Sealm 136 - Anglo-Saxon Psalms c.890-950 AD

Sealm 135

¹ Ic andette ­ ­ ­ ­ ­ecum Drihtne, for ðon he gōd is, ­ ­ ­ ­ ­and ic ful gearwe wat, þæt he to worulde byð ­ ­ ­ ­ ­wis and mildheort.

² Eac ic andette ­ ­ ­ ­ ­þam þe ece is ealra gōdena God, ­ ­ ­ ­ ­for ðon ic hine gōdne wat.

³ Andette ic swylce ­ ­ ­ ­ ­þam þe ealra is drihtna Drihten ­ ­ ­ ­ ­dædum spedigast, for ðon he gōd is, ­ ­ ­ ­ ­and ic gearwe wat, þæt his mildheortnes ­ ­ ­ ­ ­is mycel to worulde.

⁴ He wundur dyde ­ ­ ­ ­ ­weorþlic ana;

⁵ se heofon worhte, ­ ­ ­ ­ ­hæleða andgit.

⁶ He eorðan æfter wæter ­ ­ ­ ­ ­ærest sette.

⁷ He leohtfatu ­ ­ ­ ­ ­leodum ana micel geworhte ­ ­ ­ ­ ­manna bearnum,

⁸ Sette on miht dæges ­ ­ ­ ­ ­mære sunnan,

⁹ On miht nihte ­ ­ ­ ­ ­monan and steorran.

¹⁰ He Ægyptas sloh ­ ­ ­ ­ ­and eall heora frumbearn,

¹¹ And he Israhelas ­ ­ ­ ­ ­ealle oðlædde of Ægyptum ­ ­ ­ ­ ­ealle gesunde,

¹² On mihtigre ­ ­ ­ ­ ­mære handa and on eallmihte ­ ­ ­ ­ ­earmes swylce.

¹³ He readne sæ ­ ­ ­ ­ ­recene todælde,

¹⁴ lædde Israhelas ­ ­ ­ ­ ­ealle þurh midne.

¹⁵ Þær Pharaon gefeol, ­ ­ ­ ­ ­and his fæge werud on þam readan sæ ­ ­ ­ ­ ­recene forwurdan.

¹⁶ He gewealdendlice ­ ­ ­ ­ ­þuruh westen eft his þæt leofe folc ­ ­ ­ ­ ­lædde swylce. He of stanclife ­ ­ ­ ­ ­stearce burnan leodum lædde ­ ­ ­ ­ ­on leofne þanc.

¹⁷ Swylce he acwealde ­ ­ ­ ­ ­cyningas mycle.

¹⁸ And he eac ofsloh ­ ­ ­ ­ ­æðele cyningas, weras wræclice, ­ ­ ­ ­ ­þa þe weoruld heoldan.

¹⁹ Þær Seon cyning ­ ­ ­ ­ ­swylt dreorig fornam, þe Amorrea ­ ­ ­ ­ ­anweald hæfde,

²⁰ And Og swylce, ­ ­ ­ ­ ­þe æror wæs swyþe breme cyning ­ ­ ­ ­ ­on Basane.

²¹ Sealde heora eorþan ­ ­ ­ ­ ­on yrfeland,

²² And þæt yrfe ­ ­ ­ ­ ­on Israele, þe his esnas ­ ­ ­ ­ ­agene wæron.

²³ For þon ure eaðmedu ­ ­ ­ ­ ­ece Drihten gemyndgade, ­ ­ ­ ­ ­and us mycel sealde.

²⁴ And he us aferede ­ ­ ­ ­ ­feondum of handa, þa ðe wraðe ­ ­ ­ ­ ­wæron ealle.

²⁵ He eac afedeð ­ ­ ­ ­ ­flæscea æghwylc.

²⁶ Andetað nu ealle ­ ­ ­ ­ ­þam ecean Gode, þe on heofonum is ­ ­ ­ ­ ­heah eardiende. And ge ealra gōdena Gode ­ ­ ­ ­ ­geara andettað, for þan his mildheortnes ­ ­ ­ ­ ­is mycel to worulde.