Sealm 36 - Anglo-Saxon Psalms c.890-950 AD

Sealm 35

¹ Se unrihtwisa cwyþ on his mode þæt he wylle syngian. For þam Godes ege nis beforan his eagum,

² for þæm he deð swiðe facenlice beforan his ansyne; ac his unriht and his feoung wurð, þeah, swiðe open.

³ Þa word his muðes beoð unriht and facen; he nyle ongitan þæt he cunne wel don;

⁴ unriht he byð smeagende on his cliofan. He stent on ælcum yflum wege; ne hatað he nan yfel.

⁵ Drihten, þin mildheortnes is on heofonum, and þin rihtwisnes is upp oð þa wolcnu.

⁶ Þin rihtwisnes is swa heah swa þa heofonlican muntas, and þine domas synt swa deope swa swa æfgrynde oþþe seo deoposte sæ. Menn and nytenu þu gehælst, Drihten.

⁷ Hu wundorlice þu gemanigfealdodest þine mildheortnesse, Drihten. Manna bearn soðlice symle hopiað to þæm sceade þinra fiðera,

⁸ and hy beoð oferdrencte on þære genihte þines huses, and on þære æ þines willan þu hy drencst,

⁹ for þæm mid þe is lifes wylle, and of þinum leohte we beoð onlihte.

¹⁰ Læt forð þine mildheortnesse þam þe þe witon, and þine rihtwisnesse þam þæ synt rihtes modes.

¹¹ Ne læt þu me oftredan þa ofermodan under heora fotum, and þara synfullena handa me na ne styrien,

¹² ac under heora fet and under heora handa gefeallen ealle þa þe unriht wyrcen and him þæt licað; hy synt aworpene, þæt hi ne magon standan.