Sealm 109 - Anglo-Saxon Psalms c.890-950 AD

Sealm 108

¹ Nelle ic lofes þines, ­ ­ ­ ­ ­lifigende God, geswigian, ­ ­ ­ ­ ­þeah þe me synfulra inwitfulra muðas ­ ­ ­ ­ ­on ganian.

² Hio þa innwit feala ­ ­ ­ ­ ­ywdan on tungan, and me wraðra wearn ­ ­ ­ ­ ­worda spræcon, fæcne firenlicu, ­ ­ ­ ­ ­and afuhtan me

³ ealle earwunga ­ ­ ­ ­ ­ungemete swyðe.

⁴ Hi me wið lufan ­ ­ ­ ­ ­laþum dædum torne telnysse ­ ­ ­ ­ ­teodan mænige; ic him a gebæd ­ ­ ­ ­ ­ungemete georne.

⁵ Hi me yfel settan ­ ­ ­ ­ ­a wið goode and feounge ­ ­ ­ ­ ­for minre lufan.

⁶ Gesete him synnfulle ­ ­ ­ ­ ­symble to ealdrum, stande him on þa swyþeran hand ­ ­ ­ ­ ­swylce deoful.

⁷ Gange of dome gehwam ­ ­ ­ ­ ­deope gehyned, and him his gebed ­ ­ ­ ­ ­hweorfe to fyrenum. Gewurðe him weste ­ ­ ­ ­ ­eall his onwunung and on hys eardungstowe ­ ­ ­ ­ ­næfre gewurþe þæt þær on gewunige ­ ­ ­ ­ ­awiht lifigendes.

⁸ Wesan him dagas deorce ­ ­ ­ ­ ­and dimme and feawe, and his bisceophad ­ ­ ­ ­ ­brucan feondas.

⁹ Weorðan his agene bearn ­ ­ ­ ­ ­ealle steopcild and his wif wyrðe ­ ­ ­ ­ ­wydewe hreowlic.

¹⁰ Syn his bearn swylce ­ ­ ­ ­ ­toboren wide, and he ut weorpe ­ ­ ­ ­ ­earme þearfan, þonne hi to his huse ­ ­ ­ ­ ­hleowes wilnian.

¹¹ Ealle his æhta ­ ­ ­ ­ ­unholde fynd rice reðemann ­ ­ ­ ­ ­rycene gedæle, and his feoh onfon ­ ­ ­ ­ ­fremde handa.

¹² Ne him ahwær wese ­ ­ ­ ­ ­ænig fultum, ne his steopcildum ­ ­ ­ ­ ­stande to helpe.

¹³ Gangan ealle his bearn ­ ­ ­ ­ ­on ece forwyrd, and on anum cneowe ­ ­ ­ ­ ­eall gewyrðe his nama nyhsta ­ ­ ­ ­ ­nede adilgad.

¹⁴ Eall þæt unriht ­ ­ ­ ­ ­þe his ealdras ær mānes gefremedan, ­ ­ ­ ­ ­on gemynd cume and on ansyne ­ ­ ­ ­ ­ures Drihtnes; ne adilgode wesan ­ ­ ­ ­ ­deorce fyrene, þa his modur ær ­ ­ ­ ­ ­mane fremede.

¹⁵ Wesan hi wið Drihtne ­ ­ ­ ­ ­dædum swylce, and hine adilgie ­ ­ ­ ­ ­dome ealne of ðysse eorðan ­ ­ ­ ­ ­awa to feore.

¹⁶ Næs him milde gemynd ­ ­ ­ ­ ­on modsefan, and he þearfendra ­ ­ ­ ­ ­ðriste ehte; symble þæt on heortan ­ ­ ­ ­ ­hogode geomust, hu he mid searuwe ­ ­ ­ ­ ­swylce acwealde.

¹⁷ He wolde wergðu ­ ­ ­ ­ ­wyrcean georne, and hine seo ylce on ­ ­ ­ ­ ­eft gesette; nolde he bletsunge ­ ­ ­ ­ ­biddan ne tilian, forðon hio him wæs afyrred ­ ­ ­ ­ ­of ferhðcofan.

¹⁸ He hine gegyrede ­ ­ ­ ­ ­mid grame wyrgðu, swa he hine wædum ­ ­ ­ ­ ­wræstum geteode, and sio his innað ­ ­ ­ ­ ­ywde swylce wan wætere gelic ­ ­ ­ ­ ­and wynele, se þe banes byrst ­ ­ ­ ­ ­beteð and hæleð.

¹⁹ Wese he hrægle gelic ­ ­ ­ ­ ­þe her hraðe ealdað, and gyrdelse, ­ ­ ­ ­ ­ðe hine man gelome gyrt.

²⁰ Þis is weorc þara ­ ­ ­ ­ ­þe oft wraðe me trage tældan; ­ ­ ­ ­ ­tyne hine Dryhten þam þe sar sprece ­ ­ ­ ­ ­sawle minre.

²¹ And þu, min Drihten God, ­ ­ ­ ­ ­do me þine nu mycle mildheortnesse ­ ­ ­ ­ ­for þinum þam mæran naman, swa ðu oft þin milde mod ­ ­ ­ ­ ­manegum cyðdest.

²² Alys me, lifes weard, ­ ­ ­ ­ ­for þan ic eom lama þearfa; is me heorte on ­ ­ ­ ­ ­hearde gedrefed.

²³ Ic eom scuan gelic ­ ­ ­ ­ ­swyþe ahylded, oðlæded gōdum ­ ­ ­ ­ ­swa se gærshoppa.

²⁴ Me synt cneowu swylce ­ ­ ­ ­ ­cwicu unhale for fæstenum; ­ ­ ­ ­ ­is min flæsc swylce for fægrum ele ­ ­ ­ ­ ­frecne onwended; eom ic to edwitstæfe ­ ­ ­ ­ ­eallum geworden.

²⁵ Swa hi me gesawon, ­ ­ ­ ­ ­sona hig wegdan, hrerdan heora heafod; ­ ­ ­ ­ ­

²⁶ help min, Drihten God, and me halne gedo, ­ ­ ­ ­ ­hælynde Crist, for þinre þære myclan ­ ­ ­ ­ ­mildheortnysse.

²⁷ Þæt hi soð witan, ­ ­ ­ ­ ­þæt si þin sylfes hand and þu þas gedydest, ­ ­ ­ ­ ­Drihten usser.

²⁸ Weorðan þa awyrgde, ­ ­ ­ ­ ­wes þu gebletsad; and þa þe me mid unryhte ­ ­ ­ ­ ­ænige styrian, and hi þær sceande ­ ­ ­ ­ ­sylfe agon; wese þin esne on þe ­ ­ ­ ­ ­ungemete bliðe.

²⁹ Syn ða butan are ­ ­ ­ ­ ­ealle gegyrede þe me tælnysse ­ ­ ­ ­ ­teonan ætfæstan, and him si abrogden ­ ­ ­ ­ ­swa of brechrægle hiora sylfra sceamu ­ ­ ­ ­ ­swyþust ealra.

³⁰ Ic on minum muðe ­ ­ ­ ­ ­mihta Drihtnes ealle andette, ­ ­ ­ ­ ­and eac swylce hine on midle ­ ­ ­ ­ ­manna herige.

³¹ He sylfa gestod ­ ­ ­ ­ ­on ða swyðran hand, þær he þearfendra ­ ­ ­ ­ ­þinga teolode; he mine sawle ­ ­ ­ ­ ­swylce gehealde wið ehtendra ­ ­ ­ ­ ­egsan griman.