Sealm 135 - Anglo-Saxon Psalms c.890-950 AD

Sealm 134

¹ Heriað naman Drihtenes, ­ ­ ­ ­ ­neode swylce herigen hine his scealcas ­ ­ ­ ­ ­swiðe ealle.

² Ge þe on Godes huse ­ ­ ­ ­ ­gleawe standað and on cafertunum ­ ­ ­ ­ ­Cristes huses þæs gōdan Godes ­ ­ ­ ­ ­gearwe syndan,

³ Lofiað ge Drihten, ­ ­ ­ ­ ­for þon he lungre is fæstræd and fremsum ­ ­ ­ ­ ­fira æghwam; weorðiað his naman, ­ ­ ­ ­ ­for þon he wyrðe is.

⁴ For ðon him gōdne geceas ­ ­ ­ ­ ­Iacob Drihten and on agene æht ­ ­ ­ ­ ­Israeles cynn.

⁵ Ic þæt gearwe ongeat, ­ ­ ­ ­ ­þæt is god and mycel Drihten ure; ­ ­ ­ ­ ­for þon him dom standeð ofer ealle godu ­ ­ ­ ­ ­eorðbuendra.

⁶ Ealle þa þe wolde, ­ ­ ­ ­ ­worhte Drihten on heofonrice ­ ­ ­ ­ ­and her on eorðan, on sidum sæ ­ ­ ­ ­ ­swylce on eallum, þær he dyrne wat ­ ­ ­ ­ ­deorce grundas.

⁷ And he fram þysse eorðan ­ ­ ­ ­ ­ende lædeð wolcen wræclicu, ­ ­ ­ ­ ­wind and liget, and þa to regne ­ ­ ­ ­ ­recene wyrceð, Þe forð lædeð ­ ­ ­ ­ ­fægere windas of his goldhordum ­ ­ ­ ­ ­godra manegum;

⁸ se Ægipta sloh ­ ­ ­ ­ ­æðele frumbearn æghwylc ealra ­ ­ ­ ­ ­oð þa nytenu.

⁹ He sigetacen ­ ­ ­ ­ ­sende manegum forebeacn fæle ­ ­ ­ ­ ­folce Ægipta, and þa Pharaones ­ ­ ­ ­ ­folce gecyðde and his scealcum ­ ­ ­ ­ ­samed ætgædere.

¹⁰ Se sloh þeode folc ­ ­ ­ ­ ­þearle manige, and eac acwealde ­ ­ ­ ­ ­cyningas strange.

¹¹ Wæs Seon efne ­ ­ ­ ­ ­sum þara kynincga, and Og kyning, ­ ­ ­ ­ ­se þe æror wæs on Basane ­ ­ ­ ­ ­breme and mære.

¹² Sealde heora eardland ­ ­ ­ ­ ­eall Israhelum and heora yrfe ­ ­ ­ ­ ­eac his folce.

¹³ Ys þin nama, Drihten, ­ ­ ­ ­ ­nemned ece, and þin gemynd, ­ ­ ­ ­ ­mihtig Drihten, on ealra worulda woruld ­ ­ ­ ­ ­wynnum standeð.

¹⁴ For þon his folc demeð ­ ­ ­ ­ ­fægere Drihten, and he bið on his esnum ­ ­ ­ ­ ­agenum frefriend.

¹⁵ Beoð deofolgyld ­ ­ ­ ­ ­dysigra þeoda gold and seolfur, ­ ­ ­ ­ ­þe her geotað menn, and mid heora folmum ­ ­ ­ ­ ­fægere wyrceað.

¹⁶ Þa muð habbað, ­ ­ ­ ­ ­and ne meldiað wiht, fægere eagan, ­ ­ ­ ­ ­ne magon feor geseon.

¹⁷ Earan habbað, ­ ­ ­ ­ ­ne hi awiht magon holdes gehyran, ­ ­ ­ ­ ­þeah ðe him hleoðrige, and nose habbað, ­ ­ ­ ­ ­nawiht gestincað. Handa hi habbað, ­ ­ ­ ­ ­ne hi hwæðere magon gegrapian ­ ­ ­ ­ ­godes awiht; habbað fet swylce, ­ ­ ­ ­ ­ne magon feala gangan. Ne hi on hracan awiht ­ ­ ­ ­ ­hlude ne cleopiað, ne him gast warað ­ ­ ­ ­ ­gomum on muðe.

¹⁸ Synt anlice þæm ­ ­ ­ ­ ­þe hi ær worhtan, and ealle þa ðe on hi ­ ­ ­ ­ ­æfre getreowað.

¹⁹ Hus Israela ­ ­ ­ ­ ­holdne Drihten bletsien bealde, ­ ­ ­ ­ ­biddan swylce þæt Aarones hus ­ ­ ­ ­ ­ecne Drihten bliðe bletsien; ­ ­ ­ ­ ­beornas ealle,

²⁰ þa on Lifes hus ­ ­ ­ ­ ­leof eardiað, bletsien Drihten ­ ­ ­ ­ ­bliðe mode. Þa þe him ondræden ­ ­ ­ ­ ­Drihtnes egsan, bletsien Drihten ­ ­ ­ ­ ­beornas ealle;

²¹ se Drihten is ­ ­ ­ ­ ­deore gebletsad of Sion sniome, ­ ­ ­ ­ ­þe soðfæst ær on Hierusalem ­ ­ ­ ­ ­god eardode.