Sealm 139 - Anglo-Saxon Psalms c.890-950 AD

Sealm 138

¹ Þu min costadest ­ ­ ­ ­ ­cynnum, Drihten, and me ongeate ­ ­ ­ ­ ­gleawe mode;

² þu min setl ­ ­ ­ ­ ­swylce oncneowe, and minne ærist ­ ­ ­ ­ ­æfter gecyðdest. And mine geðohtas eac ­ ­ ­ ­ ­þriste oncneowe, feorran ongeate ­ ­ ­ ­ ­fore mine,

³ and mine gangas ­ ­ ­ ­ ­gearwe atreddest and ealle mine wegas ­ ­ ­ ­ ­wel foresawe,

⁴ for þan me inwit næs ­ ­ ­ ­ ­ahwær on tungan. Efne þu, Drihten, ­ ­ ­ ­ ­eall oncneowe

⁵ þa ærestan, ­ ­ ­ ­ ­eac þa nehstan; þu me gehiwadest ­ ­ ­ ­ ­handa þinre, me ofer heafod ­ ­ ­ ­ ­holde gesettest.

⁶ Wundorlic is geworden ­ ­ ­ ­ ­þin wisdom eall, se is beutan me ­ ­ ­ ­ ­eac gestrangod; ne mæg ic him on neode ­ ­ ­ ­ ­a neah cuman.

⁷ Hwider mæg ic fram þinum gaste ­ ­ ­ ­ ­gangan ahwær, oþþe þinne andwlitan befleon ­ ­ ­ ­ ­eorðan dæles?

⁸ Gif ic on heofenas up ­ ­ ­ ­ ­hea astige, þu me þær on efn ­ ­ ­ ­ ­andweard sittest; gif ic on helle gedo ­ ­ ­ ­ ­hwyrft ænigne, þu me æt byst ­ ­ ­ ­ ­efne rihte.

⁹ Gif ic mine fiðeru gefo, ­ ­ ­ ­ ­fleoge ær leohte, oþ þæt ic beutan wese ­ ­ ­ ­ ­eallum sæwum,

¹⁰ Hwæt, me þin hand þyder ­ ­ ­ ­ ­ofer holma begang lædeð lustum, ­ ­ ­ ­ ­and me lungre eft þin seo swiðre ­ ­ ­ ­ ­þær gehendeð.

¹¹ Ic on mode cwæð ­ ­ ­ ­ ­minum swylce: “wen is, þæt me þystru ­ ­ ­ ­ ­ðearle forgripen and me on nihte ­ ­ ­ ­ ­neode onlihte, þæt ic minum bleom ­ ­ ­ ­ ­bregde neahhige.”

¹² Ne beoð þeostru deorc ­ ­ ­ ­ ­butan þinre miht; þurh þa onlihtest niht, ­ ­ ­ ­ ­þæt heo byð dæge gelic. Swa þragum gæð ­ ­ ­ ­ ­þeostru wið leohte, for þon þu hi settest ­ ­ ­ ­ ­swylce, Drihten;

¹³ canst mine ædre ­ ­ ­ ­ ­ealle gearuwe, onfenge me fægere, ­ ­ ­ ­ ­swa ic furðum wæs of modur hrife ­ ­ ­ ­ ­minre acenned.

¹⁴ Ic þe andette, ­ ­ ­ ­ ­ece Drihten, for þon þu mid egesan eart ­ ­ ­ ­ ­eall gewuldrad, and þine weorc wæron ­ ­ ­ ­ ­wræclice swyþe, þa min saul oncneow ­ ­ ­ ­ ­sona georne.

¹⁵ Nis min ban wib þe ­ ­ ­ ­ ­deope behyded, þæt þu wislice ­ ­ ­ ­ ­worhtest on diglum, þeh min lichama ­ ­ ­ ­ ­lytle ðrage on niðerdælum ­ ­ ­ ­ ­eorðan wunige.

¹⁶ Eagan þine gesawon ­ ­ ­ ­ ­þæt ic ealles wæs unfrom on ferhþe; ­ ­ ­ ­ ­eall þæt forð heonan on þinum wisbocum ­ ­ ­ ­ ­awriten standeð. Dagas syndon trymede, ­ ­ ­ ­ ­swa hi Drihten gesceop; ne mæg ænig on þam ­ ­ ­ ­ ­awa lifigean; me synd arwyrðe ­ ­ ­ ­ ­ealle swiðe,

¹⁷ þe þine frynd wærun ­ ­ ­ ­ ­fæste, Drihten, is heora ealdordom ­ ­ ­ ­ ­ungemete swiðe on cneorissum ­ ­ ­ ­ ­cuð gestrangod.

¹⁸ Gif ic hi recene nu ­ ­ ­ ­ ­riman onginne, hi beoð ofer sandcorn ­ ­ ­ ­ ­sniome manige; syþþan ic arise ­ ­ ­ ­ ­and recene nu gyt mid þe sylfum eom, ­ ­ ­ ­ ­

¹⁹ gif þu syþþan wylt þa firenfullan ­ ­ ­ ­ ­fyllan mid deaðe. Blodhreowe weras, ­ ­ ­ ­ ­ge bebugað me,

²⁰ þe þæt on geþohtum ­ ­ ­ ­ ­þenceað cweðende: “Wutun þurh idel searu ­ ­ ­ ­ ­ealle tiligean, þæt we heora burh ­ ­ ­ ­ ­tobrecan moton.”

²¹ Ealle þa þe feodan ­ ­ ­ ­ ­þurh facen god, ic hi feode nu ­ ­ ­ ­ ­fæste mid niðe, and ofer þine feondas beo ­ ­ ­ ­ ­facne gebolgen.

²² Swa ic hi mid rihte ­ ­ ­ ­ ­recene feoge, for þon hi me feondas ­ ­ ­ ­ ­fæcne wurdan.

²³ Costa min, god, ­ ­ ­ ­ ­swa hit cyn wese, and minre heortan gehygd ­ ­ ­ ­ ­her gesceawa, þone fælan geþanc; ­ ­ ­ ­ ­frine me syþþan and mine stige ongit ­ ­ ­ ­ ­gestaðelode.

²⁴ And þu sylfa geseoh, ­ ­ ­ ­ ­gif ic on swiculne weg oþþe on unrihte ­ ­ ­ ­ ­ahwær eode; gelæd me þonne, ­ ­ ­ ­ ­lifes ealdor, þæt ic on ecne weg ­ ­ ­ ­ ­æghwær gange.