Sealm 111 - Anglo-Saxon Psalms c.890-950 AD

Sealm 110

¹ Ic andytte þe, ­ ­ ­ ­ ­ece Drihten, mid hyge ealle ­ ­ ­ ­ ­heortan minre for gesamnuncge ­ ­ ­ ­ ­þæra soðfæstra and on gemetingum ­ ­ ­ ­ ­

² mycel Drihtnes weorc. Swylce ic his willan ­ ­ ­ ­ ­wylle georne swyþe secean, ­ ­ ­ ­ ­

³ samed andettan, hu his mægenþrymnes ­ ­ ­ ­ ­mycellic standeð and his soðfæstnyss wunað ­ ­ ­ ­ ­symble ece.

⁴ He gemynd dyde ­ ­ ­ ­ ­mærra wundra; mildheort he is and modig; ­ ­ ­ ­ ­mihtig Drihten

⁵ syleð eallum mete ­ ­ ­ ­ ­þam þe his ege habbað. And he on worulde ­ ­ ­ ­ ­wearð gemyndig his gewitnesse, ­ ­ ­ ­ ­þe he wel swylce

⁶ myhtum miclum ­ ­ ­ ­ ­and mærweorcum fægrum gefylde ­ ­ ­ ­ ­and to his folce cwæð, þæt he him wolde yrfe ­ ­ ­ ­ ­ellþeodigra on agene æht ­ ­ ­ ­ ­eall gesyllan.

⁷ Ys his handgeweorc ­ ­ ­ ­ ­hyge soðfæstra, ryhte domas, ­ ­ ­ ­ ­þa he ræran wyle;

⁸ wærun his bebodu ­ ­ ­ ­ ­ealle treowfæste, on ealra weorulda weoruld ­ ­ ­ ­ ­wurdan soðfæste and on rihtnysse ­ ­ ­ ­ ­ræda getrymede.

⁹ He alysinge ­ ­ ­ ­ ­leofum folce soðe onsende ­ ­ ­ ­ ­and him swylce bebead, þæt hi on ecnysse ­ ­ ­ ­ ­a syððan his gewitnesse ­ ­ ­ ­ ­well geheoldan and his þone halgan naman ­ ­ ­ ­ ­hæfdan mid egsan.

¹⁰ Þæt byð secga gehwam ­ ­ ­ ­ ­snytru on frymðe, þæt he godes egesan ­ ­ ­ ­ ­gleawe healde, and þæt byð andgit good ­ ­ ­ ­ ­eallum swylce þe hine wyllað well ­ ­ ­ ­ ­wyrcean and healdan. Herenes Drihtnes ­ ­ ­ ­ ­her sceal wunian, on worulda woruld ­ ­ ­ ­ ­wynnum standan.