Sealm 148 - Anglo-Saxon Psalms c.890-950 AD

Sealm 148

¹ Heriað ge on heofenum ­ ­ ­ ­ ­hælend Drihten, heriað hlude ­ ­ ­ ­ ­on heanessum.

² Heriað hine ealle ­ ­ ­ ­ ­engla ðreatas, lofige hine swylce ­ ­ ­ ­ ­eall his leodmægen.

³ Herigen hine swylce ­ ­ ­ ­ ­sunna and mona, æghwylc steorra ­ ­ ­ ­ ­and þæt æðele leoht.

⁴ Heofenas hine heofena ­ ­ ­ ­ ­herian georne, and þa wæter swylce ­ ­ ­ ­ ­ðe ofer wolcnum synt on heofenhame, ­ ­ ­ ­ ­herigen Drihten.

⁵ Forðon he sylfa cwæð, ­ ­ ­ ­ ­sona wærun wræclice geworht ­ ­ ­ ­ ­wætera ðryþe, and gesceapene wærun, ­ ­ ­ ­ ­þa he sylfa het.

⁶ Þa he on ecnesse ­ ­ ­ ­ ­eall staðelade and on worulda woruld ­ ­ ­ ­ ­wolde healdan; he sette bebod, ­ ­ ­ ­ ­syþþan heo þæt heoldon.

⁷ Herigen dracan swylce ­ ­ ­ ­ ­Drihten of eorðan, and ealle neowelnessa ­ ­ ­ ­ ­herian naman Drihtnes.

⁸ Fyr, forst, hægel ­ ­ ­ ­ ­and gefeallen snaw, is and yste, ­ ­ ­ ­ ­ealra gastas þe his word willað ­ ­ ­ ­ ­wyrcean georne,

⁹ Muntas and geswyru, ­ ­ ­ ­ ­micle beamas, þa þe mæst and wæstm ­ ­ ­ ­ ­mannum bringað, and on eallum cedrum ­ ­ ­ ­ ­ciið alæded,

¹⁰ Deor and neat, ­ ­ ­ ­ ­do þæt sniome; nifle nædran cynn ­ ­ ­ ­ ­be naman ealle, and fugla cynn ­ ­ ­ ­ ­fiðerum gescyrped,

¹¹ Eorðcyningas eac ­ ­ ­ ­ ­ealle swylce þe folcum her ­ ­ ­ ­ ­fore wisien and ealdormen ­ ­ ­ ­ ­ahwær syndan, and ealle þe þas eorþan ­ ­ ­ ­ ­ahwær demeð.

¹² Beon ge, hægestealdas ­ ­ ­ ­ ­and glade fæmnan, ealde and geonge ­ ­ ­ ­ ­ealle ætsamne; herian naman Drihtnes ­ ­ ­ ­ ­mid neodlofe.

¹³ For þon his anes nama ­ ­ ­ ­ ­ofer ealle is ahafen healice ­ ­ ­ ­ ­hæleða ealra; is upp ahafen ­ ­ ­ ­ ­his andetness heah ofer myclum ­ ­ ­ ­ ­heofone and eorðan.

¹⁴ He horn hefecð ­ ­ ­ ­ ­holdes folces, he lofe leohteð ­ ­ ­ ­ ­leofe þa halgan; wese awa frið ­ ­ ­ ­ ­on Israhela fælum folce, ­ ­ ­ ­ ­and hi forð heonan on his neaweste ­ ­ ­ ­ ­neode wunian.