Sealm 27 - Anglo-Saxon Psalms c.890-950 AD

Sealm 26

¹ Drihten is min onlyhtend and min hælend: hwæt þearf ic ondrædan? Drihten is scyldend mines lifes: hwy sceal ic beon afærd?

² Þonne me to genealæhton mine fynd me to derianne, swylce hi woldon fretan min flæsc, þa þe me swencton, hi wæron sylfe geuntrumode and gefeollon.

³ Þeah hi nu gyt wyrcen getruman and scyldridan wið me, ne byð min heorte nawuht afæred; þeah hi arisan ongean me to feohtanne, to þam Gode ic hopie þe me ær gefreode.

⁴ [Line 1 missing] and geseon Godes willan, and þone ongitan; and he me gefriðie on his þam halgan temple.

⁵ For þam he me gehydde on his temple - on þam yflan dagum he me gefriðode on þam sceade his geteldes and his temples - and he me ahof upp on heane stan,

⁶ and huru nu hæfð min heafod uppahafen ofer mine fynd, for þæm ic ymbhweorfe þin þæt halige tempel, Drihten, and þær offrige on þinum huse þa offrunga; sangas ic singe, and secge Gode lof.

⁷ Gehyr, Drihten, mine stefne, mid þære ic clypige to þe; gemiltsa me and gehyr me.

⁸ To þe cwyð min heorte: “Ic sohte þine ansyne; ic sece gyt symle, Drihten.”

⁹ Ne awend þu þine ansyne fram me, ne þe næfre yrringa acyr fram þinum þeowe. Þu eart min fultumend, Drihten: ne forlæt me, ne ne forseoh me, Drihten, min hælend.

¹⁰ For þam min fæder and min modor me forleton, ac Drihten me ne forlet.

¹¹ Gesete me æ, Drihten, on þinum wege, and gerece me on rihtne pæð fore minum feondum,

¹² and ne syle me to þara modes willan þe min ehtað, for ðam arison ongean me lease gewitnessa, and heora leasung wæs gecyrred to heom sylfum.

¹³ Ic gelyfe þæt ic geseo Godes good on libbendra lande.

¹⁴ Hopa nu, min mod, to Drihtne, and gebid his willan, and do esnlice, and gestaþela and gestranga þine heortan, and geþola Drihtnes willan.