Sealm 4 - Anglo-Saxon Psalms c.890-950 AD

Sealm IV

¹ Þonne ic cleopode to þe, þonne gehyrdest þu me, Drihten, for ðam þu eart se ðe me gerihtwisast, and on minum earfoðum and nearonessum þu me gerymdest. Gemiltsa me, Drihten, and gehyr min gebed.

² Eala, manna bearn, hu lange wylle ge beon swa heardheorte wið gōde, and hwi lufige ge idelnesse and secað leasuncga?

³ Wite ge þæt God gemyclade his ðone gehalgodan, and he me gehyrð þonne ic him to clypige.

⁴ Þeah hit gebyrige þæt ge on woh yrsien, ne scule ge hit no þy hraþor þurhteon, þe læs ge syngien; and þæt unriht þæt ge smeagað on ewerum mode, forlætað and hreowsiað þæs.

⁵ Offriað ge mid rihtwisnesse, and bringað þa Gode to lacum, and hopiað to Drihtne.

⁶ Manig man cwyð: “Hwa tæcð us teala, and hwa sylð us þa gōd þe us man gehæt?” And is, þeah, geswutelod ofer us þin gifu, þeah hi swa ne cweðen.

⁷ Þæt ys, þæt þu sealdest blisse minre heortan, and þin folc gemicladest, and him sealdest geniht hwætes and wines and eles and ealra gōda, þeah hi his ðe ne ðancien.

⁸ Ac gedo nu þæt ic mote on þam genihte and on þære sibbe slapan and me gerestan, for ðam þu, Drihten, synderlice me gesettest on blisse and on tohopan.