Sealm 3 - Anglo-Saxon Psalms c.890-950 ADSealm III 1 Eala, Drihten, hwi synt swa manige minra feonda, þara þe me swencað; for hwi arisað swa mænige wið me? 2 Monige cweðað to minum mode þæt hit næbbe nane hæle æt his Gode. 3 Ac hit nis na swa hy cweðað, ac þu eart butan ælcum tweon, min fultum and min wuldor, and þu ahefst upp min heafod. 4 Mid minre stemne ic cleopode to Drihtne and he me gehyrde of his þam halgan munte. 5 Þa ongan ic slapan, and slep, and eft aras, for ðam þe Drihten me awehte and me upparærde. 6 For ðam ic me nu na ondræde þusendu folces, þeah hi me utan ymbþringen. 7 Ac ðu, Drihten, aris and gedo me halne, for þam þu eart min God. 8 For ðam þu ofsloge ealle þa ðe me wiðerwearde wæron butan gewyrhton, and þara synfulra mægen þu gebryttest, for ðam on ðe ys eall ure hæl and ure tohopa; and ofer þin folc sy þin bletsuncg. |
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.
British & Foreign Bible Society