Sealm 140 - Anglo-Saxon Psalms c.890-950 AD

Sealm 139

¹ Genere me wið niþe ­ ­ ­ ­ ­on naman þinum fram yfelum menn, ­ ­ ­ ­ ­ece Drihten, and fram þam were, ­ ­ ­ ­ ­þe wom fremme.

² Þa ealne dæg ­ ­ ­ ­ ­inwit and facen hycgeað on heortan ­ ­ ­ ­ ­þurh hearme geþoht, hi þæt to gefeohte georne ­ ­ ­ ­ ­gefremed habbað.

³ And heora tungan ­ ­ ­ ­ ­torncwidum neode serwað, ­ ­ ­ ­ ­swa oft nædran doð, and him aspidas, ­ ­ ­ ­ ­ætrene wyrmas, under welerum is ­ ­ ­ ­ ­gewunad fæste.

⁴ Geheald þu me, Drihten, ­ ­ ­ ­ ­wið heteniðas and wið firenfulles ­ ­ ­ ­ ­folmum swylce, and fram þam mannum ­ ­ ­ ­ ­þe man fremmen, alys þu me lungre, ­ ­ ­ ­ ­lifes ealdur.

⁵ Þa on hyge þohtan, ­ ­ ­ ­ ­þæt hi ahyltan me and minne gang ­ ­ ­ ­ ­georne swylce, forhyddan oferhygde me ­ ­ ­ ­ ­inwitgyrene, wraðan wealsadan ­ ­ ­ ­ ­wundnum rapum; woldan mine fotas ­ ­ ­ ­ ­gefæstnian, settan me swyce, ­ ­ ­ ­ ­þær ic siþade.

⁶ Ic þa to Drihtne cwæð: ­ ­ ­ ­ ­“þu me eart dyre god; gehyr min gebed, ­ ­ ­ ­ ­halig Drihten, nu ic stefne to þe ­ ­ ­ ­ ­styrme hlude.”

⁷ Drihten, Drihten, ­ ­ ­ ­ ­þu eart gedefe mægen hælo minre, ­ ­ ­ ­ ­and þu min heafod scealt on gefeohtdæge ­ ­ ­ ­ ­feondum awergean.

⁸ Ne alyf þu me æfre ­ ­ ­ ­ ­ofer lust minne on fyrenfulra ­ ­ ­ ­ ­fæcne geðancas, þa wiðerwearde me ­ ­ ­ ­ ­wraðe hycgeað; ne forlæt þu me ­ ­ ­ ­ ­on lifdagum, þy læs hi ahafene ofer me ­ ­ ­ ­ ­hwile weorðen.

⁹ Him ymb heafod ­ ­ ­ ­ ­hefegast gewinna, þæt hi mid welerum ­ ­ ­ ­ ­geworht habbað, him þæt ilce sceal ­ ­ ­ ­ ­on gesittan.

¹⁰ Eac hi feallað ­ ­ ­ ­ ­on fyres glede, and þu hi mid fyre ­ ­ ­ ­ ­facnes gehnegest, þæt hi þam yrmðum ­ ­ ­ ­ ­a ne wiðstanden.

¹¹ Se getynga wer ­ ­ ­ ­ ­on teosuspræce, ne bið se ofer eorþan ­ ­ ­ ­ ­gereaht ahwær; unsoðfæstne wer ­ ­ ­ ­ ­yfel gecnysseð, oþþe he on eorðan ­ ­ ­ ­ ­eall forweorðeð.

¹² Ic þæt gearuwe ongeat, ­ ­ ­ ­ ­þæt gode deð Drihten domas, ­ ­ ­ ­ ­þe on dagum þyssum wædlum weorðað, ­ ­ ­ ­ ­wreceð þearfendra.

¹³ Soð is hwæðere, ­ ­ ­ ­ ­soðfæste nu þinne naman willað ­ ­ ­ ­ ­þuruh neod herigean; scylan eard niman ­ ­ ­ ­ ­on þinre ansyne, þa mid ræde her ­ ­ ­ ­ ­rihte lifigeað.