Sealm 30 - Anglo-Saxon Psalms c.890-950 AD

Sealm 29

¹ Ic fægnige, Drihten, and þe herige, for þam þu me gefriðadest, and þu ne lete mine fynd min fægnian.

² Drihten, min God, ic clypode to þe, and þu me gehældest,

³ and atuge mine sawle of neolnessum and of helle, and me gehældest fram þæra geferscipe þe feollon on pytt.

⁴ Heriað nu Drihten ealle his halige, and andetað þæt gemynd his halignesse,

⁵ for þam open wracu ys on his yrsunga, and soð lif on þam, þæt man wrece his willan. Þeah we wepon on æfen, he gedeð þæt we hlihhað on morgen.

⁶ Ic cwæð on minum wlencum and on minre orsorhnesse: “Ne wyrð þises næfre nan wendincg,”

⁷ for þam þu me sealdest on ðinum goodan willan wlite and mægen. Þa awendest þu þinne andwlitan fram me, þa wearð ic sona gedrefed.

⁸ Þa clypode ic eft to þe and gebæd me to minum Drihtne and cwæð:

⁹ “Drihten, hu nyt is þe min slæge, oþþe min cwalu oððe min rotung on byrgenne? Hwæðer þe þæt dust herige on þære byrgene, oþþe hwæðer hit cyðe þine rihtwisnesse?”

¹⁰ Þa gehyrde Drihten þa word and gemildsade me; he wearð me to fultume.

¹¹ Drihten, þu gehwyrfdest minne heaf and mine seofunga me to gefean; þu totære min witehrægl, and þu me begyrdst mid gefean.

¹² For þam hit ys cyn þæt min wuldor and min gylp þe herige, þæt ic ne wurðe gedrefed. Drihten, min God, on ecnesse ic þe herige.