Sealm 12 - Anglo-Saxon Psalms c.890-950 ADSealm XI (12) 1 Gehæl me, Drihten, for þam haligdom is nu on þisum tidum fullneah asprungen, and soðfæstnes ys swyðe gelytlod. 2 Idla spræca hi sprecað to heora nyhstum, facen hi sprecað mid heora weolorum, for þam hi nabbað on heora mode þæt hi on heora muðe sprecað, ac þencað yfel, þeah hi hwilum tela cweðen. 3 Ac Drihten towyrpð ealle þa facnesfullan weoloras and þa oferspræcan and þa yfelspræcan tungan. 4 Þa þe teohhiað þæt hi scylen hi sylfe weorðian mid idelre spræce, hy cweðað: “Hwi! ne synt we muðfreo? Hu! ne moton we sprecan þæt we wyllað? Hwæt ondræde we? Hwylc hlaford mæg us forbeodan urne willan?” 5 Ac Drihten cwyð: “for yrðum þæra wædlena and for granunge þæra þearfena ic arise, and hi sette on mine hælo; and ic do swyðe treowlice ymb hy.” 6 Godes word (cwæð Dauid) beoð swiðe soð and swiðe clænu; hy beoð swa hluttur swa þæt seolfor þe byþ seofon siðon amered syþþan se ora adolfen byð. 7 Þu, Drihten, gehælst us and gefreoðast fram heora yfle on ecnesse. 8 Ðeah þa unrihtwisan us utan began on ælce healfe, and heora sy mycle ma þonne ure, þeah þu us tobrædst ongean hy, and wið hi gefriðast. |
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.
British & Foreign Bible Society