Sealm 1 - Anglo-Saxon Psalms c.890-950 AD

The Prose Psalms of King Alfred (ca. 890-899 AD) Selames 1—50 Sealm I

¹ Eadig byð se wer þe ne gæð on geþeaht unrihtwisra, ne on þam wege ne stent synfulra, ne on heora wolbærendum setle ne sitt;

² ac his willa byð on Godes æ, and ymb his æ he byð smeagende dæges and nihtes.

³ Him byð swa þam treowe þe byð aplantod neah wætera rynum, þæt sylð his wæstmas to rihtre tide; and his leaf and his blæda ne fealwiað ne ne seariað. Swa byð þam men þe we ær ymbspræcon: eall him cymð to gōde þæt þæt he deð.

⁴ Ac þa unrihtwisan ne beoð na swylce, ne him eac swa ne limpð; ac hi beoð duste gelicran þonne hit wind toblæwð.

⁵ Þy ne arisað þa unrihtwisan on Domesdæg, ne þa synfullan ne beoð on geþeahte þæra rihtwisena,

⁶ for þam God wat hwylce weg þa rihtwisan geearnedon, ac þa unrihtwisan cumað to witum.