Sealm 145 - Anglo-Saxon Psalms c.890-950 AD

Sealm 144

¹ Ic me heahne god ­ ­ ­ ­ ­hæbbe to kyninge, and ic naman þinne ­ ­ ­ ­ ­neode herige on ecnesse ­ ­ ­ ­ ­awa to worulde.

² Þuruh syndrige dagas ­ ­ ­ ­ ­symble ic ðe bletsige, and naman þinne ­ ­ ­ ­ ­neode herige on ecnesse ­ ­ ­ ­ ­awa to worulde.

³ Mycel is Drihten, ­ ­ ­ ­ ­hine man mægene sceal holde mode ­ ­ ­ ­ ­herian swiðe; nis his micelmodes ­ ­ ­ ­ ­mægenes ende.

⁴ Cneorissa kynn ­ ­ ­ ­ ­cwidum symble þin weorc herigen ­ ­ ­ ­ ­wordum georne, and þine mihte eac ­ ­ ­ ­ ­micle sæcgeon.

⁵ Mycel mod and strang ­ ­ ­ ­ ­þines mægenðrymmes and þine halignesse ­ ­ ­ ­ ­holdes modes wise wordum sprecað, ­ ­ ­ ­ ­weredum secggeað eall þin wundur ­ ­ ­ ­ ­wide mære.

⁶ And hi mægen swylce ­ ­ ­ ­ ­mære and egeslic þinra wundra ­ ­ ­ ­ ­wislic sæcgen and þine mægenstrengðu ­ ­ ­ ­ ­mærsien wide.

⁷ Gemune þines modes ­ ­ ­ ­ ­þa miclan geniht, þinre weðnesse ­ ­ ­ ­ ­wise sæcgenum roccette ­ ­ ­ ­ ­and ræd sprece, and þine soðfæstnesse ­ ­ ­ ­ ­sæcge geneahhe.

⁸ Mildheort is Drihten ­ ­ ­ ­ ­and mannþwære and geþyldig eac, ­ ­ ­ ­ ­þearle mildheort.

⁹ Swylce eallum is ­ ­ ­ ­ ­ure Drihten manna cynne ­ ­ ­ ­ ­milde and bliðe; syndan his miltsa ­ ­ ­ ­ ­ofer us mære weorc eall yldum cuð ­ ­ ­ ­ ­awa to feore.

¹⁰ Andetten þe, Drihten, ­ ­ ­ ­ ­ealle þine weorc and þe þine þa halgan ­ ­ ­ ­ ­her bletsien.

¹¹ And hi þine mihte ­ ­ ­ ­ ­manna bearnum cyþan mid cynnum ­ ­ ­ ­ ­and mid cneorissum, þines mægenþrymmes ­ ­ ­ ­ ­mære wuldur riht and reðe ­ ­ ­ ­ ­rices þines.

¹² Þæt þu cuð gedydest ­ ­ ­ ­ ­ofer cneorisse, þær synd manna bearn ­ ­ ­ ­ ­manig ætsomne, and þæt þin miht is ­ ­ ­ ­ ­ofer middaneard and þines rices ­ ­ ­ ­ ­rædfæst wuldur.

¹³ Rice is þin, Drihten, ­ ­ ­ ­ ­ræde gefæstnod, and þu woruldricum ­ ­ ­ ­ ­wealdest eallum; is þin anweald eac ­ ­ ­ ­ ­ofer eorðware of cynne on cynn ­ ­ ­ ­ ­and on cneorissum. Drihten is on wordum ­ ­ ­ ­ ­dædum getreowe and on eallum his weorcum ­ ­ ­ ­ ­wis and halig.

¹⁴ Ahefeð halig God ­ ­ ­ ­ ­þa ðe hreosað ær, and he ealle areceð ­ ­ ­ ­ ­earme gebrocene.

¹⁵ Eagan on þe ­ ­ ­ ­ ­ealra, Drihten, wisra gewenað ­ ­ ­ ­ ­wiste to genihte, and þu him mete sylest ­ ­ ­ ­ ­mæla gehwylce and þæs tidlice ­ ­ ­ ­ ­tid gemearcast.

¹⁶ Onhlidest ðu þine handa ­ ­ ­ ­ ­and hi hraðe fyllest, ealra wihta gehwam ­ ­ ­ ­ ­wis bletsunga.

¹⁷ Soðfæst is Drihten ­ ­ ­ ­ ­on his sylfes wegum eallum on eorðan, ­ ­ ­ ­ ­and he æfter þan on his weorcum is ­ ­ ­ ­ ­wis and halig.

¹⁸ Neah is Drihten ­ ­ ­ ­ ­niþum eallum þe hine mid soðe hige ­ ­ ­ ­ ­seceað and ciegað and his willan her ­ ­ ­ ­ ­wyrceað georne

¹⁹ and his ege swylce ­ ­ ­ ­ ­elne ræfnað; he heora bene ­ ­ ­ ­ ­bealde gehyreð and hi hrædlice gedeð ­ ­ ­ ­ ­hale sona.

²⁰ Ealle gehealdeð ­ ­ ­ ­ ­halig Drihten þe lufan wið hine ­ ­ ­ ­ ­lustum healdeð, and he synfulle ­ ­ ­ ­ ­swylce todrifeð geond widwegas ­ ­ ­ ­ ­wearaum ealle.

²¹ Sceal lof Drihtnes ­ ­ ­ ­ ­on lust sprecan min muð mannum ­ ­ ­ ­ ­mæla gehwylce, and flæsca gehwylc ­ ­ ­ ­ ­þurh fæle word his þone haligan naman ­ ­ ­ ­ ­her bletsian on ecnesse ­ ­ ­ ­ ­awa to feore.