Nnwom 128 - Asante Twi Nkwa Asɛm

Dwom 128

Ɔsorokorɔ dwom.

¹ Nhyira ne wɔn a wɔsuro Awurade, na wɔnante nʼakwan so.

² Wobɛdi wʼadwuma so aba; nhyira ne yiedie bɛyɛ wo dea.

³ Wo yere bɛyɛ sɛ bobe a ɛso aba wɔ wo fie; na wo mmammarima ayɛ sɛ ngo dua a afifiri atwa wo ɛpono ho ahyia.

⁴ Yei ne onipa a wɔahyira noɔ, deɛ ɔsuro Awurade no.

⁵ Awurade nhyira wo mfiri Sion wo nkwa nna nyinaa; na ɔmma wo nhunu Yerusalem nkɔsoɔ,

⁶ na ɔmma wo ntena ase nhunu wo mma mma. Asomdwoeɛ nka Israel.