Sealm 138 - Anglo-Saxon Psalms c.890-950 AD

Sealm 137

¹ Ic þe andette, ­ ­ ­ ­ ­ecne Drihten, on minre gehygde ­ ­ ­ ­ ­heortan ealre; for ðon þu ealle mine word ­ ­ ­ ­ ­earum gehyrdest, þa ic mid muðe ­ ­ ­ ­ ­and mid mode cweðe, and on þinra engla ­ ­ ­ ­ ­ealra gesihðe ic þe singe ­ ­ ­ ­ ­swiðe geneahhige.

² Eac ic þin tempel ­ ­ ­ ­ ­tidum weorðige, þæt halige hus, ­ ­ ­ ­ ­holde mode, and þær þinne naman ­ ­ ­ ­ ­on neod secge. Ofer þine þa miclan ­ ­ ­ ­ ­mildheortnesse and soðfæstnesse ­ ­ ­ ­ ­samed ætgædere, þu þinne þone halgan naman ­ ­ ­ ­ ­neode gedydest, ofer us ealle ­ ­ ­ ­ ­æghwær micelne.

³ Swa hwylce daga ­ ­ ­ ­ ­ic þe deorne cige, gehyr me hwætlice, ­ ­ ­ ­ ­and me hraðe gedo micle mine sawle ­ ­ ­ ­ ­on þines mægenes sped.

⁴ Ealle þe andettan ­ ­ ­ ­ ­eorðan kyningas, for ðon þe hi gehyrdon ­ ­ ­ ­ ­hlude reorde þines muðes ­ ­ ­ ­ ­þa mæran word;

⁵ þa on sangum ­ ­ ­ ­ ­singan Drihtne. For þon þin wuldur is ­ ­ ­ ­ ­wide geond eorðan

⁶ micel and mære, ­ ­ ­ ­ ­ofer middaneard eart þu healice ­ ­ ­ ­ ­ahafen, Drihten; þu eadmodra ­ ­ ­ ­ ­ealra locast on heofonhame ­ ­ ­ ­ ­her on eorðan.

⁷ Þeah þe ic on midle ­ ­ ­ ­ ­mānes gange, þær me costunga ­ ­ ­ ­ ­cnyðdan geneahhe, a þu me weredest ­ ­ ­ ­ ­wraþum feondum þe me woldan yrre ­ ­ ­ ­ ­on acyðan; þu me geræhtest ­ ­ ­ ­ ­recene mid handa and me þin swyðre ­ ­ ­ ­ ­sneome hælde.

⁸ Drihten for me ­ ­ ­ ­ ­dome gylde, is his mildheortnes ­ ­ ­ ­ ­mycel on worulde; ne forseoh æfre, ­ ­ ­ ­ ­þæt þu sylfa ær mid þinum handum ­ ­ ­ ­ ­her geworhtest.