Nnwom 26 - Asante Twi Nkwa Asɛm

Dwom 26

Dawid dwom.

¹ Bu me bem, Ao Awurade, ɛfiri sɛ, mabɔ bra a asɛm nni ho: mede me ho too Awurade so na manhinhim.

² Sɔ me hwɛ, Ao Awurade, hwehwɛ mʼakoma ne mʼadwene mu.

³ Wʼadɔeɛ wɔ mʼanim daa na mɛnante wo nokorɛ mu.

⁴ Me ne nnaadaafoɔ ntena na me ne nyaatwomfoɔ nso nni hwee yɛ.

⁵ Mekyiri nnebɔneyɛfoɔ dwabɔ na mempɛ sɛ me ne amumuyɛfoɔ tena.

⁶ Mehohoro me nsa wɔ bembuo mu, na makɔ wʼafɔrebukyia ho ahyia, Ao Awurade,

⁷ na mepae mu ka wʼayɛyie na meka wʼanwanwadeɛ nyinaa.

⁸ Mʼani gye efie a wote mu ho, Ao Awurade, baabi a wʼanimuonyam wɔ no.

⁹ Mfa me kra nka nnebɔneyɛfoɔ deɛ ho nkɔ. Mfa me nkwa nka mogyapɛfoɔ deɛ ho,

¹⁰ wɔn a amumuyɛ nhyehyɛeɛ wɔ wɔn nsam na adanmudeɛ ayɛ wɔn nsa nifa ma.

¹¹ Nanso mebɔ ɔbra a ɛho teɛ. Hu me mmɔbɔ na gye me nkwa.

¹² Me nan sisi asase tamaa so; na dwabɔ akɛseɛ ase na mɛkamfo Awurade.