Sealm 105 - Anglo-Saxon Psalms c.890-950 AD

Sealm 104

¹ Andetað Drihtne ­ ­ ­ ­ ­and his ecne naman cegað cymlice, ­ ­ ­ ­ ­and cwyce secgeað his wundorweorc ­ ­ ­ ­ ­ofer ealle werðeode.

² Singað him swylce ­ ­ ­ ­ ­and salletað, secgað his wundor eall ­ ­ ­ ­ ­wide mæru.

³ Hergeað his naman ­ ­ ­ ­ ­niode swylce; heorte hygeclæne ­ ­ ­ ­ ­hlutre blissað þam þe soðlice ­ ­ ­ ­ ­secað Dryhten.

⁴ Secað ge Drihten, ­ ­ ­ ­ ­and ge syððan beoð teonan gehwylce ­ ­ ­ ­ ­ful trume æghwær; secað his ansyne ­ ­ ­ ­ ­symble georne.

⁵ Gemunað ge on mode, ­ ­ ­ ­ ­hu he mænig wundor worhte wræclice, ­ ­ ­ ­ ­wundur unlytel, and his muþes eac ­ ­ ­ ­ ­mære domas.

⁶ Hwæt, he Abrahames cynn, ­ ­ ­ ­ ­þe his esne wæs, geweorðude ­ ­ ­ ­ ­ofer werþeoda, and Iacobes bearn, ­ ­ ­ ­ ­þone he geara geceas.

⁷ He is ure Drihten ­ ­ ­ ­ ­dædum spedig; earun his domas ­ ­ ­ ­ ­deore and mære geond þisse eorðan ­ ­ ­ ­ ­æghwylcne dæl.

⁸ He þæs on worulde ­ ­ ­ ­ ­wearð gemyndig, þæt he worde gecwæð ­ ­ ­ ­ ­on gewitnesse, þæt heo on þusende ­ ­ ­ ­ ­þæt sceoldan healdan, þære cneorisse ­ ­ ­ ­ ­cwyc se þe lifde.

⁹ Þæt he mid aðsware ­ ­ ­ ­ ­to Abrahame and to Isaace ­ ­ ­ ­ ­eac gesohte,

¹⁰ and gleawlice ­ ­ ­ ­ ­Iacobe bead, þæt awa to feore ­ ­ ­ ­ ­Israheles cyn his gewitnesse ­ ­ ­ ­ ­wel geheolde.

¹¹ And him þa mid soðe ­ ­ ­ ­ ­sægde cweðende: “Ic eowrum cynne ­ ­ ­ ­ ­Khananea land on agene æht ­ ­ ­ ­ ­yrfe gesylle.”

¹² Næs þæt mære cynn ­ ­ ­ ­ ­mycel on rime, ac on þam folce ­ ­ ­ ­ ­feawe wæran ænige, oð ðæt bigengum ­ ­ ­ ­ ­beornas onwocan;

¹³ cynn æfter cynne ­ ­ ­ ­ ­cende wæran, oð þæt hio oðer folc ­ ­ ­ ­ ­egsan geðiwdan.

¹⁴ Ne let he him manna ­ ­ ­ ­ ­mihte sceððan and he þearle for him ­ ­ ­ ­ ­þrea geaf kyningum.

¹⁵ Ne sceolon ge mine þa halgan ­ ­ ­ ­ ­hrinan ne gretan ne on mine witigan ­ ­ ­ ­ ­wergðe settan.

¹⁶ Cwom þa ofer eorðan ­ ­ ­ ­ ­ermðu and hungor, wurdon wide menn ­ ­ ­ ­ ­wædlan hlafes.

¹⁷ He him snoterne beforan ­ ­ ­ ­ ­sende æryst ful wisne ­ ­ ­ ­ ­wer to scealce, and þa bebohtan ­ ­ ­ ­ ­bearn Iacobes Ioseph on geoguðe; ­ ­ ­ ­ ­

¹⁸ þær hine grame æryst hæfdon to hæfte, ­ ­ ­ ­ ­

¹⁹ oþ þæt hine halig God þurh his worda ­ ­ ­ ­ ­wisdom ahof.

²⁰ Sende him soð cyning ­ ­ ­ ­ ­sweotule are, alysde hine lungre ­ ­ ­ ­ ­and hine þam leodum þa to ealdormen ­ ­ ­ ­ ­eallum sette.

²¹ He sette hine on his huse ­ ­ ­ ­ ­to hlafwearde, ealra him his æhta ­ ­ ­ ­ ­anweald betæhte,

²² Þæt he his ealdormen ­ ­ ­ ­ ­ealle lærde, swa he his sylfes mod ­ ­ ­ ­ ­geseted hæfde, and þa yldestan ­ ­ ­ ­ ­ealle lærde, þæt heo wisdomes ­ ­ ­ ­ ­word oncneowan.

²³ Þær Israhel becwom ­ ­ ­ ­ ­on Egypta, and se gōda ­ ­ ­ ­ ­Iacob syþþan eft eardude ­ ­ ­ ­ ­eorðan Khanaan.

²⁴ He þæt eadige folc ­ ­ ­ ­ ­ehte swyðe, and hio ofer heora feond ­ ­ ­ ­ ­fæste getrymede.

²⁵ Hiora heortan he ongan ­ ­ ­ ­ ­hwyrfan æryst, þæt heo his folc ­ ­ ­ ­ ­feodan swyðe and his esnum eac ­ ­ ­ ­ ­inwit fremedan.

²⁶ Þa he him þone mæran ­ ­ ­ ­ ­Moyses sende, his sylfes scealc, ­ ­ ­ ­ ­samod ætgædere and Aaron eac, ­ ­ ­ ­ ­þone he ær geceas.

²⁷ He sette on hi sylfe ­ ­ ­ ­ ­soðne wisdom worda and weorca ­ ­ ­ ­ ­wundortacna and forebeacna, ­ ­ ­ ­ ­þæt hio fromlice cyðdan cneomagum ­ ­ ­ ­ ­cystum gōdum, oðþæt heo geforan ­ ­ ­ ­ ­folc Khananea.

²⁸ He hi mid þystrum ongan ­ ­ ­ ­ ­þrean æt frymþe, forðon hio word heora ­ ­ ­ ­ ­wel ne oncneowan.

²⁹ And heora wæter swylce ­ ­ ­ ­ ­wende to blode, on ðam heora fisceas ­ ­ ­ ­ ­frecne forwurdan.

³⁰ Sende on heora eorþan ­ ­ ­ ­ ­ealle swylce toscean teonlice, ­ ­ ­ ­ ­þa teolum husum on cyninga cofum ­ ­ ­ ­ ­cwyce eardedan.

³¹ He sylfa cwæð; ­ ­ ­ ­ ­sona cwoman mysci manige, ­ ­ ­ ­ ­mid wæran gnættas, fleohcynnes feala ­ ­ ­ ­ ­flugan on gemæru.

³² Sette him regnas ­ ­ ­ ­ ­reþe swylce, hate of heofenum ­ ­ ­ ­ ­hagol byrnende, se lige forgeaf ­ ­ ­ ­ ­land Egypta.

³³ Syððan forwurdan ­ ­ ­ ­ ­heora wingeardas and ficbeamas; ­ ­ ­ ­ ­furþor ne mihton blæda bringan ­ ­ ­ ­ ­ne bearwa treow.

³⁴ He þa syþþan cwæð; ­ ­ ­ ­ ­sona cwoman gangan gærshoppan ­ ­ ­ ­ ­and grame ceaferas; ne mihte þa on moldan ­ ­ ­ ­ ­man geriman,

³⁵ þe þær on foldan ­ ­ ­ ­ ­fræton wæstmas.

³⁶ Syþþan he æfter sloh ­ ­ ­ ­ ­æghwylc frumbearn þe on Egyptum wæs ­ ­ ­ ­ ­ahwær acenned, and frumcynnes ­ ­ ­ ­ ­heora frean swylce.

³⁷ And his þæt gōde folc ­ ­ ­ ­ ­golde and seolfre geweorþade ­ ­ ­ ­ ­and hi wislice leofe lædde; ­ ­ ­ ­ ­næs þæra leoda ða ænig untrum ­ ­ ­ ­ ­yldra ne gingra.

³⁸ Wurdon him Egyptas ­ ­ ­ ­ ­æfter bliðe, syððan hi on fore ­ ­ ­ ­ ­folc sceawedan, forðon him þær egesa ­ ­ ­ ­ ­angryslic stod.

³⁹ He hi wolcne bewreah, ­ ­ ­ ­ ­wraðum ahredde, het him neode ­ ­ ­ ­ ­nihta gehwylce fyrenne bearn ­ ­ ­ ­ ­beforan wisian.

⁴⁰ Flæsces hi bædon, ­ ­ ­ ­ ­fuglas coman, of garsecge ­ ­ ­ ­ ­ganetas fleogan, and hi heofonhlafe ­ ­ ­ ­ ­halige gefylde.

⁴¹ Het him of stane ­ ­ ­ ­ ­streamas flowan, wæter on willan; ­ ­ ­ ­ ­na him gewættan fot, þa hi on Iordane ­ ­ ­ ­ ­gengdan æfter.

⁴² Ac he wæs þæra worda ­ ­ ­ ­ ­wel gemyndig, halig heofenes weard, ­ ­ ­ ­ ­þe he hleoðrade to Abrahame, ­ ­ ­ ­ ­his agenum hysse.

⁴³ And his folc lædde ­ ­ ­ ­ ­fægere on blisse and his þone gecorenan heap ­ ­ ­ ­ ­clæne on wynne.

⁴⁴ Sealde þam leodum ­ ­ ­ ­ ­landes anweald on agene æht ­ ­ ­ ­ ­oðre þeode and hi folca gewinn ­ ­ ­ ­ ­fremdra gesæton.

⁴⁵ Þær hi heoldan ­ ­ ­ ­ ­halige domas and his soðfæst word ­ ­ ­ ­ ­swylce georne, and his æbebod ­ ­ ­ ­ ­awa to feore.