Sealm 25 - Anglo-Saxon Psalms c.890-950 AD

Sealm XXIV (25)

¹ To þe ic hæbbe, Drihten, min mod and mine sawle.

² Drihten, min God, to þe ic hopige, and ic þæs næfre ne sceamige; ne mine fynd me næfre for ðy ne bysmrian,

³ ne nan þæra þe to þe hopað ne wyrð gescended. Scamien heora ealle þa unrihtwisan þe idelnesse wyrcað.

⁴ Drihten, gedo me þine wegas cuðe, and lær me þine paðas.

⁵ Geræd me and gerece on þinre soðfæstnesse, and lær me, for þam þu eart, Drihten, min hælend; ælce dæge ic anbidige þines fultumes.

⁶ Gemun, Drihten, þinra miltsunga and þinre mildheortnesse þe fram fruman worlde wæs.

⁷ Þa scylda mines iugoðhades ne gemun þu, Drihten, ne huru þa þe ic ungewisses geworhte (þæt synt, þa þe ic wende þæt nan scyld nære), ac for þinre myclan mildheortnesse beo þu min gemyndig, Drihten. For þinre gōdnesse,

⁸ Drihten, þu eart swete and wynsum and eac rihtwis. For þam gesette God æ scyldiendum on heora wegum,

⁹ and geriht þa manðwæran on domum, and him getæceð his wegas.

¹⁰ Ealle Godes wegas syndon mildheortnes and rihtwisnes ælcum þæra þe his æ secað and his bebodu lufiað.

¹¹ Drihten, for þinum naman beo þu forgifende mina synna, for þy hi synt swyðe mycele.

¹² Swa hwylc mann swa Drihten ondræt, he him geset þa æ, and him sylð þæt geþeaht on þone weg þe heora ægðrum licað, ge Gode ge eac þam men.

¹³ His sawl hi gerest softe on monegum goodum, and his sæd on ece yrfeweardnesse gesit eorðan.

¹⁴ Drihten is mægen and cræft ælces þæra þe hine ondræt, and he him getæcð eallum his willan.

¹⁵ Symle lociað mine eagan to Gode, for þam he alysð mine fet of gryne.

¹⁶ Geloca to me, Drihten, and gemiltsa me, for þam ic eom ana forlæten, yrming.

¹⁷ And þa earfoðu minre heortan synd swyðe tobræd and gemanigfealdod; gedo for þi, Drihten, þæt þu me gefriðie æt minre nydþearfe.

¹⁸ Geseoh mine eaðmetto and mine earfoða, and forgif ealle mine scylda.

¹⁹ And geseoh eac mine fynd, for þam hi synt swyþe gemanigfealdode, and geseoh hu unrihtlice hi me hatiað.

²⁰ Geheald mine sawle and gefriða me, þæt me ne sceamie þæs þe ic to þe clypige.

²¹ Þa unsceðfullan and þa rihtwisan, þa þe begangað, coman to me, wendon þæt me sceolde cuman sum fultum and sum frofor fram þe, for þam ic symle þæs anbidode and wilnode and wende æt þe, Drihten.

²² Gefriða me, Drihten, Israela God, of eallum minum nearonessum.