Sealm 132 - Anglo-Saxon Psalms c.890-950 AD

Sealm 131

¹ Gemune þu, Drihten, ­ ­ ­ ­ ­mærne Dauid and ealle his mannþwærnesse ­ ­ ­ ­ ­micle and goode.

² Swa ic æt frymðe geswor ­ ­ ­ ­ ­ferhðe wið Drihten and gehat gehet, ­ ­ ­ ­ ­he geheold teala wið Iacobes ­ ­ ­ ­ ­god þone mæran.

³ Þeah þe ic on mines huses ­ ­ ­ ­ ­hyld gegange oþþe selegesceot ­ ­ ­ ­ ­þænne swæs wese oððe on min restbedd ­ ­ ­ ­ ­ricene gestige,

⁴ Gif ic minum eagum ­ ­ ­ ­ ­unne slæpes, oþþe minum breawum ­ ­ ­ ­ ­beode hnappunga,

⁵ oþþe ic on þunwange ­ ­ ­ ­ ­þriste gereste, Oþ þæt ic gemete ­ ­ ­ ­ ­mære stowe Drihtne gecorene, ­ ­ ­ ­ ­dyre selegesceot Iacobes Gode ­ ­ ­ ­ ­georne gecweme.

⁶ Efne we þas eall ­ ­ ­ ­ ­on Eufraten sæcgean gehyrdon, ­ ­ ­ ­ ­syððan gemitton forwel manegu ­ ­ ­ ­ ­on wudufeldum.

⁷ We on his selegesceot ­ ­ ­ ­ ­swylce gangað, and þære stowe ­ ­ ­ ­ ­stede ariað þær his fotas ær ­ ­ ­ ­ ­fæste gestodan.

⁸ Aris on þinre reste ­ ­ ­ ­ ­recene, Drihten; þu earce eart ­ ­ ­ ­ ­eallhaligra.

⁹ Synd þine sacerdas ­ ­ ­ ­ ­on soðfæstnesse gōde gegierede, ­ ­ ­ ­ ­and gleawe nu þine þa halgan ­ ­ ­ ­ ­her blissiað.

¹⁰ For þinum agenum ­ ­ ­ ­ ­esne swylce; deorum Dauide ­ ­ ­ ­ ­þu ne do æfre, þæt þu andwlitan ­ ­ ­ ­ ­ut oncyrre þines þæs halgan ­ ­ ­ ­ ­her on eorðan.

¹¹ Þæs deopne að ­ ­ ­ ­ ­Drihten aswor and þone mid soðe ­ ­ ­ ­ ­swylce getrymede, þæt he hine for hole ­ ­ ­ ­ ­ær ne aswore, gehet Dauide, ­ ­ ­ ­ ­swa he him dyde syþþan, Þæt he weorðlicne ­ ­ ­ ­ ­wæstm gesette þe of his innaðe ­ ­ ­ ­ ­agenum cwome, ofer þin heahsetl; ­ ­ ­ ­ ­

¹² gif nu healdað well þines sylfes bearn ­ ­ ­ ­ ­soðe treowa and þa gewitnesse, ­ ­ ­ ­ ­þe ic hig wel lære, Þonne hiora suna ­ ­ ­ ­ ­swylce motan a þysse worulde ­ ­ ­ ­ ­wynnum brucan and on þinum setle ­ ­ ­ ­ ­sittan geneahhe.

¹³ Forðon him Sione geceas ­ ­ ­ ­ ­sylfa Drihten, and him to earde geceas ­ ­ ­ ­ ­ærest æt frymðe.

¹⁴ Þis is min rest, ­ ­ ­ ­ ­þe ic recene nu on worulda woruld ­ ­ ­ ­ ­wunian þence, þær ic eard nime, ­ ­ ­ ­ ­forðon ic hi ær geceas.

¹⁵ His wuduan ic ­ ­ ­ ­ ­wordum bletsige and gesegnade, ­ ­ ­ ­ ­sylle geneahhe heora hungrium ­ ­ ­ ­ ­hlaf to fylle.

¹⁶ Ic his sacerdas ­ ­ ­ ­ ­swylce mid hælu georne gegyrwe, ­ ­ ­ ­ ­and gōde eac his þa halgan her ­ ­ ­ ­ ­habbað blisse.

¹⁷ Þær ic Dauides horn ­ ­ ­ ­ ­deorne bringe, forð gelæde, ­ ­ ­ ­ ­fægre gearuwe byrnende blacern, ­ ­ ­ ­ ­bere for minum criste gecorenum, ­ ­ ­ ­ ­þe ic hine cuðne wat.

¹⁸ Ic his feondas eac ­ ­ ­ ­ ­facne gegyrwe mid scame swiðust; ­ ­ ­ ­ ­ofer hine scir cymeð minra segnunga ­ ­ ­ ­ ­soðfæst blostma.