Sealm 38 - Anglo-Saxon Psalms c.890-950 AD

Sealm 37

¹ Drihten, ne þrea þu me, ne ne þrafa on þinum yrre, ne on þinre hatheortnesse ne witna ðu me,

² for þam þine flana synt afæstnad on me (þæt synt, þa earfoðu þe ic nu þolie), and þu gestrangodes þine handa ofer me.

³ Nis nan hælo on minum flæsce for þære andweardnesse þines yrres, ne nan sib ne nan rest nis minum banum beforan þære ansyne minra synna,

⁴ for þæm min unriht me hlypð nu ofer heafod, and swa swa hefig byrðen hy synt gehefegode ofer me.

⁵ Mina wunda rotedan and fuledon for minum dysige.

⁶ Ic eom swiðe earm geworden, and ic eom fulneah gebiged to ende; ælce dæge ic gange inn unrot.

⁷ For þæm eall min lichama is full flæsclicra lusta, for þam nis nan hælo on minum flæsce.

⁸ Ac ic eom gesæged and gehnæged and swiðe geeaðmed; and ic grymetige and stene swiþe swiðlice mid ealle mode.

⁹ Drihten, Drihten, þu wast nu eall hwæs ic wilnie; eall hit ys beforan ðe, and min granung þe nis na forholen.

¹⁰ Min heorte is gedrefed and min mod oninnan me, for þæm min mægen and min strengo and min cræft me hæfð forlæten, and þæt leoht and seo scearpnes minra eagena, þe ic ær hæfde, nis nu mid me swa swa ic hy geo hæfde.

¹¹ Mine frynd and mine magas and mine neahgeburas synt nu gemengde wið mine fynd, and standað nu mid him ongean me, and synt me nu toweardes; and þa þe me nyhst wæran, þa ic orsorgost wæs, standað me nu swiðe feor and wyrceað woh.

¹² Þa þe me hefigiað and mine sawle seceað - hu hy magon yfel don - sprecað idelnesse and smeagað facn ælce dæge.

¹³ Ic þonne swa swa deaf, dyde swylce ic hit ne gehyrde, and swugode swa swa se dumba þe næfre his muð ne ontynð.

¹⁴ Ic wæs geworden swylce se mann þe nanwuht ne gehyrð, ne on his muðe næfð nane rihtandsware.

¹⁵ For þam ic hopode to þe, Drihten, and cwæð to þe: “Gehyr ðis, Drihten, and andswara him.”

¹⁶ For þæm ic symle bæd þæt næfre mine fynd ne gefægen æfter me, þy læs hi mægen sprecan ungemetlico word ongean me, gif hy geseon þæt mine fet slidrien.

¹⁷ For þæm ic eom nu to swingellan gearu, and min sar ys symle beforan me,

¹⁸ for þæm ic andette Gode min unriht and ic þence ymbe mine synna.

¹⁹ Gyt libbað mine fynd and synt strengran þonne ic, and synt swiðe gemanigfealdode þa þe me mid unrihte hatiað.

²⁰ Þa ðe me gyldað yfel mid goode, hy me tælað for þy ic sece riht.

²¹ Ne forlæt me, Drihten, min God, ne ne gewit fram me,

²² ac beseoh me to fultume, Drihten God, min hælend.