Sealm 120 - Anglo-Saxon Psalms c.890-950 AD

Sealm 119

¹ Ic me to Drihtne ­ ­ ­ ­ ­deorum cleopode, þonne me costunga ­ ­ ­ ­ ­cnysdon geneahhe, and he me gehyrde ­ ­ ­ ­ ­holde mode.

² Alys mine sawle, ­ ­ ­ ­ ­lifes Drihten, of þam welerum ­ ­ ­ ­ ­þe wom cweðen, and from þære tungan ­ ­ ­ ­ ­þe teosu wylle.

³ Hwæt bið þe ealles seald ­ ­ ­ ­ ­oþþe eced swa from þære inwitfullan ­ ­ ­ ­ ­yflan tungan?

⁴ Strele beoð scearpe, ­ ­ ­ ­ ­strange and mihtige, syððan of gledon wesað ­ ­ ­ ­ ­gearwe ahyrde.

⁵ Wa me þære wyrde, ­ ­ ­ ­ ­þæt min wynn alæg and min bigengea gewat ­ ­ ­ ­ ­bryce on feorweg; sceal ic eard niman, ­ ­ ­ ­ ­swa me eðe nis, mid Cedaringum; ­ ­ ­ ­ ­

⁶ nis min cyð þær, þe mine sawle ­ ­ ­ ­ ­swiðe beeode.

⁷ Mid þam þe hi sibbe ­ ­ ­ ­ ­swyþost feodan, ic sibbe mid him ­ ­ ­ ­ ­soðe hæfde; þonne ic him spedlice to ­ ­ ­ ­ ­spræce and hi lærde, ðonne me earwunga ­ ­ ­ ­ ­ealle onfuhtan.