe gōd wolde ­ ­ ­ ­ ­georne wyrcan; ne an furþum ­ ­ ­ ­ ­ealra wære.

⁴ Ac ge þæs ealle ne magon ­ ­ ­ ­ ­andgyt habban þe unrihtes ­ ­ ­ ­ ­elne wyrceað and min folc fretað ­ ­ ­ ­ ­swa fælne hlaf, ne hio God wyllað ­ ­ ­ ­ ­georne ciegan;

⁵ þær hio forhtigað, ­ ­ ­ ­ ­frecnes egesan æniges ne þurfon. For þam manna ban ­ ­ ­ ­ ­mihtig Drihten liste tosceadeð, ­ ­ ­ ­ ­þa him liciað; beoð þa gehyrwede þe ­ ­ ­ ­ ­forhycggeað God.

⁶ Hwylc Israela ­ ­ ­ ­ ­ece hælu syleð of Sione ­ ­ ­ ­ ­nymðe sylfa God, þonne he his folc ­ ­ ­ ­ ­fægere alyseð of hæftnyde, ­ ­ ­ ­ ­halig Drihten? Þonne Iacob byð ­ ­ ­ ­ ­on glædum sælum and Israelas ­ ­ ­ ­ ­ealle bliðe.