Sealm 33 - Anglo-Saxon Psalms c.890-950 AD

Sealm 32

¹ Blissiað, ge rihtwisan, on Godes gifum; rihte hit gerist þæt hine ealle rihtwillende emnlice herian.

² Heriað hine mid hearpum and on þære tynstrengean hearpan.

³ Singað him niwne sang, and heriað hine swyþe wel mid heare stemne,

⁴ for þæm his word synd swyþe riht and ealle his weorc synt getreowe.

⁵ He lufað mildheortnesse and rihte domas; mid his mildheortnesse he gefylð ealle eorðan.

⁶ Mid his worde synt getrymede heofonas, and þurh þone gast his muðes synt eall heofona mægn.

⁷ He gegaderode eall sæwætru tosomne swylce hi wæron on anum cylle; he gesette þone garsecg on his goldhorde.

⁸ Ondræde hine eall eorðe: fram him beoð onstyred ealle gesceafta and ealle þa þe on eorðan buiað.

⁹ For þæm he cwæð his willan, þa wæs he geworden. He bebead his willan; þa wæron ealle gesceafta gesceapene.

¹⁰ Se Drihten tostencð þa geþeaht yfelwillendra kynna, and he forsyhð þa geþohtas þara folca, and eac yfelra ealdormanna geþeaht he forsyhð.

¹¹ Ac Godes geþeaht wunað on ecnesse, and geþoht his modes a weorulda weoruld.

¹² Eala, eadig byþ þæt kynn þe swylc gōd byð heora God, and eadig byð þæt folc þe se Drihten gecyst him to yrfeweardnesse.

¹³ Drihten locað of heofonum and gesihð eall manna bearn.

¹⁴ Of his þam wlitegan temple he wlit ofer ealle þa þe ealre eorðan ymbhwyrft buiað,

¹⁵ for þam he gesceop heora heortan, ælces synderlice, and he ongit heora ealra weorc.

¹⁶ Ne wyrð nan kyning næfre gehæled þurh his agen mægen, ne se gigant ne wyrð na gehæled on þære mycelnesse his mægenes.

¹⁷ Þi byð swiðe dysig se þe getruwað on his horses swiftnesse, for þæm hit is swiðe leas tohopa; for þæm nawþer ne ðam horse ne þæm rædemen ne wyrð geborgen of his agnum cræftum.

¹⁸ Symle beoð Godes eagan open ofer þa ðe hine ondrædað, and ofer þa þe hopiað to his mildheortnesse,

¹⁹ for þam þæt he gefriðie heora sawla fram deaðe and hi fede on hungres tide.

²⁰ Hopiað nu to Drihtne ure sawla, for þam he ys ure friðigend and ure gescyldend,

²¹ and on hine blissiað ure heortan and to his halgan naman we hopiað.

²² Sy, Drihten, þin mildheortnes ofer us swa swa we gehyhtað on þe.