Sealm 19 - Anglo-Saxon Psalms c.890-950 AD

Sealm 18

¹ Heofonas bodiað Godes wuldor, and his handgeweorc bodiað þone rodor.

² Se dæg segð þam oðrum dæge Godes wundru, and seo niht þære nihte cyð Godes wisdom.

³ Nis nan folc on eorðan ne nan mennisc geþeode þe ne gehyre mistlica Godes gesceafta.

⁴ Ofer ealle eorðan færð heora stemn, ofer ealle eorðan endas heora word. Drihten timbrede his templ on þære sunnan;

⁵ seo sunne arist swiðe ær on morgen up, swa swa brydguma of his brydbure. And heo yrnð swa egeslice on hyre weg, swa swa gigant yrnð on his weg.

⁶ Heo stihð oð þæs heofenes heanesse, and þanon astihð, and swa yrnð ymbutan oð heo eft þyder cymð; ne mæg hine nan man behydan wið hire hæto.

⁷ Godes æ is swiðe unleahtorwyrðe, for þæm heo hwyrfð manna mod and heora sawla to Gode; Godes bebod is swiðe getrywe.

⁸ Godes rihtwisnessa synt swiðe rihta, for ðæm hy geblissiað manna heortan; Godes bebod is swiðe leoht: hit onliht þa eagan ægþer ge modes ge lichaman.

⁹ Godes ege is swiðe halig: he þurhwunað a worlda world. Godes domas synt swiðe soðe: hi synt gerihtwisode on him sylfum.

¹⁰ Hy synt ma to lufianne þonne gold oððe deorwurðe gimmas, and hi synt swetran ðonne hunig oððe beobread.

¹¹ For þæm ðin ðeow hi hylt - on heora gehyldnesse is mænig edlean.

¹² Hwa ongyt his uncysta? From þæm ðe me beholen synt, geclænsa me, Drihten;

¹³ and from ælðeodegum feondum spara me, þinne ðeow, Drihten. Gif mine fynd ne ricsiað ofer me, þonne beo ic unwemme and beo geclænsod from þæm mæstum scyldum; ac gif hi me abysgiað, þonne ne mæg ic smeagan mine unscylda, ne eac ðinne willan ne mæg smeagan to wyrcanne.

¹⁴ Gif ðu me þonne fram him alyst, ðonne sprece ic þæt þe licað, and mines modes smeaung byð symle beforan ðinre ansyne. Drihten, þu eart min fultum and min alysend.