Nnwom 38 - Asante Twi Nkwa Asɛm

Dwom 38

Dawid dwom. Adesrɛ.

¹ Ao Awurade, nka mʼanim wɔ wʼabofuo mu na ntwe mʼaso wɔ wʼabufuhyeɛ mu.

² Wo bɛmma ahwire me mu, na wo nsa adwerɛ me.

³ Wʼabofuhyeɛ no enti, ahoɔden biara nni me mu; me bɔne enti, me nnompe ahodwo.

⁴ Mʼafɔdie amene me te sɛ adesoa a emu yɛ duru dodo.

⁵ Mʼakuro bɔn na aporɔ ɛsiane me bɔne mu agyimisɛm enti.

⁶ Makoto na wɔabrɛ me ase; da mu nyinaa menantenante twa agyaadwoɔ.

⁷ Mʼakyi dompe mu yea boro so: ahoɔden biara nni me onipadua mu.

⁸ Mabrɛ na mapɛkyɛ koraa. Mʼakoma mu yea ma me si apinie.

⁹ Ao Awurade, deɛ merehwɛ anim nyinaa da wʼanim; mʼapinisie nhintaa wo.

¹⁰ Mʼakoma bɔ paripari, na mʼahoɔden asa mpo mʼaniwa aduru sum.

¹¹ Mʼapirakuro enti me nnamfonom ne mʼayɔnkofoɔ mmɛn me; mʼafipamfoɔ twe wɔn ho firi me ho.

¹² Wɔn a wɔpɛ sɛ wɔkum me no sum me mfidie, wɔn a wɔpɛ sɛ wɔha me no di me sɛeɛ ho nkɔmmɔ. Ɛda mu nyinaa wɔdwene nnaadaasɛm ho.

¹³ Mete sɛ ɔsotifoɔ a ɔnte asɛm, mete sɛ mumu a ɔntumi nkasa.

¹⁴ Mayɛ sɛ obi a ɔnte asɛm, deɛ nʼano ntumi mma mmuaeɛ.

¹⁵ Ao Awurade, meretwɛn wo; Ao Awurade me Onyankopɔn, wobɛgye me so.

¹⁶ Mekaa sɛ, “Mma wɔn ani nnye; anaa mma wɔnhoahoa wɔn ho wɔ me nan a awatiri no enti.”

¹⁷ Mereyɛ mahwe ase, na me yea da so wɔ me mu.

¹⁸ Meka me mfomsoɔ kyerɛ; me bɔne hyɛ me so.

¹⁹ Bebree na wɔyɛ mʼatamfoɔ; wɔn a wɔtane me kwa no dɔɔso.

²⁰ Wɔn a wɔde bɔne tua me papa so ka no bɔ me ahohora ɛberɛ a mereyɛ papa.

²¹ Ao, Awurade nnya me. Ao me Onyankopɔn, nkɔ akyiri!

²² Bra ntɛm bɛboa me, Awurade, mʼAgyenkwa. Wɔde ma ɔdwomkyerɛfoɔ no. Yedutun.