Sealm 108 - Anglo-Saxon Psalms c.890-950 AD

Sealm 107

¹ Ys min heorte gearu, ­ ­ ­ ­ ­halig Drihten, gearu is min heorte, ­ ­ ­ ­ ­þæt ic gode cweme, sealmas singe ­ ­ ­ ­ ­soþum Drihtne.

² Aris nu, wuldur min, ­ ­ ­ ­ ­þæt ic wynlice on psalterio ­ ­ ­ ­ ­þe singan mote, and ic ðe on hleoðre ­ ­ ­ ­ ­hearpan swylce on ærmergen ­ ­ ­ ­ ­eac gecweme.

³ Ic þe andette ­ ­ ­ ­ ­ece Drihten on folca gehwam ­ ­ ­ ­ ­fægrum wordum, and ic þe on ðeodum ­ ­ ­ ­ ­on þanc mote sealmas singan ­ ­ ­ ­ ­swyþe geneahhe.

⁴ Is þin mildheort mod ­ ­ ­ ­ ­mycel oð heofenas ahafen healice ­ ­ ­ ­ ­ofer hæleða bearn; ys þin soðfæstnes ­ ­ ­ ­ ­seted oþ wolcen.

⁵ Ahafen þu eart ofer heofenas ­ ­ ­ ­ ­halig Drihten; is wuldur ðin ­ ­ ­ ­ ­wide swylce ofer þas eorðan ­ ­ ­ ­ ­ealle mære, and þine þa gecorenan wesan ­ ­ ­ ­ ­clæne and alysde.

⁶ Do me þin swyðre hand ­ ­ ­ ­ ­swylce halne and me gehyre, ­ ­ ­ ­ ­hælynd Drihten,

⁷ þe on halgum spreceð ­ ­ ­ ­ ­her on eorðan: “and ic blissige, ­ ­ ­ ­ ­bu gedæle, þa selegesceotu, ­ ­ ­ ­ ­þa on Sycimam nu and on Metibor ­ ­ ­ ­ ­mære standað.

⁸ Min is Galaad, ­ ­ ­ ­ ­gearwe Mannases, is Effrem his ­ ­ ­ ­ ­agen broður efne heah strengðu ­ ­ ­ ­ ­heafdes mines. Ic me to cyninge ­ ­ ­ ­ ­cenne Iudas,

⁹ syndan me Moabitingas ­ ­ ­ ­ ­magas swylce; ic Idumea ­ ­ ­ ­ ­ealle cenne and min gescy þyder ­ ­ ­ ­ ­sendan þence; syndan me fremde cynn ­ ­ ­ ­ ­fæste underþeoded.”

¹⁰ Hwylc gelædeð me ­ ­ ­ ­ ­on lifes byrig fæste getrymede, ­ ­ ­ ­ ­þæt ic forð þanon on Idumea wese ­ ­ ­ ­ ­eft gelæded?

¹¹ Hwæt, þu eart se sylfa god, ­ ­ ­ ­ ­þe us synnige iu adrife fram dome; ­ ­ ­ ­ ­ne do þu æfre swa, þæt þu of urum mægene ­ ­ ­ ­ ­mod acyrre.

¹² Syle us on earfoðum ­ ­ ­ ­ ­æþelne fultum; for þon hælu byð ­ ­ ­ ­ ­her on eorðan manna gehwylces ­ ­ ­ ­ ­mægene idel.

¹³ Us sceal mægenes gemet ­ ­ ­ ­ ­mihtig Drihten soðfæst syllan, ­ ­ ­ ­ ­and he sona mæg ure feond gedon ­ ­ ­ ­ ­fracuþe to nawihte.