Sealm 115 - Anglo-Saxon Psalms c.890-950 AD

Sealm CXIII [113:9-25] (115)

¹ Nalæs us, nalæs us, ­ ­ ­ ­ ­nergend Dryhten, ac we naman þinum ­ ­ ­ ­ ­neode secgeað wuldur wide ­ ­ ­ ­ ­geond woruldricu. For ðinre þære myclan ­ ­ ­ ­ ­mildheortnysse and for þinre soðfæstnysse ­ ­ ­ ­ ­samed ætgædere,

² þy læs þæt æfre cweðan ­ ­ ­ ­ ­oðre þeode: “hwær is heora agen God ­ ­ ­ ­ ­ahwær nu ða?”

³ Ys ure se halga God ­ ­ ­ ­ ­on heofondreame uppe mid englum, ­ ­ ­ ­ ­and he eall gedeð, swa his willa byð, ­ ­ ­ ­ ­on woruldrice.

⁴ Þa wæron deofulgild ­ ­ ­ ­ ­deorce hæþenra golde and seolfre, ­ ­ ­ ­ ­þa her geara menn worhtan wigsmiðas ­ ­ ­ ­ ­wræste mid folmum.

⁵ Þa, muð habbað, ­ ­ ­ ­ ­and ne magon hwæþere wiht hleoðrian ­ ­ ­ ­ ­ne word sprecan; beoð onforan eagan, ­ ­ ­ ­ ­ne magon feor geseon.

⁶ Earan habbað swylce ­ ­ ­ ­ ­and opene nose, ne magon eþian, ­ ­ ­ ­ ­awyht gehyran.

⁷ Handa hi habbað, ­ ­ ­ ­ ­ne hio hwæðere magon gegrapian ­ ­ ­ ­ ­gōdes awiht, and fet habbað, ­ ­ ­ ­ ­ne magon feala gangan. Ne cleopigað hi care, ­ ­ ­ ­ ­þeah þe hi ceolan habban, ne him hluttur gast ­ ­ ­ ­ ­on hracan eardað.

⁸ Ac heo wæron þam wyrcendum ­ ­ ­ ­ ­wel gelice and æghwylcum, ­ ­ ­ ­ ­þe him on treowað.

⁹ Israhela hus ­ ­ ­ ­ ­ærest on Drihten helpe gehogedan, ­ ­ ­ ­ ­holdne begeaton fælne fultum; ­ ­ ­ ­ ­he hi wið feondum geheold.

¹⁰ Aarones hus ­ ­ ­ ­ ­eac on Dryhten leofne gelyfdan; ­ ­ ­ ­ ­he him liðe wearð and him fultum gestod ­ ­ ­ ­ ­fæste æt þearfe.

¹¹ Þa ðe a wegen ­ ­ ­ ­ ­egsan Dryhtnes, hio hyht heora ­ ­ ­ ­ ­habban on Drihten, he him fultum ­ ­ ­ ­ ­fæste gestandeð and him scyldend byð ­ ­ ­ ­ ­symble æt þearfe.

¹² Weorð þu ure gemyndig, ­ ­ ­ ­ ­mihtig Dryhten, and þine bletsunge ­ ­ ­ ­ ­bring ofer us; þu gebletsudest ­ ­ ­ ­ ­bearn Israheles, Aarones hus ­ ­ ­ ­ ­eac gebletsadest;

¹³ þu gebletsadest ­ ­ ­ ­ ­bliðe mode ealle þa þe on ðe ­ ­ ­ ­ ­egsan hæfdan, mycle and mæte ­ ­ ­ ­ ­ofer middangeard.

¹⁴ Gemænigfealdige þis ­ ­ ­ ­ ­mihtig Dryhten ofer eow ealle ­ ­ ­ ­ ­and ofer agene bearn.

¹⁵ Wesað ge fram gode ­ ­ ­ ­ ­geara gebletsade, þam þe heofon worhte, ­ ­ ­ ­ ­hrusan swylce;

¹⁶ heofonas healdeð ­ ­ ­ ­ ­halig Dryhten, sealde þas moldan ­ ­ ­ ­ ­manna bearnum.

¹⁷ Næfre þe, Dryhten, ­ ­ ­ ­ ­deade heriað, ne ealle þa þe heonan ­ ­ ­ ­ ­helle seceað.

¹⁸ Ac we lifigende ­ ­ ­ ­ ­leofne Dryhten balde bletsigað, ­ ­ ­ ­ ­ne þæs blinnað nu of ðyssan forð ­ ­ ­ ­ ­awa to worulde.