Sealm 112 - Anglo-Saxon Psalms c.890-950 AD

Sealm 111

¹ Eadig byð se wer ­ ­ ­ ­ ­se þe him ege Drihtnes on ferhðcleofan ­ ­ ­ ­ ­fæste gestandeð, and his bebod healdeð ­ ­ ­ ­ ­bealde mid willan.

² He on eorðan byð ­ ­ ­ ­ ­eadig and spedig, and his cneorisse byð ­ ­ ­ ­ ­cyn gebletsad.

³ Him wuldur and wela ­ ­ ­ ­ ­wunað æt huse, byð his soþfæstnys ­ ­ ­ ­ ­swylce mære, þenden þysse worulde ­ ­ ­ ­ ­wunaþ ænig dæl.

⁴ Leoht wæs on leodum ­ ­ ­ ­ ­leofum acyðed, þam þe on ðystrum ­ ­ ­ ­ ­þrage lifdan and hiora heortan ­ ­ ­ ­ ­heoldan mid rihte; milde is on mode ­ ­ ­ ­ ­mihtig Dryhten, and he ys soðfæst ­ ­ ­ ­ ­symble æt þearfe.

⁵ Glæd man gleawhydig, ­ ­ ­ ­ ­gōd and mildheort, seteð soðne dom ­ ­ ­ ­ ­þurh his sylfes word,

⁶ se on ecnysse ­ ­ ­ ­ ­eadig standeð.

⁷ Byð on eceum gemynde ­ ­ ­ ­ ­æghwylc þæra þe his soðe and riht ­ ­ ­ ­ ­symble healdeð, ne him on hlyste ­ ­ ­ ­ ­mycelum ondrædeð awiht on ealdre ­ ­ ­ ­ ­yfeles syððan. Byð his heorte gearo ­ ­ ­ ­ ­hyhte to Drihtne

⁸ getrymed and getyhted, ­ ­ ­ ­ ­þæt him teonan ne mæg fæcne ætfæstan ­ ­ ­ ­ ­feonda ænig, ac he ealle forsyhð ­ ­ ­ ­ ­æghwær georne.

⁹ Se þe his æhta ­ ­ ­ ­ ­ealle tostredeð and þearfendum ­ ­ ­ ­ ­þa gedæleð, his soðfæstnyss wunað ­ ­ ­ ­ ­symble oð ende; byð his horn wended ­ ­ ­ ­ ­her on wuldur.

¹⁰ Swa þæt synfull gesyhð, ­ ­ ­ ­ ­sona yrsað, toþum torn þolað, ­ ­ ­ ­ ­teonum grimetað, þearle þindeð, ­ ­ ­ ­ ­oþþæt þonne byð, þæt fyrenfulra lust ­ ­ ­ ­ ­fæcne forweorðeð.