Sealm 147 - Anglo-Saxon Psalms c.890-950 AD

Sealms 146-147

¹ Heriað Drihten, ­ ­ ­ ­ ­he is heah and good; singað him sealmas ­ ­ ­ ­ ­swiðe geneahhe and hine wlitegum ­ ­ ­ ­ ­wordum herigeað.

² Eft Hierusalem ­ ­ ­ ­ ­georne Drihten timbreð tidum, ­ ­ ­ ­ ­and to somnað þa þe ut gewitan ­ ­ ­ ­ ­of Israhelum.

³ Se hæleð eac ­ ­ ­ ­ ­heortan geðræste and heora unrotnesse ­ ­ ­ ­ ­ealle gewriðeð.

⁴ He recene mæg ­ ­ ­ ­ ­riman steorran and þa neodlice ­ ­ ­ ­ ­be naman sona full cuðlice ­ ­ ­ ­ ­cigean ealle.

⁵ Micel is ure ­ ­ ­ ­ ­mihtig Drihten, and his mægen is micel ­ ­ ­ ­ ­and mihtum strang; ne his snytru mæg ­ ­ ­ ­ ­secgean ænig, on þyssum ealdre ­ ­ ­ ­ ­æfre ariman.

⁶ Milde mode ­ ­ ­ ­ ­and manþwære he onfehð fægere, ­ ­ ­ ­ ­and fyrenfulle wið eorðan niþer ­ ­ ­ ­ ­ealle gehnegeð.

⁷ Onginnað ge Drihtne ­ ­ ­ ­ ­geare andettan, singað gode urum ­ ­ ­ ­ ­gleawe be hearpan,

⁸ Se þe heofen þeceð ­ ­ ­ ­ ­hadrum wolcnum and regn þanon ­ ­ ­ ­ ­recene sendeð þe þeos eorðe fram ­ ­ ­ ­ ­æfter groweð.

⁹ He of beorgum ut ­ ­ ­ ­ ­blæde lædeð, hig to helpe ­ ­ ­ ­ ­hæleða bearnum, Se þe mete syleð ­ ­ ­ ­ ­manegum neatum, hrefnes briddum, ­ ­ ­ ­ ­þonne heo hropende him cigeað to, ­ ­ ­ ­ ­cuðes æses.

¹⁰ Nafast ðu to manna ­ ­ ­ ­ ­mægene willan, ne þe on þinum selegescotum ­ ­ ­ ­ ­swiðe licað, þeah þe weras wyrcean ­ ­ ­ ­ ­wræst on eorðan.

¹¹ Ac wel licað ­ ­ ­ ­ ­wuldres Drihtne, þa þe hine him ondrædað ­ ­ ­ ­ ­dædum and wordum, and on his milde mod ­ ­ ­ ­ ­mægene gewenað.

¹² Herige Hierusalem ­ ­ ­ ­ ­georne Drihten, here þu, Sion, swylce ­ ­ ­ ­ ­þinne soðne god.

¹³ For þon he getrymede ­ ­ ­ ­ ­wið teonhete, þæt þu þine doru mihtest ­ ­ ­ ­ ­bedon fæste, and gebletsade ­ ­ ­ ­ ­bearna æghwylc þe on innan þe ­ ­ ­ ­ ­ahwær wæren.

¹⁴ He þine gemæru ­ ­ ­ ­ ­gemiclade, þu on utlandum ­ ­ ­ ­ ­ahtest sibbe, and þe gesadade ­ ­ ­ ­ ­mid þy selestan hwætecynnes ­ ­ ­ ­ ­holde lynde.

¹⁵ He his spræce hider ­ ­ ­ ­ ­spowendlice on þas eorðan ­ ­ ­ ­ ­ærest sendeð, and his word yrneð ­ ­ ­ ­ ­wundrum sniome.

¹⁶ He snaw sendeð ­ ­ ­ ­ ­samed anlice swa þu wulle flys ­ ­ ­ ­ ­wolcnum bringe, and þone toweorpeð ­ ­ ­ ­ ­wide swa æscean.

¹⁷ He his cristallum ­ ­ ­ ­ ­cynnum sendeð swylc swa hlafgebrece ­ ­ ­ ­ ­of heofon wolcnum; for andwlitan celes ­ ­ ­ ­ ­þær ænig ne mæg him standan ­ ­ ­ ­ ­stiðe mode.

¹⁸ He his word sendeð ­ ­ ­ ­ ­þuruh windes gast; blaweð beorhtlice, ­ ­ ­ ­ ­burnan floweð and to wætere ­ ­ ­ ­ ­weorðeð sniome.

¹⁹ He his word eac ­ ­ ­ ­ ­ær mid wisdome godum Iacobe ­ ­ ­ ­ ­geara foresægde, and Israhele ­ ­ ­ ­ ­eac his domas.

²⁰ Ne dyde he ahwær swa ­ ­ ­ ­ ­eldran cynne, þæt he him his domas ­ ­ ­ ­ ­digle gecydde.