Sealm 122 - Anglo-Saxon Psalms c.890-950 AD

Sealm 121

¹ Ic on ðyssum eom ­ ­ ­ ­ ­eallum bliðe, þæt me cuðlice to ­ ­ ­ ­ ­acweden syndon, and on Godes hus ­ ­ ­ ­ ­gange syððan.

² Wæron fæststealle ­ ­ ­ ­ ­fotas mine on þinum cafertunum, ­ ­ ­ ­ ­þær ure cyðð wæs, on Hierusalem ­ ­ ­ ­ ­geara ærest.

³ Hierusalem, ­ ­ ­ ­ ­geara ðu wære swa swa cymlic ­ ­ ­ ­ ­ceaster getimbred, þær syndon dælas ­ ­ ­ ­ ­on sylfre hire.

⁴ Þær cneorisse ­ ­ ­ ­ ­cende wæron cynn æfter cynne; ­ ­ ­ ­ ­cuðan þa Drihten and on þære gewitnesse ­ ­ ­ ­ ­wæran Israelas, þe his naman ­ ­ ­ ­ ­neode sceoldon him andetnes ­ ­ ­ ­ ­æghwær habban.

⁵ Oft hi þær on seldon ­ ­ ­ ­ ­sæton æt domum; þu eart ðonne dema, ­ ­ ­ ­ ­Dauides hus, þæt on heofenum siteþ ­ ­ ­ ­ ­heah gestaðelod.

⁶ Biddað eow bealde ­ ­ ­ ­ ­beorhtere sibbe, ða ðe on Hierusalem ­ ­ ­ ­ ­gōde syndan; and geniht agun, ­ ­ ­ ­ ­þa þe neode þe on heora lufun ­ ­ ­ ­ ­lustum healdað.

⁷ Si þe on þinum mægene sib ­ ­ ­ ­ ­mæst and fyrmest, and on þinum torrum wese ­ ­ ­ ­ ­tidum genihtsum.

⁸ For mine broðru ­ ­ ­ ­ ­ic bidde nu, and mine þa neahstan ­ ­ ­ ­ ­nemne swylce þæt we sibbe on ðe ­ ­ ­ ­ ­symble habbon.

⁹ And ic for mines Godes huse ­ ­ ­ ­ ­georne þingie, and to minum Drihtne ­ ­ ­ ­ ­deorum sece, þæt ic gōd æt him ­ ­ ­ ­ ­begitan mote.