Sealm 119 - Anglo-Saxon Psalms c.890-950 AD

Sealm 118 א Aleph

א Aleph

¹ Eadige beoð on wege, ­ ­ ­ ­ ­þa þe unwemme on hiora dryhtnes æ ­ ­ ­ ­ ­deore gangað.

² Eadige beoð swylce, ­ ­ ­ ­ ­þa þe a wyllað his gewitnesse ­ ­ ­ ­ ­wise smeagan, and hine mid ealle ­ ­ ­ ­ ­innancundum heortan hordcofan ­ ­ ­ ­ ­helpe biddað.

³ Ne magon manwyrhtan ­ ­ ­ ­ ­mægene feran on his mærne weg, ­ ­ ­ ­ ­mihtigan Drihtnes.

⁴ Þu þine bebodu ­ ­ ­ ­ ­bealde hete ealle eorðbuend ­ ­ ­ ­ ­elne haldan.

⁵ Ic þæs la wisce, ­ ­ ­ ­ ­þæt wegas mine on ðinum willan ­ ­ ­ ­ ­weorþan gereahte, þæt ic þin agen bebod ­ ­ ­ ­ ­elne healde.

⁶ Ne beo ic þonne on ealdre ­ ­ ­ ­ ­æfre gescynded, gif ic on ealle þine bebodu ­ ­ ­ ­ ­elne locie.

⁷ Ic þe andette, ­ ­ ­ ­ ­ece Dryhten, mid minre heortan ­ ­ ­ ­ ­holde geþance on þan þe ic geleornode ­ ­ ­ ­ ­and gelæstan mæg, þæt ic þine domas ­ ­ ­ ­ ­dædum healde.

⁸ And ic þine soðfæstnysse ­ ­ ­ ­ ­swylce mote on hyge healdan ­ ­ ­ ­ ­þæt þu huru me on ðyssum ealdre ­ ­ ­ ­ ­ænne ne forlæte.

ב Beth

ב Beth

⁹ On hwan mæg se iunga ­ ­ ­ ­ ­on gōdne weg rihtran þe rædran ­ ­ ­ ­ ­ræd gemittan, þonne he þine wisan ­ ­ ­ ­ ­word gehealde?

¹⁰ Ic þe mid ealre ­ ­ ­ ­ ­innancundre heortan sece; ­ ­ ­ ­ ­ne þu huru me fram þinum bebodum ­ ­ ­ ­ ­feor adrife.

¹¹ For ðon ic on minre heortan ­ ­ ­ ­ ­hydde georne, þæt ic þinre spræce ­ ­ ­ ­ ­sped gehealde, þy læs ðe ic gefremme ­ ­ ­ ­ ­fyrene ænige.

¹² Þu eart gebletsud, ­ ­ ­ ­ ­bliþe Dryhten; lær me mid lufan, ­ ­ ­ ­ ­hu ic læste well and ic þine soðfæstnysse ­ ­ ­ ­ ­sweotule cunne.

¹³ Ic on minum welerum ­ ­ ­ ­ ­wordum secge ealles þines muðes ­ ­ ­ ­ ­meahte domas.

¹⁴ And ic on wege swylce ­ ­ ­ ­ ­wynnum gange, þær ic ðine gewitnesse ­ ­ ­ ­ ­wat ful clæne, swa ic ealra welena ­ ­ ­ ­ ­willum bruce.

¹⁵ Swa ic on þine soðfæstnysse ­ ­ ­ ­ ­soðe getreowe, þæt ic ne weorðe ­ ­ ­ ­ ­worda þinra ealra ofergittul ­ ­ ­ ­ ­awa to feore.

¹⁶ Ic on þinre soðfæstnysse ­ ­ ­ ­ ­symble meteode, þæt ic þine wislicu ­ ­ ­ ­ ­word geheolde.

ג Gimel

ג Gimel

¹⁷ Gild þinum esne ­ ­ ­ ­ ­gōde dæde; ic on lifdagum ­ ­ ­ ­ ­lustum healde þinra worda waru ­ ­ ­ ­ ­mid wisdome.

¹⁸ Onwreoh þu mine eagan, ­ ­ ­ ­ ­þæt ic wel mæge on þinre æ ­ ­ ­ ­ ­eall sceawian wundur wræclicu, ­ ­ ­ ­ ­þa þu worhtyst ær.

¹⁹ Ic eom on eorðan ­ ­ ­ ­ ­earm bigenga; ne do þu me dyrne ­ ­ ­ ­ ­þine þa deoran bebodu.

²⁰ Þæt sawul min ­ ­ ­ ­ ­symble wilnað, þæt ic þin soðfæst word ­ ­ ­ ­ ­gesund mote on ealle tid ­ ­ ­ ­ ­elne healdan.

²¹ Þu oferhydige ­ ­ ­ ­ ­ealle þreadest, þa þu awyrgde ­ ­ ­ ­ ­wistest gearuwe and þine bebodu ­ ­ ­ ­ ­efnan noldan.

²² Afyr þu fram me ­ ­ ­ ­ ­facen and edwit, oððe ic oferhydige ­ ­ ­ ­ ­awiht wylle; forðan ic þine gewitnesse ­ ­ ­ ­ ­wylle secan.

²³ Ac nu ealdormenn ­ ­ ­ ­ ­ealle ætgædere sæton on seldum, ­ ­ ­ ­ ­swyþe spræcon, and wið me wraðum ­ ­ ­ ­ ­wordum scirdan; hwæþere þin esne ­ ­ ­ ­ ­elnes teolode, þæt he þine soðe word ­ ­ ­ ­ ­snotur beeode.

²⁴ Me wæs þin gewitnys ­ ­ ­ ­ ­wyrð and getreowe, and ic hi on mode ­ ­ ­ ­ ­metegie georne and me to frofre wat, ­ ­ ­ ­ ­þæt ic forð heonun his soðfæstnysse ­ ­ ­ ­ ­sece georne.

ד Daleth

ד Daleth

²⁵ Ætfealh min sawul ­ ­ ­ ­ ­flore geneahhige; do me æfter þinum wordum ­ ­ ­ ­ ­wel gecwician.

²⁶ Ic þe wegas mine ­ ­ ­ ­ ­wise secge, and þu me gehyrdest ­ ­ ­ ­ ­holde mode; lær me on life, ­ ­ ­ ­ ­hu ic lengest mæge þine soðfæstnysse ­ ­ ­ ­ ­selest gehealdan.

²⁷ Þu me soðfæstnysse weg ­ ­ ­ ­ ­swylce getacna, þæt ic on þinum wundrum ­ ­ ­ ­ ­me wel begange.

²⁸ Min sawl aslep, ­ ­ ­ ­ ­þa me sorh begeat for langunga; ­ ­ ­ ­ ­læt me nu þa on þinum wordum ­ ­ ­ ­ ­weorðan trumne.

²⁹ Afyr fram me ­ ­ ­ ­ ­unryhte wegas, and me on þinre æ geweorþ ­ ­ ­ ­ ­ealles milde.

³⁰ Ic me wise geceas ­ ­ ­ ­ ­wegas soðfæste; ne weorðe ic þinra doma ­ ­ ­ ­ ­gedweled æfre.

³¹ Swa ic fæste ætfealh, ­ ­ ­ ­ ­þæt ic forð heonun þine gewitnysse ­ ­ ­ ­ ­wel geheolde; ne wylt þu me on ealdre ­ ­ ­ ­ ­æfre gescyndan.

³² Nu ic on wisne weg ­ ­ ­ ­ ­worda þinra reðne rinne, ­ ­ ­ ­ ­and þu rice nu mine heortan geheald ­ ­ ­ ­ ­on hyge brade.

ה Hē

ה Hē

³³ Æ þu me sete, ­ ­ ­ ­ ­ece Dryhten, þæt ic on soðfæste wegas ­ ­ ­ ­ ­symble gange and ic þa secan ­ ­ ­ ­ ­symble mote.

³⁴ Syle me andgit eac, ­ ­ ­ ­ ­þæt ic æ þine smeage mid soðe, ­ ­ ­ ­ ­swylce healde on ealre minre heortan ­ ­ ­ ­ ­holde mode.

³⁵ Gelæd me on stige, ­ ­ ­ ­ ­þær ic stæpe mine on þinum bebodum ­ ­ ­ ­ ­bryce hæbbe, forðan ic hy mid soðe ­ ­ ­ ­ ­symble wolde.

³⁶ Ahyld mine heortan, ­ ­ ­ ­ ­þæt ic halige nu on þine gewitnysse ­ ­ ­ ­ ­wise gecyrre; nalæs me gitsung ­ ­ ­ ­ ­forniman mote.

³⁷ Gewend þu mine eagan, ­ ­ ­ ­ ­þy læs ic weorc idel gese þurh synne, ­ ­ ­ ­ ­ac me on soðne weg þinne þone leofan ­ ­ ­ ­ ­læde cwiculice.

³⁸ Sete ðinum esne ­ ­ ­ ­ ­oðer swylce, þæt he þine spræce ­ ­ ­ ­ ­sped leornige and þa on ege þinum ­ ­ ­ ­ ­ealle healde.

³⁹ Þu me scealt edwitt min ­ ­ ­ ­ ­of awyrpan, þæt me to incan ­ ­ ­ ­ ­ahwær gangeð; for þon ic eom on þinum domum ­ ­ ­ ­ ­gedefe glæd.

⁴⁰ Efne ic þine bebodu ­ ­ ­ ­ ­bealde wolde wis wylle gegan; ­ ­ ­ ­ ­wene ic swylce, þæt þu me on rihtes ­ ­ ­ ­ ­ræd gecwycige.

ו Waw

ו Waw

⁴¹ And me ofer cume, ­ ­ ­ ­ ­ece Dryhten, þæt milde mod, ­ ­ ­ ­ ­mære hælu æfter þinre spræce ­ ­ ­ ­ ­spowendlice.

⁴² And ic andwyrde ­ ­ ­ ­ ­þam þe me edwitstafas wordum wrað cweþað, ­ ­ ­ ­ ­þæt ic gewene on ðe and on þinum wordum ­ ­ ­ ­ ­wære hæbbe.

⁴³ Ne afyr þu me æfre ­ ­ ­ ­ ­fæle spræce, þa ic me on muðe ­ ­ ­ ­ ­mægene hæbbe, and ic soðfæst word ­ ­ ­ ­ ­on sylfan healde, þæt ic on ðinra doma ­ ­ ­ ­ ­dæde getreowige.

⁴⁴ And ic æ þine ­ ­ ­ ­ ­efne and healde, and to worulde on ðære ­ ­ ­ ­ ­wunian mote and on ecnysse ­ ­ ­ ­ ­efnan and healdan.

⁴⁵ And ic on bealde ­ ­ ­ ­ ­brædu gange, forðan ic þine gewitnysse ­ ­ ­ ­ ­wel getrymede.

⁴⁶ And ic þæt fore cyningum ­ ­ ­ ­ ­cyðan mote, þær hig eagum ­ ­ ­ ­ ­on locian, hu me þin gewitnyss ys ­ ­ ­ ­ ­weorð and getreowe, and on ðam ne beon ­ ­ ­ ­ ­æfre gescynded.

⁴⁷ And ic on þinum bebodum ­ ­ ­ ­ ­bealde mote gemetegian ­ ­ ­ ­ ­swyþe mærne ræd, forþan ic hi on lufan minre ­ ­ ­ ­ ­lange hæfde.

⁴⁸ And ic mine handa ­ ­ ­ ­ ­hof gelome, þær ic þine bebodu ­ ­ ­ ­ ­bryce lufade, þa ic mid ðysse þeode ­ ­ ­ ­ ­þearle begange, and on ðine soðcwydas ­ ­ ­ ­ ­symble ic getreowige.

ז Zayin

ז Zayin

⁴⁹ Gemun nu, Dryhten, ­ ­ ­ ­ ­þines wordes, on þam þu me þinum ­ ­ ­ ­ ­þeowe hyht gesealdest.

⁵⁰ Þas ic me on frofre ­ ­ ­ ­ ­fæste hæbbe on minum eaðmedum ­ ­ ­ ­ ­ungemete swyðe, for ðon me þin spræc ­ ­ ­ ­ ­spedum cwycade.

⁵¹ Oftust ofermodige ­ ­ ­ ­ ­unriht fremmað, oþþæt hi on eorðan ­ ­ ­ ­ ­ealle forweorðað; ic þinre æ ­ ­ ­ ­ ­a folgode.

⁵² Ic wæs gemyndig ­ ­ ­ ­ ­mærra doma þinra geþancol, ­ ­ ­ ­ ­ðeoden Dryhten, þæt ic on worulde æt ðe ­ ­ ­ ­ ­wurde afrefred.

⁵³ Me wearð gemolten ­ ­ ­ ­ ­mod on hreðre for fyrenfulra ­ ­ ­ ­ ­facendædum, þa hi æ þine ­ ­ ­ ­ ­anforleton.

⁵⁴ Ac me to sange ­ ­ ­ ­ ­symble hæfde hu ic þine soðfæstnysse ­ ­ ­ ­ ­selest heolde, þær ic on elelande ­ ­ ­ ­ ­ahte stowe.

⁵⁵ Nede þæt gemunde ­ ­ ­ ­ ­gehwylcre, þæt ic naman þinne ­ ­ ­ ­ ­nemde Dryhten and ic æ þine ­ ­ ­ ­ ­elne heolde.

⁵⁶ Þas me andweardum ­ ­ ­ ­ ­ealle gewurdan for þon ic þine soðfæstnysse ­ ­ ­ ­ ­sohte georne.

ח Ḥeth

ח Ḥeth

⁵⁷ Me ys on dæle, ­ ­ ­ ­ ­Dryhten user, cwide cynlice, ­ ­ ­ ­ ­þæt ic cwic wylle þine æ healdan ­ ­ ­ ­ ­elne mycle.

⁵⁸ Ic bidde þinre ansyne ­ ­ ­ ­ ­ungemete georne mid ealre gehygde ­ ­ ­ ­ ­heortan minre, þæt þu me on mode ­ ­ ­ ­ ­milde weorðe æfter þinre spræce ­ ­ ­ ­ ­spowendlice.

⁵⁹ Swa ic wegas þine ­ ­ ­ ­ ­wise þence to ferenne ­ ­ ­ ­ ­fotum minum, þæt ic on þinre gewitnysse ­ ­ ­ ­ ­wel gefere.

⁶⁰ Gearo ic eom symble, ­ ­ ­ ­ ­nalæs grames modes, þæt ic betst cunne ­ ­ ­ ­ ­þine bebodu healdan.

⁶¹ Me fyrenfulra ­ ­ ­ ­ ­fæcne rapas ungemet geneahhie ­ ­ ­ ­ ­oft beclyptan; næs ic ofergittul, ­ ­ ­ ­ ­þæt ic æ þine mid hygecræfte ­ ­ ­ ­ ­heolde and læste.

⁶² Ic æt midre niht ­ ­ ­ ­ ­mæla gehwylce ricene arise ­ ­ ­ ­ ­and hraðe gange þær ic ðe andette ­ ­ ­ ­ ­ealle ætgædere, secge þine domas ­ ­ ­ ­ ­dædum rihte.

⁶³ Ic eom dælneomend ­ ­ ­ ­ ­þe heam ondrædað þe, and þine halige bebodu ­ ­ ­ ­ ­healdað georne.

⁶⁴ Þeos eorðe is ­ ­ ­ ­ ­eall gefylled þinre mildheortnesse ­ ­ ­ ­ ­mihtig Drihten, þine soðfæstnesse ­ ­ ­ ­ ­þu me swylce lær.

ט Ṭeth

ט Ṭeth

⁶⁵ Þu ymb þinne esne ­ ­ ­ ­ ­æghwær dydest wel weorðlice; ­ ­ ­ ­ ­wene ic Drihten, þæt þu þin word wylle ­ ­ ­ ­ ­wis gehealdan.

⁶⁶ Þu me þeodscipe lær ­ ­ ­ ­ ­þinne tilne and wisdomes ­ ­ ­ ­ ­word to genihte, forðon ic þin bebod ­ ­ ­ ­ ­þriste gelyfde.

⁶⁷ Ær þon ic gehened ­ ­ ­ ­ ­hean gewurde, ic agylte ­ ­ ­ ­ ­ungemetum swiðe; hwæðere ic þine spræce geheold ­ ­ ­ ­ ­sped on mode.

⁶⁸ Gōd þu eart, Drihten, ­ ­ ­ ­ ­and me gōd swylce on þinum tile gelær, ­ ­ ­ ­ ­þæt ic teala cunne þin soðfæst weorc ­ ­ ­ ­ ­symble healdan.

⁶⁹ Ys nu mænigfeald ofer me ­ ­ ­ ­ ­man and unriht oferhydigra; ­ ­ ­ ­ ­ic nu mid ealre minre heortan hige ­ ­ ­ ­ ­hycge swiðe, þæt ic þin bebod ­ ­ ­ ­ ­beorht atredde.

⁷⁰ Ys heora heorte nu ­ ­ ­ ­ ­her anlicast swa meoluc wese ­ ­ ­ ­ ­mægene gerunnen; Ic æ þine ­ ­ ­ ­ ­ungemete georne on modsefan ­ ­ ­ ­ ­minum healde.

⁷¹ Selre me wæs and seftre, ­ ­ ­ ­ ­þæt þu sylfa me heane gehnægdest, ­ ­ ­ ­ ­and ic hraðe syþþan þin soðfæst weorc ­ ­ ­ ­ ­wel leornade.

⁷² Me is micle betere, ­ ­ ­ ­ ­þæt ic bebodu healde, ðines muðes gemet, ­ ­ ­ ­ ­þonne mon me geofe geara ðusende ­ ­ ­ ­ ­goldes and seolfres.

י Yodh

י Yodh

⁷³ Handa me ðine ­ ­ ­ ­ ­holde geworhton and gehiwedan ­ ­ ­ ­ ­mid higecræfte; syle me nu andgyt, ­ ­ ­ ­ ­þæt ic eall mæge þine bliðe bebodu ­ ­ ­ ­ ­beorhte leornian.

⁷⁴ Þa ðe on feore forhtigað, ­ ­ ­ ­ ­þa me on fægere geseoð and blissiað, ­ ­ ­ ­ ­bu geðenceað, þæt ic þinum wordum ­ ­ ­ ­ ­wel getreowde.

⁷⁵ Ic þæt, Dryhten, ongeat, ­ ­ ­ ­ ­domas þine reðe rihtwise, ­ ­ ­ ­ ­and ðu ricene me on ðinre soðfæstnesse dydest ­ ­ ­ ­ ­samed eadmedne.

⁷⁶ Wese þin milde mod ­ ­ ­ ­ ­mihtum geswiðed, and me to frofre ­ ­ ­ ­ ­fæste gestande, swa ðu on þinre spræce ­ ­ ­ ­ ­sped gehete þinum agenum ­ ­ ­ ­ ­esne æt þearfe.

⁷⁷ Cumen me ðine miltsa ­ ­ ­ ­ ­mihtum geswyþede, and ic lange on þam ­ ­ ­ ­ ­lifian mote; forðon me is metegung ­ ­ ­ ­ ­on modsefan, hu ic æ þine ­ ­ ­ ­ ­efnast healde.

⁷⁸ Beon þa oferhydegan ­ ­ ­ ­ ­ealle gescende, þe me unrihte ­ ­ ­ ­ ­ahwær gretan; ic þine bebodu ­ ­ ­ ­ ­bealde gegange.

⁷⁹ Gehweorfen to me, ­ ­ ­ ­ ­þa þe hyldu to ðe egsan ahtan, ­ ­ ­ ­ ­and ealle þa ðe þine gewitnesse ­ ­ ­ ­ ­wise cuðan.

⁸⁰ Wese heorte min ­ ­ ­ ­ ­on hige clæne and ic on þin soðfæst word ­ ­ ­ ­ ­symble getreowige, þæt ic on ealdre ne wese ­ ­ ­ ­ ­æfre gescended.

כ Kaph

כ Kaph

⁸¹ Min saul gewearð ­ ­ ­ ­ ­swancur on mode, þær ic on þinre hælu ­ ­ ­ ­ ­hogode and sohte, hu ic on þinum wordum ­ ­ ­ ­ ­wel getrywade.

⁸² Eagan me swylce ­ ­ ­ ­ ­eac teoredon, þær on þinre spræce ­ ­ ­ ­ ­spede eodan; cwædon cynlice: ­ ­ ­ ­ ­“Hwa cwicenne me on ðysum ealdre ­ ­ ­ ­ ­eft frefrade?”

⁸³ Ic eom nu geworden ­ ­ ­ ­ ­werum anlicast, swa þu on hrime setest ­ ­ ­ ­ ­hlance cylle; ne eom ic ofergyttol, ­ ­ ­ ­ ­þæt ic ealle nu þine soðfæste weorc ­ ­ ­ ­ ­smicere healde.

⁸⁴ Hwæt synt þinum esne ­ ­ ­ ­ ­ealra dagena, þe þu mine ehtend for me ­ ­ ­ ­ ­ealle gedeme?

⁸⁵ Me manwyrhtan ­ ­ ­ ­ ­manige on spellum sægdon soðlice; ­ ­ ­ ­ ­na ic hit swa oncneow, swa hit þin æ hafað, ­ ­ ­ ­ ­ece Dryhten.

⁸⁶ Wærun þine ealle gebann ­ ­ ­ ­ ­æðele and soðfæst min ehtan oft ­ ­ ­ ­ ­unrihtwyrhtan; gefultuma me ­ ­ ­ ­ ­fægere, Drihten.

⁸⁷ Hio me lytle læs ­ ­ ­ ­ ­laþe woldan ðisses eorðweges ­ ­ ­ ­ ­ende gescrifan; ic þin gebod ­ ­ ­ ­ ­þa ne wolde on þysum ealdre ­ ­ ­ ­ ­anforlætan.

⁸⁸ Æfter ðinre þære myclan ­ ­ ­ ­ ­mildheortnesse weorð me, mihtig God, ­ ­ ­ ­ ­milde and bliðe; and ic gewitnesse ­ ­ ­ ­ ­wel gehealde muþes þines, ­ ­ ­ ­ ­þe þu men lærdest.

ל Lamedh

ל Lamedh

⁸⁹ On ecnesse ­ ­ ­ ­ ­awa, Drihten, þin word wunað ­ ­ ­ ­ ­weorð on heofenum.

⁹⁰ And on worulda woruld ­ ­ ­ ­ ­wunað ece forð þin soðfæstnes ­ ­ ­ ­ ­swylce, Dryhten.

⁹¹ Ðu þas eorðan ­ ­ ­ ­ ­ealle worhtest, swa heo nu to worulde ­ ­ ­ ­ ­wunian ðenceað; þurh þinra dæda sped ­ ­ ­ ­ ­dagas her gewuniað, forðon ðu ealles ­ ­ ­ ­ ­anweald hafast;

⁹² þær me þin æ ­ ­ ­ ­ ­an ne hulpe, ðe ic on mode ­ ­ ­ ­ ­minum hæfde, þonne ic wende ­ ­ ­ ­ ­on woruldlife, þæt ic on minum eadmedum ­ ­ ­ ­ ­eall forwurde.

⁹³ Ne mæg ic þæs æfre forgytan ­ ­ ­ ­ ­on ecnesse, nymðe ic soð word ­ ­ ­ ­ ­symble gehealde; for þon ic cuðlice on ðæm ­ ­ ­ ­ ­her nu cwicu lifige.

⁹⁴ Ic eom þin hold scealc; ­ ­ ­ ­ ­do ðu halne me, forðon ic þin soð weorc ­ ­ ­ ­ ­sece geneahhe.

⁹⁵ Me fyrenfulle ­ ­ ­ ­ ­fæcne seceað, wyllað me laðe ­ ­ ­ ­ ­lifes asecean; ic ðine gewitnesse ­ ­ ­ ­ ­wat and sohte.

⁹⁶ Ic soð geseah ­ ­ ­ ­ ­and swylce wat, ealre þysse worulde ­ ­ ­ ­ ­wurðeð ende; brad is þin gebann ­ ­ ­ ­ ­and beorht swyðe.

מ Mem

מ Mem

⁹⁷ Hu ic æ þine, ­ ­ ­ ­ ­ece Drihten, lustum lufode; ­ ­ ­ ­ ­ic þæt lange dyde, þæt ic þa on mode ­ ­ ­ ­ ­metegade georne.

⁹⁸ Þu me snoterne gedydest ­ ­ ­ ­ ­swylce ofer mine feondas on foldan ­ ­ ­ ­ ­fæcne ealle; forðon ic beorhtlice ­ ­ ­ ­ ­þine bebodu læste.

⁹⁹ Ofer ealle þa ­ ­ ­ ­ ­þe me ær lærdon, ic þæs hæfde andgyt ­ ­ ­ ­ ­æghwær gleawast, þæt ic þine gewitnesse ­ ­ ­ ­ ­wise sohte.

¹⁰⁰ Ic þæt ofer yldran oncneow ­ ­ ­ ­ ­and þæt a geheold, þæt ic þine bebodu ­ ­ ­ ­ ­bliðe geheolde.

¹⁰¹ Ic minum fotum ­ ­ ­ ­ ­fæcne siðas þa wraþan wegas ­ ­ ­ ­ ­werede georne, þæt ic þine word mihte ­ ­ ­ ­ ­wel gehealdan.

¹⁰² Na ic fram þinum domum ­ ­ ­ ­ ­dædum swicade, for ðon þu me æbebod ­ ­ ­ ­ ­ærest settest.

¹⁰³ Me is on gomum ­ ­ ­ ­ ­gōd and swete þin agen word, ­ ­ ­ ­ ­ece Drihten; hit is halwende, ­ ­ ­ ­ ­hunige mycle and beobreade ­ ­ ­ ­ ­betere and swetre.

¹⁰⁴ On bebodum ðinum ­ ­ ­ ­ ­ic me betst oncneow, þæt ic unrihte wegas ­ ­ ­ ­ ­ealle feode, for ðon þu me æ þine ­ ­ ­ ­ ­ær gesettest.

נ Nun

נ Nun

¹⁰⁵ Þæt is fæle blacern ­ ­ ­ ­ ­fotum minum, þæt ic þin word, Drihten, ­ ­ ­ ­ ­wel gehealde, and þæt ys þæt strange leoht ­ ­ ­ ­ ­stige minre.

¹⁰⁶ Ic aðas swor ­ ­ ­ ­ ­and eac hycge, þæt ic soðne dom ­ ­ ­ ­ ­symble healde.

¹⁰⁷ And ic eadmedu ­ ­ ­ ­ ­ungemetum georne efnan þence; ­ ­ ­ ­ ­forgif me, ece God, þæt ic æfter ðinum wordum ­ ­ ­ ­ ­weorðe bliðe.

¹⁰⁸ Mines muðes me ­ ­ ­ ­ ­modes willa on heahsælum ­ ­ ­ ­ ­hraðe gebringe, and me þine domas alær, ­ ­ ­ ­ ­Drihten, swylce.

¹⁰⁹ Is sawl min ­ ­ ­ ­ ­symble on ðinum holdum handum, ­ ­ ­ ­ ­ne ic þine þa halgan æ on ðysum ealdre forgitan ­ ­ ­ ­ ­æfre þence.

¹¹⁰ Me firenfulle fæcne gyrene awriþan wraðe, ­ ­ ­ ­ ­and ne wolde ic fram þinum bebodum ­ ­ ­ ­ ­feor geswican.

¹¹¹ Ic me eowde begeat, ­ ­ ­ ­ ­æðele hæbbe þine gewitnesse ­ ­ ­ ­ ­wel getreowe on ecnesse ­ ­ ­ ­ ­awa to feore; þæt byð heahbliss ­ ­ ­ ­ ­heortan minre.

¹¹² Ahylde ic mine heortan ­ ­ ­ ­ ­holde mode, þæt ic þin soðfæst weorc ­ ­ ­ ­ ­symble worhte; forðon ic ðæs ece ­ ­ ­ ­ ­edlean hæbbe.

ס Samekh

ס Samekh

¹¹³ And ic synfulle ­ ­ ­ ­ ­symble feode, and ic æ þine ­ ­ ­ ­ ­elne lufade.

¹¹⁴ Þu me fultumian scealt, ­ ­ ­ ­ ­fæle gestandan and andfenga ­ ­ ­ ­ ­æghwær æt ðearfe, and ic on þin word ­ ­ ­ ­ ­wel getreowe.

¹¹⁵ Gewitað fram me, ­ ­ ­ ­ ­þe awyrgede synt, þenden ic Godes bebodu ­ ­ ­ ­ ­georne smeage.

¹¹⁶ Onfoh me freondlice, fæle Drihten, æfter þam þe þu sylfa ­ ­ ­ ­ ­sægdest and cwæde, þæt ic sceolde lifigan ­ ­ ­ ­ ­lange ðrage; ne gescend me on siðe, ­ ­ ­ ­ ­nu ic þin swa onbad.

¹¹⁷ Gefultuma me fæste; ­ ­ ­ ­ ­ðonne beo ic fægere hal, and ic þine soðfæstnysse ­ ­ ­ ­ ­symble þence.

¹¹⁸ Ealle ðu forhogodest, ­ ­ ­ ­ ­ða ðe unrihtes wæran wyrhtan; ­ ­ ­ ­ ­wat ic gearewe, þæt heo on unriht ­ ­ ­ ­ ­ealle þohtan.

¹¹⁹ Ic oferhylmend ­ ­ ­ ­ ­ealle getealde, þa on eorðan her ­ ­ ­ ­ ­yfele wæron, forðon ic þine gewitnesse ­ ­ ­ ­ ­wyrðe lufade.

¹²⁰ Gefæstna þinne egsan ­ ­ ­ ­ ­flæsce minum, þæt ic me ondræde ­ ­ ­ ­ ­domas ðine.

ע Ayin

ע Ayin

¹²¹ Ic soðne dom ­ ­ ­ ­ ­symble worhte; ne syle þu me ehtendum ­ ­ ­ ­ ­æfre minum.

¹²² Onfoh þu þinum esne ­ ­ ­ ­ ­fægere mid gōde, þæt me oferhydige ­ ­ ­ ­ ­æfre ne motan hearmcwyddian; ­ ­ ­ ­ ­hyldo ne gymað.

¹²³ Hwæt, me eagan mine ­ ­ ­ ­ ­atule gewurdan, þær ic on ðinre hælo ­ ­ ­ ­ ­hyldo sohte and on þinre spræce ­ ­ ­ ­ ­sped soðfæste.

¹²⁴ Do þinum agenum ­ ­ ­ ­ ­esne swylce mycel milde mod, ­ ­ ­ ­ ­and me mægene eac þin soðfæst word ­ ­ ­ ­ ­sylfa lære.

¹²⁵ Ic eom esne þin; ­ ­ ­ ­ ­syle andgit, þæt ic þine gewitnesse ­ ­ ­ ­ ­wel leornige.

¹²⁶ Þis is wynne tid, ­ ­ ­ ­ ­þæt man eac wel do, Drihten ure; ­ ­ ­ ­ ­ne læt ðu dole æfre þin æbebod ­ ­ ­ ­ ­ahwær toweorpan.

¹²⁷ For ðon ic þin bebod ­ ­ ­ ­ ­beorhte lufode, ða me georne synd ­ ­ ­ ­ ­golde deorran, topazion þæra ­ ­ ­ ­ ­teala gimma.

¹²⁸ For ðon ic eall þin bebod ­ ­ ­ ­ ­elne healde, and ic unrihte wegas ­ ­ ­ ­ ­ealle feoge.

פ Pe

פ Pe

¹²⁹ Wundorlic is ðin gewitnes, ­ ­ ­ ­ ­wealdend Dryhten; forðon heo min sawl smeað ­ ­ ­ ­ ­and seceð georne.

¹³⁰ Worda me þinra ­ ­ ­ ­ ­wise onleohteð, beorhtnesse blæcern, ­ ­ ­ ­ ­and þu bealde sylest andgit eallum ­ ­ ­ ­ ­eorðbuendum.

¹³¹ Muð ic ontynde ­ ­ ­ ­ ­minne wide, þæt me min oroð ­ ­ ­ ­ ­ut afæmde, þær ic ðin bebod ­ ­ ­ ­ ­efnede mid willan.

¹³² Beseoh þu on me, ­ ­ ­ ­ ­and me syððan hraðe mære gemiltsa, ­ ­ ­ ­ ­swa ðu manegum dydest, þe naman þinne ­ ­ ­ ­ ­nyde lufedon.

¹³³ Gerece ðu me swylce, ­ ­ ­ ­ ­þæt ic on rihtne weg æfter þinre spræce ­ ­ ­ ­ ­spedum gange, þy læs min ænig unriht ­ ­ ­ ­ ­ahwær wealde.

¹³⁴ Ahrede me hearmcwidum ­ ­ ­ ­ ­heanra manna, þæt ic ðine bebodu ­ ­ ­ ­ ­bealde healde.

¹³⁵ Do þine ansyne ­ ­ ­ ­ ­esne þinum leohte and leofe; ­ ­ ­ ­ ­lær me syþþan, hu ic ðin soðfæst word ­ ­ ­ ­ ­selest gehealde.

¹³⁶ Eagan mine gesawon, ­ ­ ­ ­ ­hu yða gelaac, wid gang wætera, ­ ­ ­ ­ ­wundrum gangeð; swa ðam ileum byð, ­ ­ ­ ­ ­þe ær nellað þinre æ bebod ­ ­ ­ ­ ­elne healdan.

צ Tsadhe

צ Tsadhe

¹³⁷ Drihten is soðfæst; ­ ­ ­ ­ ­synd his domas eac reðe mid ræde ­ ­ ­ ­ ­rihte gecyðde.

¹³⁸ Hwæt, ðu soðfæst weorc ­ ­ ­ ­ ­symble hete on þinre gewitnesse ­ ­ ­ ­ ­wel gehealdan; ealles forgeaton, ­ ­ ­ ­ ­þa me grame wæron, worda þinra ­ ­ ­ ­ ­and me wa dydana.

¹³⁹ Me heard ehtnes ­ ­ ­ ­ ­huses þines on bearme me ­ ­ ­ ­ ­gebrohte oft, ða þin word noldan ­ ­ ­ ­ ­wel gehealdan, þa me feondas ær ­ ­ ­ ­ ­fæste wæron.

¹⁴⁰ Is þin agen spræc ­ ­ ­ ­ ­innan fyren, sylf swiþe hat, ­ ­ ­ ­ ­and symble ða þin esne her ­ ­ ­ ­ ­ealle lufade.

¹⁴¹ Ic wæs on geoguðe, ­ ­ ­ ­ ­grame me forhogedon; næs ic ofergittol ­ ­ ­ ­ ­æfre hwæðere, þæt ic þin soð weorc ­ ­ ­ ­ ­symble heolde.

¹⁴² Is þin soðfæstnes ­ ­ ­ ­ ­symble, Drihten, seo soðfæste, ­ ­ ­ ­ ­and seo symble bið on ecnesse ­ ­ ­ ­ ­awa to feore; is þin swylce æðelnes ­ ­ ­ ­ ­and æ soðfæst.

¹⁴³ Me costunga ­ ­ ­ ­ ­cnysdan geneahhe, and nearonessa ­ ­ ­ ­ ­naman gelome; ac ic þine bebodu ­ ­ ­ ­ ­efnde and læste, eac on minum mode ­ ­ ­ ­ ­hi metegade georne.

¹⁴⁴ Ys me þin gewitnes ­ ­ ­ ­ ­weorðast and rihtast, and ða me on ece ­ ­ ­ ­ ­andgyt hæbbe; syle me ða to soðe, ­ ­ ­ ­ ­and ic syþþan lifige.

ק Qoph

ק Qoph

¹⁴⁵ Ic mid ealle ongann ­ ­ ­ ­ ­inngehygde heortan minre ­ ­ ­ ­ ­hige to Drihtne ceare cleopian; ­ ­ ­ ­ ­he me cynlice hraðe gehyrde, ­ ­ ­ ­ ­hyldo cuðe, þæt ic his soðfæstnesse ­ ­ ­ ­ ­sohte geneahhe.

¹⁴⁶ Ic cleopode to ðe; ­ ­ ­ ­ ­do me cuðlice halne, heahcyning, ­ ­ ­ ­ ­heofona wealdend, hælende Crist; ­ ­ ­ ­ ­ic þæt hicge nu, þæt ic ðine bebodu ­ ­ ­ ­ ­bliðe gehealde.

¹⁴⁷ And ic ðe on ripe forecom, ­ ­ ­ ­ ­and hraðe swylce ceare cleopode; ­ ­ ­ ­ ­þu me cynlice wel onfencge, ­ ­ ­ ­ ­wistest gearwe, þæt ic on ðinum wordum ­ ­ ­ ­ ­wel getruwade.

¹⁴⁸ Þe eagan mine ­ ­ ­ ­ ­eac forecoman; on ærmergen ­ ­ ­ ­ ­ic elne ongann þine spræce ­ ­ ­ ­ ­spyrian georne.

¹⁴⁹ Gehyr mine stefne, ­ ­ ­ ­ ­halig Drihten, æfter ðinre þære myclan ­ ­ ­ ­ ­mildheortnesse, and æfter þinum domum ­ ­ ­ ­ ­do me halne.

¹⁵⁰ Me syndon eahtend ­ ­ ­ ­ ­ungemete neah aa and ða synfullan; ­ ­ ­ ­ ­syndan ealle hi fram æ þinre ­ ­ ­ ­ ­unneah gewiten.

¹⁵¹ Wes me swiðe neah, ­ ­ ­ ­ ­wuldres Drihten; synt ealle þine wegas ­ ­ ­ ­ ­wise and cuðe.

¹⁵² Ic gewitnesse ­ ­ ­ ­ ­wise þine ongeat gleawlice, ­ ­ ­ ­ ­þæt þu geara hi on ecnesse ­ ­ ­ ­ ­ær staþelodest.

ר Resh

ר Resh

¹⁵³ Ac min eaðmedu geseoh ­ ­ ­ ­ ­eall ful georne, genere niode, ­ ­ ­ ­ ­nu me ned belæg; for þon ic wolde æ þine ­ ­ ­ ­ ­elne healdan.

¹⁵⁴ Dem minne dom ­ ­ ­ ­ ­and me deore alys; for þinre spræce, ­ ­ ­ ­ ­do me spedlice and cuðlice ­ ­ ­ ­ ­cwicne nu ða.

¹⁵⁵ Wærun fyrenfulle feor ­ ­ ­ ­ ­fælre hælu; forðon hi þine soðfæstnesse ­ ­ ­ ­ ­secean noldan.

¹⁵⁶ Miltsa synt þine, ­ ­ ­ ­ ­mihtig Drihten; æfter þinum domum ­ ­ ­ ­ ­do me cwicne.

¹⁵⁷ Ic manige geseah, ­ ­ ­ ­ ­þe min ehton; nolde ic cwic æfre ­ ­ ­ ­ ­swa þeah hwæðere þine gewitnesse ­ ­ ­ ­ ­wræste forlætan.

¹⁵⁸ Ic manige geseah ­ ­ ­ ­ ­men þa þe noldan heora friðowære ­ ­ ­ ­ ­fæste healdan, and ic þand wið þan ­ ­ ­ ­ ­þe hi teala noldan þinre spræce ­ ­ ­ ­ ­sped gehealdan.

¹⁵⁹ Swylce ic sylf geseah, ­ ­ ­ ­ ­þæt ic þin soð bebod lustum lufige, ­ ­ ­ ­ ­leofa Drihten; on þinre mildheortnesse ­ ­ ­ ­ ­me scealt acwician.

¹⁶⁰ Þæt is weorðlic fruma ­ ­ ­ ­ ­worda þinra, þæt þær byð soð ­ ­ ­ ­ ­symble meted, and on ecnesse ­ ­ ­ ­ ­awa to feore ealle þine domas synt ­ ­ ­ ­ ­dædum geseðde.

ש Sin and Shin

ש Sin and Shin

¹⁶¹ Min earwunga ­ ­ ­ ­ ­ehtan ongunnon ealdurmanna gehwylc ­ ­ ­ ­ ­ungemete swiðe; wearð me heorte forht, ­ ­ ­ ­ ­þær ic þin halig word on þinum egesan ærest ­ ­ ­ ­ ­æðelu tredde.

¹⁶² Ic blissige ­ ­ ­ ­ ­bealde mode ofer ðinre spræce ­ ­ ­ ­ ­spede þa myclan, swa se bið bliðe, ­ ­ ­ ­ ­se þe beorna reaf manige meteð, ­ ­ ­ ­ ­þær hit mannum losað.

¹⁶³ And ic unrihta gehwylc ­ ­ ­ ­ ­elne feode and onhyscte ­ ­ ­ ­ ­æghwær georne; wolde ic æ þine ­ ­ ­ ­ ­elne lufian.

¹⁶⁴ Swa ic þe seofon siþum ­ ­ ­ ­ ­symble wolde leofum lustlice ­ ­ ­ ­ ­lofsang cweðan daga æghwylce, ­ ­ ­ ­ ­for þon ic þine domas wat on soð fæste ­ ­ ­ ­ ­smicere gefylde.

¹⁶⁵ Þam bið sib mycel ­ ­ ­ ­ ­þe him þenceð, þæt hi naman þinne ­ ­ ­ ­ ­neode lufien; ne bið him æswic on þon ­ ­ ­ ­ ­æfre to feore.

¹⁶⁶ Ic þinre hælu bad, ­ ­ ­ ­ ­halig Drihten, and þine bebodu ­ ­ ­ ­ ­bealde lufode.

¹⁶⁷ Hafað sawl min ­ ­ ­ ­ ­soð gehealden þinre gewitnesse ­ ­ ­ ­ ­worda æghwylc, and ic þa lustum ­ ­ ­ ­ ­lufade swiðe.

¹⁶⁸ Heold ic þine bebodu ­ ­ ­ ­ ­holde mode and þine gewitnesse ­ ­ ­ ­ ­wordum trymede; forðon ealle mine wegas ­ ­ ­ ­ ­wise syndan on þinre gesihðe ­ ­ ­ ­ ­soðe, Drihten.

ת Taw

ת Taw

¹⁶⁹ Nu genealæceð ­ ­ ­ ­ ­neode minum gebedum bealde, ­ ­ ­ ­ ­þæt ic bidde nu on þinre gesihðe ­ ­ ­ ­ ­symble, Drihten; æfter þinre spræce ­ ­ ­ ­ ­syle me spedlice, þæt þu me generige ­ ­ ­ ­ ­niða gehwylces.

¹⁷⁰ Ingange min ben, ­ ­ ­ ­ ­ece Drihten, on þinre gesihðe ­ ­ ­ ­ ­symble æt þearfe; æfter þinre spræce ­ ­ ­ ­ ­do spedlice, ðæt ðu me generige ­ ­ ­ ­ ­niða gehwylces.

¹⁷¹ Nu mine weleras ðe ­ ­ ­ ­ ­wordum belcettað ymnas elne, ­ ­ ­ ­ ­gif þu me ærest wylt þine soðfæstnesse ­ ­ ­ ­ ­sylfa læran.

¹⁷² Hwæt, tunge min ­ ­ ­ ­ ­teala foresægde, hu þinre spræce ­ ­ ­ ­ ­spede eodan; wærun eall þin bebodu ­ ­ ­ ­ ­æghwær rihtwis.

¹⁷³ Syn me þine handa ­ ­ ­ ­ ­onhælu nu, and þæt domlice ­ ­ ­ ­ ­gedon weorðe; forðon ic þine bebodu geceas ­ ­ ­ ­ ­bealde æt þearfe.

¹⁷⁴ Ic þinre hælu ­ ­ ­ ­ ­her wilnade, Drihten ælmihtig; ­ ­ ­ ­ ­do me symble, þæt ic æ þine ­ ­ ­ ­ ­elne metige.

¹⁷⁵ Leofað sawl min ­ ­ ­ ­ ­and þe lustum hereð, and me þine domas ­ ­ ­ ­ ­dædum fultumiað.

¹⁷⁶ Ic gedwelede ­ ­ ­ ­ ­swa þæt dysige scep, þætte forweorðan ­ ­ ­ ­ ­wolde huru; la, sece þinne esne ­ ­ ­ ­ ­elne, Drihten; forðon ic þinra beboda ne forgeat ­ ­ ­ ­ ­beorhtra æfre.