Sealm 128 - Anglo-Saxon Psalms c.890-950 ADSealm 127 1 Eadige syndon ealle þe him ecne god Drihten ondrædað, and his gedefne weg on hyra lifes tid lustum gangað. 2 Þonne þu þines gewinnes wæstme byrgest, etest oretes, and þu eadig leofast, and þe wel weorðeð on wynburgum. 3 Beoð þines wifes welan gelice, swa on wingearde weaxen berigean, and on þines huses hwommum genihtsum. Synd þine bearn swylce samed anlicast, swa elebeamas æþele weaxen, ymb þinne beod utan blæda standen. 4 Efne swa bið gebletsad beorna æghwylc mann on moldan þe him metodes ege on his dædum Drihten forhtað. 5 Þe of Sionbeorge swylce Drihten bealde bletsige, and þu bruce eac on Hierusalem gōda gehwylces ealle lange dagas lifes þines. 6 And þu þinra bearna bearn sceawige, geseo samed gangan sibb ofer Israhel. |
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.
British & Foreign Bible Society