Sealm 141 - Anglo-Saxon Psalms c.890-950 AD

Sealm 140

¹ Ic þe, Drihten, to ­ ­ ­ ­ ­dyrum clypige; gehyr me hrædlice ­ ­ ­ ­ ­holdre stefne, þonne ic bene to þe ­ ­ ­ ­ ­bidde ceare full.

² Sy on þinre gesihþe ­ ­ ­ ­ ­mines sylfes gebed ful recene gereht, ­ ­ ­ ­ ­swa ricels byð, þonne hit gifre ­ ­ ­ ­ ­gleda bærnað. Swylce is ahafenes ­ ­ ­ ­ ­handa minra, þonne ic þe æfenlac ­ ­ ­ ­ ­estum secge.

³ Sete swæse geheald ­ ­ ­ ­ ­swylce, Drihten, muðe minum, ­ ­ ­ ­ ­ne læt man sprecan, and æþele dor ­ ­ ­ ­ ­ymbstandende, þæt on welerum ­ ­ ­ ­ ­wisdom healde.

⁴ Ne hyld þu mine heortan, ­ ­ ­ ­ ­þæt ic hearme word þuruh inwitstæf ­ ­ ­ ­ ­ut forlæte, and ic lædend wese ­ ­ ­ ­ ­laðra firena. Ne ic æfre mid mannum ­ ­ ­ ­ ­manfremmendum gemænnesse ­ ­ ­ ­ ­micle hæbbe, ne on heora gecorenesse ­ ­ ­ ­ ­becume æfre.

⁵ Ac me soðfæst ­ ­ ­ ­ ­symble gerecce and mildheorte ­ ­ ­ ­ ­mode þreage; ele synfulra ­ ­ ­ ­ ­æfre ne mote heafde minum ­ ­ ­ ­ ­hrinan ahwær. For þon min gebed nu gyt ­ ­ ­ ­ ­becnum standeð, þæt him on wisum is ­ ­ ­ ­ ­wel lycendlice;

⁶ syndon hi æt strangum ­ ­ ­ ­ ­stane forswolgene; noldan heora deman ­ ­ ­ ­ ­mine gedefe word earan gehyran, ­ ­ ­ ­ ­eft ne mihton.

⁷ Swa unefne is ­ ­ ­ ­ ­eorþe þicce, syndon þas moras ­ ­ ­ ­ ­myclum asprotene, swa ure ban syndon ­ ­ ­ ­ ­bitere toworpene be helwarena ­ ­ ­ ­ ­hæfteneodum.

⁸ For þon ic, Drihten, on þe ­ ­ ­ ­ ­dædum minum eagum and mode ­ ­ ­ ­ ­æghwær gelyfe; ne ascuf þu fram me ­ ­ ­ ­ ­sawle mine.

⁹ Geheald me wið þare gryne ­ ­ ­ ­ ­þe me grame setton, þæt me ne beswice ­ ­ ­ ­ ­synwyrcende, þa þe unrihtes ­ ­ ­ ­ ­æghwær þenceað.

¹⁰ Feallað firenfulle ­ ­ ­ ­ ­on heora fengnettum; ic me syndrig eom, ­ ­ ­ ­ ­oþ þæt ic swa fere.